పోలీసుల కారుగా మారనున్న ప్రజల కారు!!

ప్రస్తుతం ఇది ప్రయోగ దశలో ఉంది. ఇది గనుక విజయవంతమైతే, త్వరలోనే ప్రజల కారు కాస్తా పోలీసుల కారుగా మారిపోనుంది. సాధారణంగా ముంబై నగర వీధుల్లో పెట్రోలింగ్ చేయడానికి టూ-వీలర్‌కు బదులు టాటా నానో కారును వాడినట్లయితే చాలానే ప్రయోజనాలున్నాయి. మోటార్‌సైకిల్‌పై అయితే, ఒక్కరు లేదా ఇద్దరు పోలీసు అధికారులు మాత్రమే ప్రయాణించే వీలుంది.

కానీ అదే టాటా నానో కారులో అయితే, నలుగురు పోలీసుల వరకూ పెట్రోలింగ్‌లో పాల్గొనే ఆస్కారం ఉంటుంది. ఈ కారులో సుమారు గంటకు వందకు పైగా కి.మీ. వేగంతో ప్రయాణించవచ్చు. పైపెచ్చు ఎటువంటి వాతావరణ పరిస్థితుల్లోనైనా ఈ కారులో పోలీసు అధికారుల నగర సంచారం చేస్తూ, నగరానికి మరియు నగర ప్రజలకు మెరుగైన భద్రత కల్పించడానికి వీలుంటుంది.