ఈ బైక్ పెట్రోల్‎తో కాదు మామ..క్రేజ్‎తో నడుస్తుంది..స్టాక్ లేదన్నా షోరూమ్స్ వద్ద పడిగాపులు కాస్తున్న జనం

యమహా మోటార్ ఇండియా తన అమ్ములపొదిలోకి కొత్తగా చేరిన XSR 155 మోడల్‌తో భారత టూవీలర్ మార్కెట్‌ను ఒక ఊపు ఊపేస్తోంది. 2025 డిసెంబర్ నెల అమ్మకాల గణాంకాలను పరిశీలిస్తే, యమహా చరిత్రలోనే కనివినీ ఎరుగని వృద్ధిని నమోదు చేసింది. కేవలం ఒక్క నెలలోనే యమహా బ్రాండ్‌ను అమ్మకాల శిఖరాగ్రాన నిలబెట్టిన ఘనత XSR 155 బైక్‌కే దక్కుతుంది. నవంబర్ 2025లో మార్కెట్లోకి అడుగుపెట్టిన ఈ నియో-రెట్రో స్టైల్ బైక్, డిసెంబర్ నెలలోనే రికార్డు స్థాయిలో అమ్ముడై ఆటోమొబైల్ నిపుణులను సైతం ఆశ్చర్యపరిచింది.

యమహా ఇండియా తన అమ్మకాల రిపోర్ట్‌ను విడుదల చేసింది. గతేడాది (2024) డిసెంబర్ నెలలో 36,780 వాహనాలను మాత్రమే విక్రయించిన యమహా, 2025 డిసెంబర్ నాటికి ఆ సంఖ్యను ఏకంగా 54,914 యూనిట్లకు పెంచుకుంది. అంటే ఏడాది కాలంలో దాదాపు 49.3% అద్భుతమైన వృద్ధిని సాధించింది.

ఈ భారీ విజయానికి ప్రధాన కారణం నవంబర్ నెలలో లాంచ్ అయిన Yamaha XSR 155. చాలా కాలంగా భారతీయ బైక్ ప్రియులు ఈ మోడల్ కోసం ఎదురుచూస్తున్నారు. మార్కెట్లోకి వచ్చిన మొదటి పూర్తి నెలలోనే (డిసెంబర్) ఇది 14,951 యూనిట్లు అమ్ముడై యమహాలోనే అత్యధికంగా అమ్ముడైన మోడల్‌గా నిలిచింది. కంపెనీ మొత్తం అమ్మకాల్లో ఈ ఒక్క బైక్ వాటానే పావు వంతు కంటే ఎక్కువగా ఉండటం గమనార్హం.

మరోవైపు యమహా స్కూటర్లు కూడా తమ సత్తా చాటుతున్నాయి. ముఖ్యంగా Ray ZR స్కూటర్ 14,153 యూనిట్లతో రెండో స్థానంలో నిలిచింది. 2024 డిసెంబర్ తో పోలిస్తే ఇది 17.92% వృద్ధిని సాధించింది. అలాగే యమహా ఎవర్ గ్రీన్ మోడల్ అయిన FZ సిరీస్ 10,291 యూనిట్ల విక్రయాలతో మూడో స్థానంలో నిలవగా, రేసింగ్ బైక్ R15 కూడా 5,453 యూనిట్ల అమ్మకాలతో 27.73% వృద్ధిని నమోదు చేసింది.

అయితే, ఫ్యాసినో స్కూటర్ మరియు ఎంటీ-15 వంటి కొన్ని పాపులర్ మోడళ్ల అమ్మకాల్లో స్వల్పంగా 15% వరకు క్షీణత కనిపించినప్పటికీ, XSR 155 ఆ లోటును భర్తీ చేసి యమహాను నెంబర్ వన్ స్థానంలో నిలబెట్టింది. యమహా XSR 155 ఇంతటి విజయాన్ని సాధించడానికి దాని డిజైన్, ఇంజిన్ సామర్థ్యమే కారణం.

ఇందులో 155cc, లిక్విడ్-కూల్డ్, సింగిల్ సిలిండర్ ఇంజిన్ అమర్చారు. ఇది 10,000 RPM వద్ద 18.1 bhp పవర్, 8,500 RPM వద్ద 14.2 Nm టార్క్ ఉత్పత్తి చేస్తుంది. యమహాకు మాత్రమే సొంతమైన VVA (Variable Valve Actuation) టెక్నాలజీ వల్ల ఈ బైక్ తక్కువ వేగంలోనూ, ఎక్కువ వేగంలోనూ సమానమైన పర్ఫార్మెన్స్ ఇస్తుంది. దీనికి 6-స్పీడ్ గేర్‌బాక్స్ మరియు అసిస్ట్ & స్లిప్పర్ క్లచ్ వంటి ప్రీమియం ఫీచర్లు జతచేశారు.

ఫీచర్ల పరంగా చూస్తే, ఈ బైక్ ఒక మాడర్న్ క్లాసిక్ లా కనిపిస్తుంది. రౌండ్ ఎల్ఈడీ హెడ్ ల్యాంప్, టియర్ డ్రాప్ ఆకారంలో ఉన్న పెట్రోల్ ట్యాంక్, ఫ్లాట్ సీటు దీనికి పాతకాలపు అందాన్ని ఇస్తాయి. కానీ, లోపల ఉన్నది మాత్రం పక్కా మోడ్రన్ టెక్నాలజీ. పూర్తి డిజిటల్ ఇన్‌స్ట్రుమెంట్ క్లస్టర్, ట్రాక్షన్ కంట్రోల్, డ్యూయల్ ఛానల్ ఏబీఎస్ (ABS) భద్రతను పెంచుతాయి.

రాయల్ ఎన్ఫీల్డ్ హంటర్ 350, టీవీఎస్ రోనిన్ వంటి బలమైన పోటీదారులు ఉన్నప్పటికీ, యమహా బ్రాండ్ వాల్యూ, ఈ బైక్ యూనిక్ లుక్ యువతను అమితంగా ఆకట్టుకుంటున్నాయి. ధర కాస్త ఎక్కువనిపించినా, బైక్ ఇచ్చే కంఫర్ట్, స్టైల్ ముందు అది చిన్నదే అని ఫ్యాన్స్ భావిస్తున్నారు.