టీవీఎస్ నుంచి స్కూటీ జెస్ట్, విక్టర్ ఫేస్‌లిఫ్ట్, అపాచే ఫేస్‌లిఫ్ట్

టీవీఎస్ స్కూటీ జెస్ట్

గడచిన ఫిబ్రవరిలో జరిగిన 2014 ఆటో ఎక్స్‌పోలో టీవీఎస్ తమ 110సీసీ మోడల్‌ స్కూటర్ 'టీవీఎస్ స్కూటీ జెస్ట్'ను ఆవిష్కరించింది. ప్రస్తుతం కంపెనీ అందిస్తున్న స్కూటీ పెప్‌కు ఫేస్‌లిఫ్ట్ వెర్షనే ఈ కొత్త స్కూటీ జెస్ట్. స్టయిలిష్ బూమరాంగ్ షేప్డ్ ఎల్ఈడి ఇండికేటర్ ల్యాంప్స్, కొత్త రియర్ స్టాఫ్ ల్యాంప్ డిజైన్, కొత్త గ్రాబ్ హ్యాండిల్ బార్స్ వంటి డిజైన్ మార్పులను ఇందులో గమనించవచ్చు. స్కూటీ పెప్‌తో పోల్చుకుంటే, జెస్ట్‌లో ఈ కాస్మోటిక్ మార్పులతో పాటుగా మరింత విశాలమైన సీట్, పెద్ద ఫుట్ బోర్డ్, 19 లీటర్ అండర్ సీట్ స్టోరేజ్, హెవీ బాడీ వంటి మార్పులు కూడా ఉన్నాయి.

టీవీఎస్ స్కూటీ జెస్ట్

టీవీఎస్ స్కూటీ జెస్ట్ స్కూటర్‌లో 109.7సీసీ, ఎయిర్-కూల్డ్, సింగిల్ సిలిండర్ ఇంజన్‌ను ఉపయోగించారు (వెగో స్కూటర్లో ఉపయోగించిన ఇంజన్). ఈ ఇంజన్ గరిష్టంగా 7500 ఆర్‌పిఎమ్ వద్ద 8 హెచ్‌పిల శక్తిని, 5500 ఆర్‌పిఎమ్ వద్ద 8 ఎన్ఎమ్‌ల టార్క్‌ను ఈ ఇంజన్ సివిటి (కంటిన్యూస్లీ వేరియబల్ ట్రాన్సిమిషన్) గేర్‌బాక్స్‌తో అనుసంధానం చేయబడి ఉంటుంది. వాస్తవానికి, టీవీఎస్ వెగో ఛాస్సిస్, వీల్‌బేస్, టెలిస్కోపిక్ ఫోర్క్స్‌లనే జెస్ట్ స్కూటర్‌లో కూడా ఉపయోగించారు. ఇది లీటరు పెట్రోల్‌కు గరిష్టంగా 62 కిలోమీటర్ల మైలేజీనిస్తుందని కంపెనీ పేర్కొంది. అండర్ సీట్ లైట్, మొబైల్ ఫోన్ చార్జింగ్ పాయింట్ వంటి పలు విశిష్టమైన ఫీచర్లు ఈ స్కూటర్ సొంతం.

టీవీఎస్ విక్టర్ రీలాంచ్

టీవీఎస్‌ నుంచి గతంలో అత్యంత ప్రాచుర్యం పొందిన పాపులర్ బైక్ 'టీవీఎస్ విక్టర్'ను తిరిగి మార్కెట్లో విడుదల చేయాలని కంపెనీ యోచిస్తోంది. ప్రధానంగా గ్రామీణ, పట్టణ మార్కెట్లలోని కస్టమర్లును టార్గెట్ చేసుకొని అధునాతన ఇంజన్, ఆకట్టుకునే డిజైన్, మెరుగైన మైలేజ్, సరసమైన ధర వంటి ఫీచర్లతో కంపెనీ ఈ మోటార్‌సైకిల్‌ను విడుదల చేయవచ్చని తెలుస్తోంది.

టీవీఎస్ అపాచే ఫేస్‌లిఫ్ట్

టీవీఎస్ అందిస్తున్న అపాచే బ్రాండ్‌లో కంపెనీ మరో కొత్త పవర్‌ఫుల్ (200-250సీసీ) వేరియంట్‌లను అభివృద్ధి చేస్తున్నట్లు సమచారం. 2015లో అపాచే 200సీసీ బైక్‌ను దాని తర్వాత అపాచే 250సీసీ బైక్‌ను విడుదల చేయాలని కంపెనీ యోచిస్తోంది. ప్రస్తుతం అపాచే బ్రాండ్‌లో 160సీసీ మరియు 180సీసీ మోడళ్లు అందుబాటులో ఉ్ననాయి. గతంలో టీవీఎస్ ఆర్ అండ్ డి హెడ్ వినయ్ హెర్నే ఓ మ్యాగజైన్‌కు ఇచ్చిన ఇంటర్వ్యూలో వ్యాఖ్యానిస్తూ.. 2015లో కొత్త రేంజ్ అపాచే‌లను విడుదల చేస్తామని వెల్లడించారు.

టీవీఎస్-బిఎమ్‌డబ్ల్యూ లగ్జరీ బైక్

ఇకపోతే.. టీవీఎస్ మోటార్ కంపెనీ, బిఎమ్‌డబ్ల్యూ మోటారాడ్ సంస్థల మధ్య కుదిరిన ఒప్పందంలో భాగంగా, బిఎమ్‌డబ్ల్యూ కోసం తొలి ద్విచక్ర వాహనాన్ని 2015 ద్వితీయార్థం నాటికి అందుబాటులోకి తీసుకువస్తామని టీవీఎస్ మోటార్ కంపెనీ చైర్మన్ వేణు శ్రీనివాసన్ ఇటీవలే తెలిపారు. గడచిన సంవత్సరం ఏప్రిల్ నెలలో ఈ మేరకు ఇరు కంపెనీల మధ్య ఓ ఒప్పందం కుదిరిన సంగతి తెలిసినదే. ఈ ఒప్పందం ప్రకారం, టీవీఎస్ రూ.150 కోట్ల పెట్టుబడిని వెచ్చిస్తుండగా, మోటార్‌సైకిళ్ల అభివృద్ధి, టెస్టింగ్ ఖర్చులను బిఎమ్‌డబ్ల్యూ భరించనుంది.