సల్మాన్ ఖాన్ కోసం అద్భుతమైన హ్యాండ్-క్రాఫ్టెడ్ సుజుకి జిఎస్ఎక్స్-ఆర్1000జెడ్

సుజుకి బైక్ యజమానుల కోసం ఉద్దేశించిన 'సుజుకి బైకింగ్ లార్డ్స్' అనే ప్రత్యేకమైన సూపర్‌బైక్ గ్రూప్ ప్రారంభోత్సవం సందర్భంగా, సుజుకి మోటార్‌సైకిల్ ఇండియా లిమిటెడ్ ఈ లిమిటెడ్ ఎడిషన్ 'సుజుకి జిఎస్ఎక్స్-ఆర్1000జెడ్' బైక్‌ను సల్మాన్ ఖాన్‌కు కానుకగా ఇచ్చింది.

ఈ స్పెషల్ ఎడిషన్ బైక్‌ను రైడ్ చేసిన అనంతరం సల్మాన్ ఖాన్ మాట్లాడుతూ.. సుజుకి సూపర్‌బైక్స్ అంటేనే టెక్నాలజీ, పవర్, పెర్ఫామెన్స్, రైడ్ క్వాలిటీ మరియు హ్యాండ్లింగ్ విషయాలకు పెట్టింది పేరని, ఈ ఎక్స్‌క్లూజివ్ జిఎస్ఎక్స్-ఆర్1000జెడ్ బైక్ సుజుకి సూపర్‌బైక్స్ కిరీటంలో ఓ వజ్రం లాంటిదని అన్నారు.

ఇలాంటి ఓ బైక్‌ను కలిగి ఉండటం బైకర్లు చేసుకున్న అదృష్టమని, ఈ బైక్‌‌ను రైడ్ చేయటం చాలా థ్రిల్లింగ్ ఉందని, భవిష్యత్తులో ఈ స్పెషల్ ఎడిషన్ సూపర్‌బైక్‌పై అనేక లాంగ్ రైడ్‌లు వెళ్లేందుకు ప్లాన్ చేస్తానని సల్మాన్ ఖాన్ చెప్పుకొచ్చాడు.

ఈ సందర్భంగా, సుజుకి మోటార్‌సైకిల్ ఇండియా లిమిటెడ్ ఎగ్జిక్యూటివ్ వైస్ ప్రెసిడెంట్ అతుల్ గుప్తా మాట్లాడుతూ.. సల్మాన్ మరియు జిఎస్ఎక్స్-ఆర్1000జెడ్ ఒకరితో ఒకటి సరిగ్గా సరిపోతాయని, సల్మాన్ ఖాన్ సినీ పరిశ్రమలో సూపర్‌స్టార్ అయితే, సూపర్‌బైక్ సెగ్మెంట్లో జిఎస్ఎక్స్-ఆర్1000జెడ్ సూపర్‌స్టార్ అని ఆయన అన్నారు.

సుజుకి జిఎస్ఎక్స్-ఆర్1000జెడ్ బైక్ ఈ సెగ్మెంట్లోని ఇతర బైక్‌లో పోల్చడానికి సరిపోదని, చేతుల్తో తయారు చేసిన ఈ బైక్ అత్యంత విశిష్టమైనదని ఆయన తెలిపారు. భారత్‌లో ఇప్పటి వరకు ఇలాంటి బైక్ ఇదొక్కటేనని, ఈ బైక్‌పై సల్మాన్ ఖాన్ మర్చిపోలేని రైడ్‌లను చేయాలని కోరుకుంటున్నానని అతుల్ గుప్తా చెప్పారు.