దక్షిణ భారతదేశంలో మరో కొత్త ఫ్యాక్టరీ: హీరో మోటోకార్ప్

దేశపు అగ్రగామి ద్విచక్ర వాహన తయారీ సంస్థ హీరో మోటోకార్ప్ తమ 6వ ప్లాంట్‌ను ఏర్పాటు చేసేందుకు సన్నాహాలు చేస్తోంది. ఈ కొత్త ప్లాంట్‌ను దక్షిణ భారతదేశంలో ఏర్పాటు చేయాలని కంపెనీ యోచిస్తోంది. దక్షిణ భారతదేశ మార్కెట్ అవసరాలను తీర్చడమే లక్ష్యంగా ఆ ప్రాంతంలో ఆరవ ప్లాంట్‌ను ఏర్పాటు చేయాలనుకుంటున్నామని హీరో మోటోకార్ప్ మేనేజింగ్ డైరెక్టర్, సీఈఓ పవన్ ముంజాల్ తెలిపారు.

ఇప్పటికే ఈ ప్లాంట్ ఏర్పాటుకు కావల్సిన స్థలం కోసం అన్వేషిస్తున్నామని ఆయన తెలిపారు. అయితే, ఈ కొత్త ప్లాంట్ పనులను ఎప్పుడు ప్రారంభించనున్నారనే విషయాన్ని మాత్రం ఆయన వెల్లడించలేదు. ప్రస్తుతం హీరో మోటోకార్ప్‌కు ఉత్తరాఖండ్‌లోని హరిద్వార్, హర్యానాలోని గుర్గావ్, దారుహెరల్లో మూడు ఉత్పత్తి కేంద్రాలున్నాయి. ఈ ప్లాంట్ల నుంచి సాలీనా 69 లక్షల వాహనాలు ఉత్పత్తి అవుతాయి.

మరోవైపు హీరో మోటోకార్ప్ గుజరాత్‌లోని హలోల్‌లో వద్ద రూ.1,100 కోట్ల పెట్టుబడులతో తమ ఐదవ ప్లాంట్‌ను ఏర్పాటు చేస్తోంది. సాలీనా 18 లక్షల యూనిట్ల ఉత్పత్తి సామర్థ్యం కలిగిన ఈ ప్లాంట్ వచ్చే ఆర్థిక సంవత్సరం నాటికి అందుబాటులోకి రానుంది. కాగా, తాము దక్షిణ భారతంలో ఏర్పాటు చేయనున్న ఆరవ ప్లాంట్ కూడా అందుబాటులోకి వస్తే మొత్తం కంపెనీ వార్షిక ఉత్పత్తి సామర్థ్యం 1.2 కోట్ల యూనిట్లకు పెరుగుతుందని ముంజాల్ తెలిపారు.