బ్రెజిల్ మార్కెట్‌పై హీరో కన్నేసిన హీరో మోటోకార్ప్

భారతదేశపు అతిపెద్ద ద్విచక్ర వాహన తయారీ సంస్థ హీరో మోటోకార్ప్ విదేశీ విస్తరణలో భాగంగా బ్రెజిల్ మార్కెట్‌పై కన్నేసింది. బ్రెజిల్‌‌లో ద్విచక్ర వాహన మార్కెట్ శరవేగంగా వృద్ధి చెందుతుండటంతో హీరో మోటోకార్ప్ ఆ మార్కెట్లో అడుగుపెట్టాలని భావిస్తోంది.

రానున్న 2016 నాటికి బ్రెజిల్ మార్కెట్లోకి ప్రవేశించి, వీలైనం తక్కువ కాలంలో తన స్థానాన్ని పటిష్ఠం చేసుకోవాలని కంపెనీ యోచిస్తోంది. ఇందులో భాగంగానే, కొలంబియాలో 7 కోట్ల డాలర్లతో కొత్త ఉత్పత్తి కేంద్రాన్ని హీరో మోటోకార్ప్ ఏర్పాటు చేయనుంది.

2016లో జరిగే ఒలింపిక్స్ నాటికి బ్రెజిల్ మార్కెట్లోకి ప్రవేశించాలనే ఆలోచనతో ఉన్నామని, ఈ మార్కెట్‌కు తగిన విధంగా ఇంజన్లను కూడా అభివృద్ధి చేస్తున్నామని అని హీరో మోటోకార్ప్ మేనేజింగ్ డైరెక్టర్, సీఈఓ పవన్ ముంజాల్ వెల్లడించారు.

ప్రస్తుతం భారత్‌లో వినియోగిస్తున్న ఇంజన్లు (పూర్తి పెట్రోల్‌తో నడిచేవి) ఇక్కడి మార్కెట్‌కు తగిన విధంగా ఉండవు కాబట్టి, ఆ మార్కెట్ కోసం ఇంజన్లను ప్రత్యేకంగా అభివృద్ధిచేయాల్సిన అవసరం ఉంటుంది. ప్రారంభంలో భాగంగా, బ్రెజిల్ మార్కెట్ కోసం ద్విచక్ర వాహనాలను భారత్ నుంచి దిగుమతి చేసుకోవటం కానీ లేదా వాటిని పూర్తిగా కొలంబియా ప్లాంట్‌లో ఉత్పత్తి చేయడం గానీ చేస్తామని ఆయన చెప్పారు.