యామహా నుంచి అదిరిపోయే బైక్ వచ్చేసింది! R15 కంటే పవర్‌ఫుల్.. ధర, బుకింగ్ వివరాలు ఇవే

పండుగ సీజన్‌కు ముందే బైక్ లవర్స్‌కు యామహా గుడ్ న్యూస్ చెప్పింది. సరికొత్త YZF-R2 సూపర్‌స్పోర్ట్ బైక్‌ను భారత్‌లో అధికారికంగా లాంచ్ చేసింది. అసలు ఈ బైక్‌ను ఎవరు బుక్ చేసుకోవాలి? ధర ఎంత ఉంది? డెలివరీలు ఎప్పుడు ప్రారంభమవుతాయి? వంటి వివరాలన్నీ కంపెనీ వెల్లడించింది. 204cc ఇంజిన్‌తో వస్తున్న ఈ బైక్, యామహా R15 కంటే పవర్‌ఫుల్‌గా ఉంటుంది. 200cc సెగ్మెంట్‌కు అప్‌గ్రేడ్ అవ్వాలనుకునే రైడర్లనే లక్ష్యంగా చేసుకుని దీనిని రూపొందించారు. ఈ బైక్‌ను భారత్‌లోనే తయారు చేస్తున్నామని, సెప్టెంబర్ మూడో వారంలో సేల్స్ ప్రారంభిస్తామని యామహా స్పష్టం చేసింది. పండుగ రష్‌ను దృష్టిలో ఉంచుకుని ముందే డెలివరీలకు ప్లాన్ చేస్తోంది.

యామహా ఈ-షాప్‌లో ప్రీ-బుకింగ్స్ ఇప్పటికే ప్రారంభమయ్యాయి. రూ.10,000 టోకెన్ అమౌంట్‌తో బైక్‌ను బుక్ చేసుకోవచ్చు. ఈ మొత్తాన్ని ఫైనల్ ఇన్వాయిస్‌లో మినహాయిస్తారు. ఎక్స్-షోరూమ్ డెల్లీ ధర రూ. 2,30,500 నుంచి ప్రారంభమవుతుండగా, డీలర్లు మూడు వేరియంట్లు, ఐదు కలర్ ఆప్షన్లను అందుబాటులో ఉంచారు. సెప్టెంబర్ మూడో వారం నుంచి డెలివరీలు షురూ కానున్నాయి. ముందుగా ఎక్కువ డిమాండ్ ఉన్న నగరాల్లో డెలివరీలు ఇస్తారు. కలర్ ఆప్షన్ల విషయానికొస్తే రేసింగ్ బ్లూ, మ్యాట్ వైట్ పెర్ల్, మెటాలిక్ బ్లాక్, డార్క్ బ్లూయిష్ గ్రేలతో పాటు M వేరియంట్‌లో మెటాలిక్ గ్రే రంగు లభిస్తుంది.

యామహా YZF-R2 ఇండియా లాంచ్: వేరియంట్లు, ధరల వివరాలు

ఈ లైన్-అప్‌లో బేస్ R2, క్విక్ షిఫ్టర్‌తో వచ్చే R2, అలాగే టాప్ వేరియంట్ R2 M అందుబాటులో ఉన్నాయి. వీటి ఎక్స్-షోరూమ్ (ఢిల్లీ) ధరలు వరుసగా రూ. 2,30,500, రూ. 2,39,500, రూ. 2,53,000గా ఉన్నాయి. హైయర్ వేరియంట్లలో బై-డైరెక్షనల్ క్విక్ షిఫ్టర్‌తో పాటు M ట్రిమ్‌లో కొన్ని అదనపు ఫీచర్లు లభిస్తాయి. "YZF-R2 అనేది కేవలం కొత్త సెగ్మెంట్‌లోకి ప్రవేశించడం మాత్రమే కాదు; యామహా R-సిరీస్ రేసింగ్ డీఎన్‌ఏను ఇష్టపడే రైడర్ల కోసం ప్రత్యేకంగా డిజైన్ చేసిన బైక్ ఇది" అని కంపెనీ పేర్కొంది.

యామహా R2 స్పెసిఫికేషన్లు, ఎలక్ట్రానిక్స్ ఫీచర్లు

దీనిలోని కొత్త 204cc లిక్విడ్-కూల్డ్, సింగిల్ సిలిండర్ ఇంజిన్ 26.5 PS పవర్, 19.1 Nm టార్క్‌ను ఉత్పత్తి చేస్తుంది. ఈ బైక్ బరువు (కర్బ్ వెయిట్) 149 కేజీలు. హార్డ్‌వేర్ పరంగా డైమండ్ ఫ్రేమ్, అప్‌సైడ్-డౌన్ (USD) ఫోర్క్, మోనోషాక్ సస్పెన్షన్, డ్యూయల్-ఛానల్ ABS ఉన్నాయి. ఎలక్ట్రానిక్స్ విషయానికి వస్తే YCC-T థ్రోటిల్, స్ట్రీట్, స్పోర్ట్, రెయిన్ మోడ్లతో కూడిన యామహా రైడ్ కంట్రోల్, ట్రాక్షన్ కంట్రోల్, TFT కన్సోల్ ఉన్నాయి. మిడ్, M వేరియంట్లలో క్విక్ షిఫ్టర్ స్టాండర్డ్‌గా వస్తుంది.

యామహా R2 ఆన్-రోడ్ ధరలు, ఇఎంఐ వివరాలు: ఏపీ, తెలంగాణ

RTO ఛార్జీలు, ఇన్సూరెన్స్, డీలర్ ఫిట్‌మెంట్‌లను బట్టి ఆన్-రోడ్ ధరల్లో స్వల్ప మార్పులు ఉంటాయి. పన్నులు, ఇన్సూరెన్స్ వ్యయాల కారణంగా హైదరాబాద్‌లో ఆన్-రోడ్ ధర కొంత ఎక్కువగా ఉండగా, విజయవాడలో కాస్త తక్కువగా ఉంది. బయర్స్ సులువుగా ప్లాన్ చేసుకోవడం కోసం సాధారణంగా ఉండే 10.5 శాతం బ్యాంక్ వడ్డీ రేటు, 36 నెలల కాలపరిమితిని ప్రాతిపదికగా తీసుకుని రూపొందించిన డౌన్ పేమెంట్, ఈఎంఐ (EMI) అంచనాలు ఇక్కడ చూడవచ్చు:

నగరం	ఎక్స్-షోరూమ్	అంచనా ఆన్-రోడ్ ధర	అంచనా EMI
హైదరాబాద్	₹2,30,500	₹2,87,198	నెలకూ రూ. 6,900 (రూ. 75,000 డౌన్ పేమెంట్, 36 నెలలు)
విజయవాడ	₹2,30,500	₹2,70,726	నెలకూ రూ. 7,000 (రూ. 60,000 డౌన్ పేమెంట్, 36 నెలలు)

ఈ అంచనాలు ప్రస్తుత సిటీ రేట్ల ఆధారంగా ఇచ్చినవి. ఇన్సూరెన్స్ కంపెనీ, ఆర్‌టీఓ నిబంధనలను బట్టి అసలు ధరలో స్వల్ప వ్యత్యాసాలు ఉండవచ్చు.

యామహా R2 పోటీదారులు: స్పెసిఫికేషన్లు, ధరల పోలిక

మోడల్	ఇంజిన్	పవర్	కర్బ్ వెయిట్	ఎక్స్-షోరూమ్
యామహా YZF-R2	204cc	≈26.5 PS	149 కేజీలు	రూ. 2.31 లక్షలు
కేటీఎం RC 200	199.5cc	25 PS	160 కేజీలు	రూ. 2.32 లక్షలు
బజాజ్ పల్సర్ RS200	199.5cc	24.5 PS	166 కేజీలు	రూ. 1.71 లక్షలు
సుజుకి గిక్సర్ SF 250	249cc	26.5 PS	161 కేజీలు	రూ. 1.93 లక్షలు
యామహా R15 V4	155cc	18 PS	141 కేజీలు	రూ. 1.75 లక్షలు

ఈ స్పెసిఫికేషన్లు, ధరల వివరాలను బైక్‌వేల్, కేటీఎం ఇండియా సమాచారం, బజాజ్ ఆటో, సుజుకి ఇండియా, జిగ్‌వీల్స్, ఆటోకార్ ఇండియా నుంచి సేకరించడం జరిగింది.

అడ్వాన్స్‌డ్ ఎలక్ట్రానిక్స్, సరికొత్త ప్లాట్‌ఫామ్, యామహా నమ్మకమైన బిల్డ్ క్వాలిటీ కావాలనుకుంటే.. సెప్టెంబర్ మూడో వారంలో డెలివరీ పొందేందుకు ఇప్పుడే బుక్ చేసుకోవడం మంచిది. ట్రాక్ రైడింగ్‌ను ఇష్టపడేవారికి YRC మోడ్లు, క్విక్ షిఫ్టర్ బాగా ఉపయోగపడతాయి. బడ్జెట్ ప్రధానం అనుకునేవారు పండుగ సీజన్ ఆఫర్లు, ఫైనాన్స్ స్కీమ్స్ కోసం వేచి చూడవచ్చు. బుక్ చేసుకునేముందు ఆన్-రోడ్ ప్రైస్ కొటేషన్‌ను క్షుణ్ణంగా పరిశీలించడం ద్వారా అదనపు ఖర్చులను నివారించుకోవచ్చు.