ఇక పెట్రోల్ బంకులకు గుడ్ బై..10 నిమిషాల ఛార్జింగ్‌తో 300 కిలోమీటర్లు..మార్కెట్లోకి సెన్సేషనల్ బైక్

ఎలక్ట్రిక్ వాహనాల(EV) ప్రపంచంలో ఒక అద్భుతం ఆవిష్కృతమైంది. మొన్నటి వరకు మనం స్మార్ట్‌ఫోన్లలో మాత్రమే చూసిన ఫాస్ట్ చార్జింగ్ టెక్నాలజీ, ఇప్పుడు ఏకంగా భారీ ఎలక్ట్రిక్ బైకుల్లోకి వచ్చేసింది. కేవలం 10 నిమిషాల చార్జింగ్‌తో ఏకంగా 299 కిలోమీటర్ల రేంజ్ ఇచ్చే విప్లవాత్మక బైక్‌ను ఫిన్లాండ్‌ కంపెనీ సిద్ధం చేసింది.

ఫిన్లాండ్‌కు చెందిన ఎలక్ట్రిక్ వాహన తయారీ సంస్థ వెర్జ్ మోటార్‌సైకిల్స్ (Verge Motorcycles) ఆటోమొబైల్ ప్రపంచంలో పెను సంచలనం సృష్టించింది. ఇప్పటివరకు కేవలం కార్ల తయారీ సంస్థలకే పరిమితమైన సోలిడ్-స్టేట్ బ్యాటరీ (Solid-State Battery) టెక్నాలజీని మొట్టమొదటిసారిగా ఒక ప్రొడక్షన్ బైక్‌లోకి తీసుకువచ్చింది. కేవలం 10 నిమిషాల ఛార్జింగ్‌తోనే సుమారు 300 కిలోమీటర్ల వరకు ప్రయాణించగల సామర్థ్యం ఈ బైక్ సొంతం.

సాధారణంగా ఎలక్ట్రిక్ వాహనాల్లో మనం చూసే లిథియం-అయాన్ బ్యాటరీల్లో లిక్విడ్ ఎలక్ట్రోలైట్స్ ఉంటాయి. కానీ వెర్జ్ మోటార్‌సైకిల్స్ తన TS Pro మోడల్‌లో డోనట్ ల్యాబ్ (Donut Lab) సహకారంతో అభివృద్ధి చేసిన సోలిడ్-స్టేట్ బ్యాటరీని అమర్చింది. ఈ బ్యాటరీల్లో లిక్విడ్ బదులు ఘన పదార్థాన్ని వాడుతారు.

దీనివల్ల బ్యాటరీ వేడెక్కడం, మంటలు రావడం వంటి సమస్యలు ఉండవు. అంతేకాకుండా, ఇది లిథియం-అయాన్ కంటే రెట్టింపు శక్తిని (Energy Density) నిల్వ చేయగలదు. ఈ బ్యాటరీకి దాదాపు 1,00,000 ఛార్జింగ్ సైకిల్స్ లైఫ్ ఉంటుందని కంపెనీ పేర్కొంది, అంటే బైక్ ఉన్నంత కాలం బ్యాటరీ మార్చాల్సిన పని ఉండదు.

ఈ బైక్ వినియోగదారుల అతిపెద్ద సమస్య అయిన ఛార్జింగ్ సమయాన్ని సమూలంగా మార్చేసింది. వెర్జ్ TS Pro బైక్ 200kW ఫాస్ట్ ఛార్జింగ్‌ను సపోర్ట్ చేస్తుంది. దీని ద్వారా కేవలం 10 నిమిషాల ఛార్జింగ్‌తో 299 కిలోమీటర్ల (186 మైళ్ల) రేంజ్‌ను పొందవచ్చు. పూర్తి ఛార్జింగ్‌పై ఈ బైక్ గరిష్టంగా 600 కిలోమీటర్ల (373 మైళ్ల) భారీ రేంజ్‌ను ఇస్తుందని కంపెనీ వెల్లడించింది. ఇది ప్రస్తుతం మార్కెట్లో ఉన్న ఎలక్ట్రిక్ బైక్‌ల కంటే ఎంతో మెరుగైనది.

వెర్జ్ TS Pro కేవలం రేంజ్ విషయంలోనే కాకుండా పర్ఫార్మెన్స్‌లోనూ సూపర్‌కార్లకు పోటీ ఇస్తుంది. ఇందులో వాడిన హబ్‌లెస్ (Hubless) మోటార్ ఏకంగా 1,000 Nm టార్క్‌ను, 138 hp పవర్‌ను ఉత్పత్తి చేస్తుంది. కేవలం 3.5 సెకన్లలోనే గంటకు 0 నుండి 100 కిలోమీటర్ల వేగాన్ని అందుకోగలదు.

దీని వెనుక చక్రం మధ్యలో ఖాళీగా ఉండి, డిజైన్ చాలా ఫ్యూచరిస్టిక్‌గా ఉంటుంది. ఇందులో 20.2 kWh (స్టాండర్డ్), 33.3 kWh (ఎక్స్‌టెండెడ్ రేంజ్) అనే రెండు బ్యాటరీ ఆప్షన్లు అందుబాటులో ఉన్నాయి. ప్రస్తుతం ఈ బైక్ ధర అంతర్జాతీయ మార్కెట్లో సుమారు 29,900 యూరోల (సుమారు రూ.27 లక్షలు) నుండి ప్రారంభం అవుతోంది.

దీని డెలివరీలు 2026 మొదటి త్రైమాసికంలో ప్రారంభం కానున్నాయి. ప్రస్తుతం ఐరోపా, అమెరికా దేశాల్లో బుకింగ్స్ ఓపెన్ అయ్యాయి. భారత్ వంటి మార్కెట్లలో ఇది ఎప్పుడు వస్తుందనే దానిపై కంపెనీ ఇంకా అధికారిక ప్రకటన చేయలేదు. కానీ, ఈ సాంకేతికత అందుబాటులోకి వస్తే మాత్రం ఎలక్ట్రిక్ వాహనాల భవిష్యత్తు పూర్తిగా మారిపోవడం ఖాయం.