భారత మార్కెట్ నుంచి తొలగిపోయిన డిస్కవర్ 125 ఎస్‌టి!

ప్రముఖ దేశీయ ద్విచక్ర వాహన తయారీ కంపెనీ బజాజ్ ఆటో, భారత మార్కెట్లో డిస్కవర్ 125 ఎస్‌టి మోడల్ విక్రయాలను నిలిపివేసినట్లు సమాచారం. అయితే, ఈ మోడల్ విదేశాలకు ఎగుమతి చేయటం మాత్రం యధావిధిగా కొనసాగుతుందని తెలుస్తోంది.

బజాజ్ ఆటో తొలిసారిగా మే 2012లో 'డిస్కవర్ 125 ఎస్‌టి' (స్పోర్ట్స్ టూరర్) మోడల్‌ను దేశీయ విపణిలో విడుదల చేసింది. ఈ విభాగంలోనే మొదటిసారిగా డిటిఎస్-ట్విన్ స్పార్క్ టెక్నాలజీ కలిగిన ఇంజన్‌ను ఈ బైక్‌లో ఉపయోగించారు.

డిస్కవరీ బ్రాండ్‌లో ఇదే టాప్ వేరియంట్. బడ్జెట్ కేటగిరీలో ప్రీమియం ఫీచర్లను ఆఫర్ చేసేలా ఈ బైక్‌ను తయారు చేశారు. అయితే, దేశీయ విపణిలో ఈ మోడల్ అమ్మకాలు ఆశించిన రీతిలో సాగకపోవటంతో, దీని అమ్మకాలను నిలిపివేయాలని కంపెనీ నిర్ణయించుకుంది.

స్పోర్టీ లుక్‌నిచ్చే కొత్త డిస్కవర్ 125 ఎస్‌టిలో 5-స్పీడ్ గేర్ బాక్స్, రీడిజైన్ చేయబడిన ఫ్యూయెల్ ట్యాంక్, షార్ప్ ఎడ్జ్‌లు కలిగిన పవర్‌ఫుల్ హెడ్‌ల్యాంప్, స్టయిలిష్ అల్లాయ్ వీల్స్, మోనోషాక్ సస్పెన్షన్, ఎలాంటి రోడ్లపై అయినా సౌకర్యవంతంగా ప్రయాణించేలా రూపొందించిన యాంటీ వైబ్రేషన్ ఫ్రేమ్, మరింత సురక్షితమైన బ్రేకింగ్ కోసం అమర్చిన పెటల్ డిస్క్ బ్రేక్ వంటి మార్పులను గమనించవచ్చు.