మారుతి జిప్సీలో ఫేస్‌లిఫ్ట్ వెర్షన్: కొత్త డీజిల్, పెట్రోల్ ఇంజన్స్!

మారుతి సుజుకి జిప్సీని కొనుగోలు చేసేవాళ్లలో ఎక్కువగా ఆఫ్-రోడ్ డ్రైవర్లు, ఆర్మీ బలగాలు మాత్రమే ఉన్నారు. ఆన్-రోడ్ ఉపయోగం కోసం ఈ ఎస్‌యూవీని కొనుగోలు చేసే రెగ్యులర్ కస్టమర్లు నామమాత్రమే. ఇందుకు ప్రధాన కారణం ఇందులో డీజిల్ వెర్షన్ అందుబాటులో లేకపోవటం, అలాగే దీని డిజైన్ పాతదిగా అనిపించడం.

ఈ నేపథ్యంలో, మారుతి జిప్సీ ఎస్‌యూవీ మోడ్రన్ లుక్ కల్పించేందుకు కంపెనీ నడుం బిగించింది. అంతేకాకుండా, ఈ మోడల్ అమ్మకాలను పెంచుకునేందుకు ఇంజన్ ఆప్షన్స్ కూడా పెంచనుంది. అలాగే ఇందులో ఓ డీజిల్ వెర్షన్ కూడా ప్రవేశపెట్టనున్నట్లు సమాచారం.

ఆరంభంలో మారుతి జిప్సీలో 1.0 లీటర్ పెట్రోల్ ఇంజన్‌ను ఉపయోగించే వారు. ఆ తర్వాత దానిని 1.3 లీటర్ జి13 పెట్రోల్ ఇంజన్‌తో రీప్లేస్ చేశారు. జిప్సీ ఇప్పటికీ ఇదే ఇంజన్‌తో లభిస్తుంది. అంతేకాదు, ఈ ఇంజన్‌ను కేవలం మారుతి జిప్సీలో మాత్రమే ఉపయోగిస్తున్నారు.

ప్రస్తుతం మారుతి ఈకోలో ఉపయోగిస్తున్న జి12బి ఇంజన్‌ను కొత్త జిప్సీలో ఉపయోగించేందుకు మారుతి సన్నాహాలు చేస్తుంది. ఈ ఇంజన్ మరింత సమర్థంగా ఉండటమే కాకుండా మెరుగైన మైలేజీని కూడా ఆఫర్ చేస్తుంది.

డీజిల్ వెర్షన్ జిప్సీ విషయానికి వస్తే, ఇందులో 1.3 లీటర్ మల్టీ జెట్ ఇంజన్‌ను ఉపయోగించే అవకాశం ఉంది. ప్రీమియర్ రియోలో కూడా ఇదే ఇంజన్‌ను ఉపయోగిస్తున్నారు (ఇది రియల్ వీల్ డ్రైవ్‌తో లభిస్తుంది). మారుతి తమ జిప్సీలో ఈ ఇంజన్‌ను ఉపయోగించినట్లయితే, ఇందులో కూడా రియల్ వీల్ డ్రైవ్ కలిగిన వేరియంట్‌ను మనం ఆశించవచ్చు. అదేగనుక జరిగితే, జిప్సీ ఈ సెగ్మెంట్లోని మహీంద్రా థార్, ఫోర్స్ మోటార్స్ గుర్ఖా మోడళ్లకు పోటీగా నిలువనుంది.