గోవాలో హ్యార్లీ డేవిడ్‌సన్ చవక బైక్ స్ట్రీట్ 750 ఆవిష్కరణ

Updated: Thursday, February 12, 2015, 12:02 [IST]

అమెరికన్ ఆటో దిగ్గజం హ్యార్లీ డేవిడ్‌సన్ భారత్ వంటి అభివృద్ధి చెందుతున్న మార్కెట్ల కోసం 1000సీసీ కన్నా తక్కువ ఇంజన్ సామర్థ్యం కలిగిన బైక్‌లను అభివృద్ధి చేస్తోందని, అలాగే గడచిన నవంబర్ నెలలో ఇటలీలోని మిలాన్‌లో జరిగిన ఈఐసిఎమ్ఏ మోటార్ షోలో స్ట్రీట్ 500 మరియు స్ట్రీట్ 750 అనే రెండు బైక్‌లను ఆవిష్కరించినట్లు గతంలో తెలుగు డ్రైవ్‌స్పార్క్ పలు కథనాల్లో ప్రచురించిన సంగతి తెలిసినదే.

తాజాగా.. గోవాలో జరుగుతున్న ఇండియా బైక్ వీక్ 2014 ఎడిషన్‌లో హ్యార్లీ డేవిడ్‌సన్ తమ స్ట్రీట్ 750 మోటార్‌సైకిల్‌‌ను ప్రదర్శనకు ఉంచింది. ఐబిడబ్ల్యూ 2014లో ఇది స్పెషల్ అట్రాక్షన్‌గా నిలిచింది. అమెరికాకు చెందిన ఈ పాపులర్ మోటార్‌సైకిల్ బ్రాండ్, అమెరికాకు వెలుపల ఇతర దేశాల్లో కూడా మంచి మార్కెట్ వాటాను, బ్రాండ్ ఇమేజ్‌ను సంపాధించుకునే దిశలో భాగంగా కంపెనీ ఈ చిన్న మోటార్‌సైకిళ్లను తయారు చేసింది.

మరి ఈ బుజ్జి హ్యార్లీ డేవిడ్‌సన్ మోటార్‌సైకిల్‌కు సంబంధించిన మరింత సమాచారాన్ని మరియు ఐబిడబ్ల్యూ 2014 హైలైట్స్‌ను క్రింది ఫొటో ఫీచర్‌లో పరిశీలిద్దాం రండి.

హ్యార్లీ డేవిడ్‌సన్ స్ట్రీట్ 750 ఓ క్రూయిజర్ స్టైల్ బైక్. టియర్ డ్రాప్ షేపులో ఉండే ఫ్యూయెల్ ట్యాంక్స్, ఎలాంగేటెడ్ బాడీ, రౌండెడ్ బికినీ ఫెయిరింగ్, వి-ట్విన్ ఇంజన్స్ వంటివి ఈ బైక్‌ ప్రత్యేకత.

హ్యార్లీ డేవిడ్‌సన్ తెలిపిన దాని ప్రకారం, ఈ కొత్త స్ట్రీట్ సిరీస్ మోటార్‌సైకిళ్లను ప్రపంచ వ్యాప్తంగా వేలాది మంది యువకుల నుంచి అందుకున్న ఫీడ్‌బ్యాక్‌ను ఆధారంగా చేసుకొని అభివృద్ధి చేసారు.

స్ట్రీట్ 750 మోటార్‌సైకిల్‌ను పూర్తిగా సరికొత్త ప్లాట్‌ఫామ్‌ను ఆధారంగా చేసుకొని తయారు చేశారు. ఇది హ్యార్లీ డేవిడ్‌సన్ నుంచి గడచిన 13 ఏళ్ల తర్వాత లభిస్తున్న సరికొత్త బైక్‌ కావటం విశేషం.

హ్యార్లీ డేవిడ్‌సన్ స్ట్రీట్ 750 బైక్‌ సరికొత్త బ్లాక్ స్టయిలింగ్‌తో లభ్యం కానుంది. హ్యార్లీ దీనిని 'డార్క్ కస్టమ్' అని పిలుస్తోంది. బ్లాక్ కలర్ ఇంజన్, బ్లాక్ కవర్స్, బ్లాక్ పుల్‌బ్యాక్ హ్యాండిల్‌ బార్స్, బ్లాక్ ఫోర్క్ గైటర్స్ మరియు లోవర్స్ ప్రత్యేక ఆకర్షణగా నిలుస్తాయి.

అంతేకాకుండా, ఈ బైక్‌లోని సైలెన్సర్ కూడా పూర్తిగా నలుపు రంగులోనే ఉంటుంది. హ్యార్లీ 70వ దశకంలో ఒరిజినల్ కెఫే రేస్ మోటార్‌సైకిళ్లలో ఈ తరహా సైలెన్సర్లను ఉపయోగించింది. ఆ తర్వాత ఇదే మొదటిసారి.

హ్యార్లీ 'రెవల్యూషన్ ఎక్స్' అని పిలిచే లిక్విడ్ కూల్డ్ వి-ట్విన్ ఇంజన్‌ను ఈ బైక్‌లో ఉపయోగించారు. ఈ ఇంజన్ 6-స్పీడ్ ట్రాన్సిమిషన్‌తో అనుసంధానం చేయబడి ఉంటాయి. రెగ్యులర్ హెచ్‌డి బైక్‌ల మాదిరిగానే ఇది కూడా బెల్ట్ డ్రైవ్ సిస్టమ్‌తోనే లభ్యం కానుంది.

దూర ప్రయాణాలకు (లీజర్ బైకింగ్, టూరింగ్ బైకింగ్ మొదలైన వాటికి) అనువుగా ఉండేలా ఈ బైక్‌ను తయారు చేశారు. ఇదంతా ఒక ఎత్తయితే, కస్టమర్లు ఈ బైక్‌లను తమకు నచ్చిన విధంగా అఫీషియల్ యాక్ససరీస్‌తో కస్టమైజ్ చేసుకోవటం మరో ప్రత్యేకత.

భారత్‌లో ఈ బైక్‌ ధరను తక్కువగా ఉంచేందుకు గాను, హర్యానాలోని బవాల్‌లో అసెంబ్లింగ్ కేంద్రంలో ఈ స్ట్రీట్ 750 మోడల్‌ను అసెంబుల్ చేయనున్నారు. ఇక్కడ అసెంబిల్ చేసిన వాటిని పొరుగు దేశాలకు కూడా ఎగుమతి చేయనున్నారు.