గాలితో నడిచే కారును విజయవంతంగా టెస్ట్ చేసిన టాటా

ప్రపంచంలోనే అత్యంత చవక ధరకే కారును సృష్టించడమే కాకుండా, దానిని విజయవంతంగా మార్కెట్లోకి తీసుకువచ్చిన టాటా మోటార్స్ గాలితో నడిచే కారును అభివృద్ధి చేస్తున్నట్లు తెలుగు డ్రైవ్ స్పార్క్ గతంలో ఓ కథనంలో ప్రచురించిన సంగతి తెలిసిందే. టాటా మోటార్స్ అభివృద్ధి చేసిన ఈ గాలితో నడిచే కారును ప్రయోగాత్మకంగా టెస్టింగ్ చేశామని కంపెనీ ఓ ప్రకటనలో పేర్కొంది.

మోటార్ డెవలప్‌మెంట్ ఇంటర్నేషనల్ (లక్సెంబర్గ్) నుండి టాటా మోటార్స్ లైసెన్స్ పొంది అభివృద్ధి చేస్తున్న ఎయిర్-పవర్డ్ కారు అభివృద్ధిలో ఇది మొదటి దశ. 2007లో ఈ రెండు కంపెనీలు ఓ ఒప్పందాన్ని కుదుర్చుకున్నాయి. ఈ ఒప్పందంలో భాగంగా, ఎమ్‌డిఐ టెక్నాలజీని ఉపయోగించి కంప్రెస్డ్-ఎయిర్ ద్వారా నడిచే కార్లను టాటా మోటార్స్ ఉత్పత్తి చేసి, ఇండియన్ మార్కెట్లో విక్రయిస్తుంది.

టాటా మోటార్స్ ఇప్పటికే నీటితో నడిచే ఓ కారును కూడా అభివృద్ధి చేయడంలో బిజీగా ఉంది. టాటా మోటార్స్ అభివృద్ధి చేసిన ఈ ఎయిర్-పవర్డ్ కారులో ఓ ఎయిర్‌ ట్యాంక్ అమర్చబడి ఉంటుంది. ఒక పూర్తి ఎయిర్‌ట్యాంక్‌తో సుమారు 300 కి.మీ. ప్రయాణించవచ్చు. తక్కువు బరువుండేలా ఈ కారును డిజైన్ చేయటం వలన ఎక్కువ దూరం ప్రయాణించేదుకు వీలవుతుంది.