ట్రైయంప్ స్క్రాంబ్లర్ బైక్‌ను డిజైన్ చేసిన రాజ్‌పుతాన కస్టమ్స్

ఇటీవల హ్యార్లీ డేవిడ్‌న్ స్ట్రీట్ 750 మోటార్‌సైకిల్‌ని కస్టమైజ్ చేసిన పూనేకి చెందిన పాపులర్ బైక్ కస్టమైజేషన్ కంపెనీ రాజ్‌పుతాన తాజాగా మరో లగ్జరీ మోటార్‌సైకిల్‌ను కస్టమైజ్ చేసింది. ట్రైయింప్ అందిస్తున్న ఓ పాపులర్ మోడల్‌ను ఆధారంగా చేసుకొని రాజ్‌పుతాన ఓ స్క్రాంబ్లర్ లుక్ మోటార్‌సైకిల్‌ను కస్టమైజ్ చేసింది.

గడచిన వారం గోవాలో జరిగిన 2015 ఇండియా బైక్ వీక్ కార్యక్రమంలో ట్రైయంప్ ఈ కస్టమైజ్డ్ స్క్రాంబ్లర్ మోటార్‌సైకిల్‌ను ప్రదర్శనకు ఉంచింది. ట్రైయంప్ అందిస్తున్న పాపులర్ బోన్‌విల్లే మోడల్‌ను ఆధారంగా చేసుకొని రాజ్‌పుతాన కస్టమ్ మోటార్‌సైకిల్ కంపెనీ ఈ మోడల్‌ను డిజైన్ చేసింది.

ఈ కస్టమైజ్డ్ ట్రైయంప్ స్క్రాంబ్లర్‌ను మ్యాట్ గ్రే అండ్ బ్లాక్ కలర్‌లో పెయింట్ చేశారు. ఈ కస్టమైజ్డ్ మోటార్‌సైకిల్‌ను డిజైన్ చేయటానికి రాజ్‌పుతానకు దాదాపు రెండు నెలల సమయం పట్టిందట. భారతదేశంలో ట్రైయంప్ తొలి వార్షికోత్సవాన్ని పురస్కరించుకొని ఈ బైక్‌ని డిజైన్ చేసినట్లు కంపెనీ తెలిపింది.

హెడ్‌లైట్స్, హ్యాండిల్ బార్, ఎగ్జాస్ట్ పైప్స్, టెయిల్ ల్యాంప్స్ వంటి ప్రతి అంశంలోను ప్రత్యేక జాగ్రత్తలు తీసుకున్నారు. కాగా.. ఇంజన్ పరంగా మాత్రం ఇందులో ఎలాంటి మార్పులు లేవు. ఇందులోని 865సీసీ, పారలల్-ట్విన్, ఎయిర్-కూల్డ్ ఇంజన్ గరిష్టంగా 61 పిఎస్‌ల శక్తిని, 61 ఎన్ఎమ్‌ల టార్క్‌ని ఉత్పత్తి చేస్తుంది. ఈ ఇంజన్ 5-స్పీడ్ గేర్‌బాక్స్‌తో కనెక్ట్ చేయబడి ఉంటుంది.