మధ్యతరగతి కోసం ఇంటర్నేషనల్ స్కూటర్.. ఒక్క ఛార్జ్‌తో 150+ కి.మీ.. పేటెంట్ దాఖలు చేసిన విన్‌ఫాస్ట్!

భారతదేశంలో ఎలక్ట్రిక్ ద్విచక్ర వాహనాల మార్కెట్ వేగంగా విస్తరిస్తుండటంతో ప్రపంచవ్యాప్తంగా ఉన్న ప్రముఖ కంపెనీలు ఈ మార్కెట్‌పై ప్రత్యేక దృష్టి సారిస్తున్నాయి. ఇప్పటికే అనేక దేశీయ, విదేశీ బ్రాండ్లు తమ ఎలక్ట్రిక్ స్కూటర్లతో భారత వినియోగదారులను ఆకట్టుకునే ప్రయత్నాలు చేస్తున్నాయి. ఈ నేపథ్యంలో వియత్నాంకు చెందిన ప్రముఖ ఎలక్ట్రిక్ వాహన తయారీ సంస్థ విన్‌ఫాస్ట్ (VinFast) కూడా భారత మార్కెట్లో బలమైన ఉనికిని చాటుకునేందుకు సిద్ధమవుతోంది. ఇప్పటికే భారతదేశంలో ఎలక్ట్రిక్ కార్లను విడుదల చేసే ప్రణాళికలను ప్రకటించిన ఈ సంస్థ, ఇప్పుడు అత్యాధునిక ఎలక్ట్రిక్ స్కూటర్లను కూడా దేశీయ మార్కెట్లో ప్రవేశపెట్టేందుకు వేగంగా అడుగులు వేస్తోంది. ఈ క్రమంలో విన్‌ఫాస్ట్ తాజాగా తన కొత్త స్పోర్టీ ఎలక్ట్రిక్ స్కూటర్ డిజైన్‌కు సంబంధించిన పేటెంట్‌ను దాఖలు చేసింది.

ఈ పేటెంట్ చిత్రాలు బయటకు రావడంతో ఆటోమొబైల్ రంగంలో ఆసక్తికరమైన చర్చ మొదలైంది. గతంలో కంపెనీ క్లాసిక్ రెట్రో స్టైలింగ్‌తో రూపొందించిన క్లారా ఎస్ ఎలక్ట్రిక్ స్కూటర్‌కు భారతదేశంలో డిజైన్ పేటెంట్ పొందింది. అయితే తాజా పేటెంట్‌లో కనిపిస్తున్న స్కూటర్ పూర్తిగా భిన్నమైన డిజైన్‌ను కలిగి ఉంది. స్పోర్టీ బాడీ స్టైలింగ్, షార్ప్ డిజైన్ ఎలిమెంట్స్, ఆధునిక లుక్‌తో ఇది యువతను ఆకర్షించేలా రూపొందించినట్లు తెలుస్తోంది.

మరో ఆసక్తికరమైన విషయం ఏమిటంటే, ఈ కొత్త స్కూటర్‌ను ఇప్పటివరకు విన్‌ఫాస్ట్ తన స్వదేశీ మార్కెట్ అయిన వియత్నాంలో కూడా విడుదల చేయలేదు. దీంతో ఈ మోడల్‌ను ప్రత్యేకంగా భారత మార్కెట్ అవసరాలను దృష్టిలో ఉంచుకుని అభివృద్ధి చేసిందా? లేక ప్రపంచవ్యాప్తంగా ఒకేసారి విడుదల చేసే కొత్త గ్లోబల్ మోడలా? అనే అంశంపై ఆసక్తి నెలకొంది. కంపెనీ నుంచి దీనిపై అధికారిక ప్రకటన ఇంకా రాకపోయినప్పటికీ, పేటెంట్ దాఖలు చేసింది.

తాజాగా వెలుగులోకి వచ్చిన పేటెంట్ చిత్రాలను పరిశీలిస్తే, ఈ కొత్త విన్‌ఫాస్ట్ ఎలక్ట్రిక్ స్కూటర్ కంపెనీ విదేశీ మార్కెట్లలో విక్రయిస్తున్న వైపర్ మోడల్‌ను కొంతవరకు పోలి కనిపిస్తుంది. అయితే డిజైన్‌ను నిశితంగా గమనిస్తే, ఇది పూర్తిగా కొత్త బాడీ స్టైలింగ్‌తో రూపొందించబడిన మోడల్ అని స్పష్టమవుతుంది. వైపర్‌లో కనిపించే స్పోర్టీ డీఎన్‌ఏను కొనసాగిస్తూనే, మరింత ఆధునికమైన స్టైలింగ్ ఎలిమెంట్స్‌ను ఇందులో జోడించారు.

ముఖ్యంగా ముందుభాగంలో షార్ప్ LED హెడ్‌ల్యాంప్స్, వెనుక భాగంలో స్టైలిష్ LED టెయిల్‌ల్యాంప్స్, స్పోర్టీ రియర్ గ్రాబ్ రైల్, ప్రీమియం ఫినిష్‌తో కూడిన సైడ్ ప్యానెల్స్ ఈ స్కూటర్‌కు ప్రత్యేక ఆకర్షణగా నిలుస్తున్నాయి. మొత్తం మీద యువతను లక్ష్యంగా చేసుకుని రూపొందించిన ప్రీమియం ఎలక్ట్రిక్ స్కూటర్‌గా ఇది కనిపిస్తోంది. పనితీరు పరంగా చూస్తే, ఈ స్కూటర్‌లో విన్‌ఫాస్ట్ వైపర్ మోడల్‌లో ఉపయోగిస్తున్న పవర్‌ట్రెయిన్‌ను అందించే అవకాశం ఉందని సమాచారం.

ఇందులో 3 kWh బ్యాటరీ ప్యాక్‌తో పాటు గరిష్టంగా 3 kW పవర్ ఉత్పత్తి చేసే ఎలక్ట్రిక్ మోటార్‌ను అందించే అవకాశముంది. ఈ సెటప్ నగర ప్రయాణాలకు కావాల్సిన సామర్థ్యాన్ని అందించనుంది. ఒక్కసారి పూర్తి ఛార్జ్ చేస్తే సుమారు 156 కిలోమీటర్ల వరకు ప్రయాణించగలదని అంచనా. అలాగే గరిష్టంగా 70 కిమీ/గంట వేగాన్ని అందుకునే అవకాశం ఉంది. బ్యాటరీని పూర్తిగా ఛార్జ్ చేయడానికి సుమారు 4.5 గంటలు పడుతుందని తెలుస్తోంది.

ధర విషయానికి వస్తే, వియత్నాంలో విక్రయిస్తున్న విన్‌ఫాస్ట్ వైపర్ ధర భారత కరెన్సీలో సుమారు రూ.1.63 లక్షలు. అయితే భారత మార్కెట్లో మాత్రం పోటీని దృష్టిలో ఉంచుకుని రూ.1.50 లక్షల లోపు ప్రారంభ ఎక్స్‌షోరూమ్ ధరతో తీసుకురావచ్చని ఆటోమొబైల్ వర్గాలు అంచనా వేస్తున్నాయి. అదే జరిగితే, ప్రీమియం ఎలక్ట్రిక్ స్కూటర్ విభాగంలో ఈ కొత్త విన్‌ఫాస్ట్ మోడల్‌కు మంచి ఆదరణ లభించే అవకాశాలు కనిపిస్తున్నాయి.