ఆటో ఎక్స్‌పో 2014లో టెర్రా ఎలక్ట్రిక్ స్కూటర్, త్రీవీలర్స్

టెర్రా మోటార్స్ గడచిన సంవత్సరం జులై నెలలో జపానా రాజధాని టోక్యో నగరంలో 'టెర్రా ఏ4000ఐ' (Terra A4000i) అనే ఓ అధునాతన ఎలక్ట్రిక్ స్కూటర్‌ను విడుదల చేయనుంది. ఈ స్కూటర్‌ను భారత మార్కెట్లో కూడా విడుదల చేసే అవకాశం ఉంది.

టెర్రా ఏ4000ఐ ఎలక్ట్రిక్ స్కూటర్‌ను ఐఫోన్ సాయంతో కనెక్ట్ చేసుకోవచ్చు. ఇన్‌స్ట్రుమెంట్ కన్సోల్‌లో ఐఫోన్‌ను ఫిక్స్ చేయటం ద్వారా బ్యాటరీ స్టేటస్, బ్యాటరీ ఖర్చయ్యే రేటు, ప్రయాణించే వేగం, మిగిలి ఉన్న బ్యాటరీతో ఎంత దూరం ప్రయాణించవచ్చు వంటి అనేక సాంకేతిక వివరాలను ఐఫోన్ సాయంతో తెలుసుకోవచ్చు.

టెర్రా ఏ4000ఐ ఎలక్ట్రిక్ స్కూటర్ ఇన్‌స్ట్రుమెంట్ ప్యానెల్‌లో అమర్చిన ఐఫోన్ జిపిఎస్ నావిగేటర్ మాదిరిగా కూడా పనిచేసి, దిశానిర్ధేశం చేస్తుంది. ప్రస్తుతానికి ఈ స్కూటర్ ఐఫోన్లను మాత్రమే సపోర్ట్ చేస్తుంది. అయితే, త్వరలోనే అన్ని రకాల స్మార్ట్‌ఫోన్లతో పనిచేసేలా ఈ ఎలక్ట్రిక్ స్కూటర్‌ను అప్‌గ్రేడ్ చేయనున్నట్లు కంపెనీ పేర్కొంది.

టెర్రా ఏ4000ఐ ఎలక్ట్రిక్ స్కూటర్‌ 48 వోల్ట్ లిథియం అయాన్ బ్యాటరీ సాయంతో నడుస్తుంది. ఈ బ్యాటరీ జీవిత కాలం 50,000 కి.మీ. ఇది కేవలం 4.5 గంటల సమయంలోనే పూర్తిగా చార్జ్ అవుతుంది. పూర్తి చార్జ్‌పై 65 కి.మీ. దూరం ప్రయాణించవచ్చు.

టెర్రా ఏ4000ఐ గరిష్ట వేగం గంటకు 65 కి.మీ., సగటు వేగం గంటకు 48 కి.మీ. ఈ స్కూటర్‌కు ముందు, వెనుక వైపు డిస్క్ బ్రేక్‌లను అమర్చారు. దీని మొత్తం బరువు 118 కేజీలు (బ్యాటరీ బరువు 16 కేజీలు).

భారత మార్కెట్లో ఈ స్కూటర్ ధర సుమారు రూ.2 లక్షల వరకు ఉండొచ్చని అంచనా. లేటెస్ట్ అప్‌డేట్స్ కోసం తెలుగు డ్రైవ్‌స్పార్క్‌ను గమనిస్తూ ఉండండి.