Click it and Unblock the Notifications
హోండా యాక్టివాకు పోటీగా యమహా యునిసెక్స్ స్కూటర్
మార్కెట్లో స్త్రీ, పురుషులు ఇద్దరికీ సూట్ అయ్యే స్కూటర్ అంటే టక్కున గుర్తుకు వచ్చేది హోండా యాక్టివానే. ఇప్పుడు ఆ యాక్టివా సవాల్ చేసేందుకు మరో కొత్త స్కూటర్ మార్కెట్లోకి రాబోతుంది. జపనీస్ టూవీలర్ కంపెనీ యమహా స్త్రీ, పురుషుల కోసం ఓ సరికొత్త స్కూటర్ను తయారు చేస్తోంది.
ప్రస్తుతం దేశీయ ద్విచక్ర వాహన మార్కెట్లో స్కూటర్ల విభాగం శరవేగంగా వృద్ధి చెందుతున్న సంగతి తెలిసినదే. రే సిరీస్ స్కూటర్ల విడుదలతో ఈ విభాగంలో 5 శాతం మార్కెట్ వాటా దక్కించుకున్న యమహా, ఈ మార్కెట్ మరింత పెంచుకునే దిశగా ప్రణాళికలు సిద్దం చేస్తోంది. ఇందులో భాగంగానే, హోండా యాక్టివాకు పోటీగా ఓ కొత్త స్కూటర్ను ప్రవేశపెట్టనున్న కంపెనీ అధికారి ఒకరు వెల్లడించారు.
యమహా మోటార్ ఇండియా మేనేజింగ్ డైరెక్టర్ అసానో మసాకి ఓ ఆంగ్ల పత్రికతో మాట్లాడుతూ.. తమ ప్రీమియం మోటార్సైకిళ్లతో భారతీయ యువతలో పటిష్టమైన బ్రాండ్ను సృష్టించినప్పటికీ, 90 శాతం ద్విచక్ర వాహనాలను రోజూవారీ ప్రయాణాల కోసం వినియోగించబడుతున్నాయని, ఈ నేపథ్యంలో స్త్రీ పురుషులు ఇరువురికి సరిపోయే విధంగా ఉండే ఫ్యామిలీ స్కూటర్లకు మంచి డిమాండ్ ఉంటుందని ఆయన అన్నారు.
ఈ కొత్త స్కూటర్ను ప్రవేశపెట్టడం ద్వారా తమ కంపెనీ అమ్మకాలు మరింత జోరందుకునే ఆస్కారం ఉందని మసాకి చెప్పారు. అయితే, ఈ స్కూటర్ విడుదల సమయాన్ని మరియు దానికి సంబంధించిన మరిన్ని వివరాలను మాత్రం ఆయన వెల్లడించలేదు. వచ్చే ఏడాది ఫిబ్రవరిలో జరగనున్న 2014 ఢిల్లీ ఆటో ఎక్స్పోలో యమహా తమ కొత్త స్కూటర్ను ప్రదర్శించనుంది.
Continue with Google