పెద్ద ఇంజన్‌తో రానున్న హీరో ఇంపల్స్ మోటార్‌సైకిల్

హీరో మోటోకార్ప్ తమ భవిష్యత్ ప్రణాళికలో భాగంగా, సరికొత్త ఉత్పత్తులను మార్కెట్లో ప్రవేశపెట్టనుంది. ఇప్పటి వరకు హోండా సాంకేతిక పరిజ్ఞానం సాయంతో ఇంజన్లు తయారు చేస్తూ వచ్చిన హీరో, ఇకపై ఇతర సాంకేతిక సంస్థలతో కలిసి సరికొత్త ఇంజన్లను అభివృద్ధి చేయనుంది.

అందులో కొత్త మెరుగైన 100సీసీ రేంజ్ ఇంజన్లతో పాటుగా 250సీసీ ఇంజన్లు కూడా ఉండనున్నాయి. అందులో మరింత మెరుగైన ఇంజన్‌ను ఒకదానిని కొత్త ఇంపల్స్ బైక్‌లో ఉపయోగించి మార్కెట్లో ప్రీమియం బైక్‌గా పునఃప్రవేశపెట్టనున్నారు.

అయితే, హీరో మోటోకార్ప్ నుంచి సరికొత్త ఉత్పత్తులను పొందాలంటే మరికొద్ది నెలలు వేచి ఉండాల్సిందే. వచ్చే ఏడాది ఫిబ్రవరి నెలలో జరగనున్న 2014 ఢిల్లీ ఆటో ఎక్స్‌పో హోండా ఈ కొత్త ఉత్పత్తులను ఆవిష్కరించే అవకాశం ఉంది.

హీరో మోటోకార్ప్ మేనేజింగ్ డైరెక్టర్, సీఈఓ పవన్ ముంజాల్ ఓ ఆంగ్లపత్రికకు ఇచ్చిన ఇంటర్వ్యూలో మాట్లాడుతూ.. భారత్‌లోనే కాకుండా విదేశాల్లో కూడా డిమాండ్ ఉండే ప్రీమియం బైక్‌లను విడుదల చేసేందుకు సన్నాహాలు చేస్తున్నామని, అందులో కొత్త ఇంపల్స్ కూడా ఉంటుందని వివరించారు.

పెద్దతో ఇంజన్‌తో అభివృద్ధి చేస్తున్న కొత్త హీరో ఇంపల్స్‌ను 2014లో పునఃప్రవేశపెడతామని, పవర్‌ఫుల్ ఇంజన్‌తో పాటుగా ఈ బైక్‌ను కూడా రీడిజైన్ చేస్తామని ఆయన చెప్పారు. ఈ బైక్ రీడిజైనింగ్ పనిలో అమెరికాకు చెందిన ఎరిక్ బ్యూయెల్ రేసింగ్ (ఈబిఆర్) కీలక పాత్ర పోషిస్తోంది.