సామాన్యుల కోసం దేశంలోనే మొట్టమొదటి యమహా ఎలక్ట్రిక్ స్కూటర్ లాంచ్.. తక్కువ ధరలో ఫీచర్స్ అదిరిపోతున్నాయ్!

యమహా మోటార్ ఇండియా (Yamaha Motorcycle India) దేశంలో ప్రముఖ ద్విచక్ర వాహన తయారీదారుగా తనకంటూ ప్రత్యేక గుర్తింపును సంపాదించుకుంది. ఇప్పటివరకు పెట్రోల్ బైక్స్, స్కూటర్లతో మార్కెట్‌ను ఆకట్టుకున్న యమహా, ఇప్పుడు వేగంగా విస్తరిస్తున్న ఎలక్ట్రిక్ వాహన (EV) విభాగంలోకి కూడా అధికారికంగా అడుగుపెట్టింది. ఈ క్రమంలో కంపెనీ తాజాగా తన సరికొత్త ఎలక్ట్రిక్ స్కూటర్ Yamaha EC-06 (ఈసీ 06)ను భారత మార్కెట్‌లో విడుదల చేసింది. కొత్త EC-06 ఈ-స్కూటర్ మొదటి చూపులోనే ఆకట్టుకునే డిజైన్‌తో వస్తుంది. ఆధునిక స్టైలింగ్, ప్రీమియం లుక్‌తో యువతతో పాటు కుటుంబ వినియోగదారులను కూడా ఆకర్షించేలా దీన్ని రూపొందించారు. ముఖ్యంగా, ఈ స్కూటర్‌ను బెంగళూరు సమీపంలోని హోస్కోట్‌లో ఉన్న రివర్ మొబిలిటీ తయారీ యూనిట్‌లో తయారు చేయడం విశేషం.

ధర విషయానికి వస్తే, కొత్త Yamaha EC-06 ఎలక్ట్రిక్ స్కూటర్‌ను రూ. 1.67 లక్షల (ఎక్స్-షోరూమ్) ధరతో విడుదల చేసింది. ఈ ధర స్థాయిలో యమహా బ్రాండ్ నుంచి ఒక ఎలక్ట్రిక్ స్కూటర్ రావడం వల్ల, అన్ని వర్గాల వినియోగదారులకు సులభంగా అందుబాటులోకి రానుంది. ముఖ్యంగా పెట్రోల్ ధరలు పెరుగుతున్న ఈ సమయంలో, తక్కువ నిర్వహణ ఖర్చుతో ఉండే ఎలక్ట్రిక్ స్కూటర్ కావాలనుకునే వారికి ఇది మంచి ఎంపికగా మారనుంది.

ఇంకా విశేషం ఏమిటంటే, ఈ స్కూటర్‌లో ఉపయోగించిన బ్యాటరీ ప్యాక్‌కు 3 సంవత్సరాలు లేదా 30,000 కిలోమీటర్ల వారంటీ అందిస్తున్నారు. ఇది వినియోగదారుల్లో నమ్మకాన్ని మరింత పెంచే అంశం. బ్యాటరీ జీవితంపై ఉన్న సందేహాలను తగ్గిస్తూ, దీర్ఘకాలిక వినియోగానికి ఇది సరైన స్కూటర్ అనే భరోసాను యమహా అందిస్తోంది. Yamaha EC-06 ఈ-స్కూటర్‌తో యమహా ఎలక్ట్రిక్ వాహన విభాగంలో బలమైన ఆరంభం చేసినట్టే కనిపిస్తోంది.

యమహా EC 06 ఎలక్ట్రిక్ స్కూటర్ ఆధునిక సాంకేతిక లక్షణాలతో పూర్తిగా నిండి ఉండి, నేటి తరం వినియోగదారుల అవసరాలను దృష్టిలో పెట్టుకుని రూపొందించబడింది. ఈ స్కూటర్‌లో అందించిన కలర్ LCD డిస్ప్లే రైడర్‌కు అవసరమైన అన్ని ముఖ్యమైన సమాచారాన్ని ఒకే చూపులో అందిస్తుంది. రైడింగ్ మోడ్, బ్యాటరీ ఛార్జ్ స్థాయి, ప్రస్తుత వేగం వంటి వివరాలు స్పష్టంగా కనిపించేలా ఈ డిస్ప్లే రూపొందించారు.

ఇంకా మెరుగైన అనుభవం కోసం, యమహా ఇందులో Yamaha Motor Connect R యాప్ సపోర్ట్‌ను అందించింది. దీంతో స్కూటర్‌ను రైడర్ స్మార్ట్‌ఫోన్‌కు కనెక్ట్ చేసుకోవచ్చు. దీంతో యజమానులు తమ మొబైల్‌లోనే రియల్ టైమ్ డేటాను చెక్ చేసుకోవడం, స్కూటర్ సమాచారం తెలుసుకోవడం చాలా సులభమవుతుంది. ఈ ఫీచర్ టెక్నాలజీకి ప్రాధాన్యత ఇచ్చే యువతను ప్రత్యేకంగా ఆకట్టుకునే అవకాశం ఉంది. లైటింగ్ విషయంలో కూడా యమహా ఎలాంటి రాజీ పడలేదు.

ఈ స్కూటర్‌లో పూర్తి LED హెడ్‌ల్యాంప్‌లు, టెయిల్ ల్యాంప్‌లు ఇవ్వడం వల్ల రాత్రి ప్రయాణాల్లో మంచి విజిబిలిటీతో పాటు ప్రీమియం లుక్ కూడా లభిస్తుంది. డిజైన్ పరంగా మాత్రమే కాకుండా, ప్రయోజనకరమైన అంశాలపై కూడా కంపెనీ దృష్టి పెట్టింది. స్టోరేజ్ విషయానికి వస్తే, యమహా EC 06లో 24.5 లీటర్ల అండర్-సీట్ స్టోరేజ్ స్పేస్ అందించారు. ఇందులో హెల్మెట్‌తో పాటు ఇతర నిత్యావసరాలను కూడా సురక్షితంగా నిల్వ చేసుకోవచ్చు.

ఈ స్కూటర్‌కు శక్తినిచ్చే 4kWh లిథియం-అయాన్ బ్యాటరీ ప్యాక్ ఒకే ఛార్జ్‌తో 169 కిలోమీటర్ల వరకు రేంజ్ అందించగలదు. స్కూటర్ IPMSM ద్వారా శక్తిని పొందుతుంది. ఇది 6.7 kW పీక్ పవర్, 26 Nm టార్క్ ఉత్పత్తి చేస్తుంది. ఈ ఎలక్ట్రిక్ స్కూటర్ గరిష్ట వేగం గంటకు 79 కి.మీ. దీన్ని ఇంట్లోనే ఛార్జ్ చేయవచ్చు. బ్యాటరీని పూర్తిగా ఛార్జ్ చేయడానికి దాదాపు ఎనిమిది గంటలు పడుతుంది.