సరైన వాహన బీమాను పొందడం ఎలా - చిట్కాలు

మోటారు వాహన చట్టం ప్రకారం, థర్డ్‌పార్టీ బీమాను తప్పనిసరి చేసినప్పటికీ, చాలా వరకూ వాహనాలు బీమా (ఇన్సూరెన్స్) లేకుండానే రహదారులపై సంచరిస్తున్నాయి. సాధారణంగా కొనుగోలుదారులు కొత్తగా వాహనం కొనేటప్పుడు చూపించే ఉత్సాహాన్ని వెహికల్ ఇన్సూరెన్స్ పాలసీని రెన్యువల్ చేసేటప్పుడు చూపించడం లేదు. ఫలితంగా వాహనానికి ఏదైనా ప్రమాదం సంభవించినప్పుడు, అనవసరంగా మరమ్మత్తులకు అయ్యే ఖర్చులను తానే భరిస్తున్నారు.

ఇలా కాకుండా.. మరమ్మత్తులకు అయ్యే ఖర్చులను బీమా కంపెనీ నుండి పొందాలంటే ఒక్కటే మార్గం ఉంది. అది, నమ్మదగిన బీమా కంపెనీ నుండి, సమర్థవంతమైన పాలసీను ఎన్నుకొని ఎప్పటికప్పుడు సదరు పాలసీలను సరైన సమయంలో రెన్యువల్ చేసుకోవటమే. మరి సరైన పాలసీని ఎన్నుకోవడం ఎలాగో ఈ కథనంలో తెలుసుకుందాం..!!

కాంప్రహెన్సివ్‌ పాలసీ:
కేవలం వాహనానికే కాకుండా, వాహన యజమానికి మరియు ఇతరులకు అన్ని విధాల రక్షణ కావాలనుకునే వారు ఈ పాలసీని ఎంచుకోవచ్చు. అగ్ని ప్రమాదం, పేలుళ్లు, భూకంపం, వరదలు వంటి వివిధ ప్రకృతి భీభత్సాల కారణంగా వాహనానికి ఏదైనా నష్టం జరిగితే ఈ పాలసీ సదరు నష్టాన్ని భర్తీ చేయడానికి ఉపయోగపడుతుంది. అంతేకాకుండా... రైలు, రోడ్డు, విమానం, షిప్‌లు వంటి వివిధ రవాణా సాధనాల్లో వాహనాన్ని తరలించేటప్పుడు ఏదైనా నష్టం జరిగినా కూడా ఈ పాలసీ ద్వారా పరిహారాన్ని పొండటానికి వీలుంటుంది.

థర్డ్‌‌పార్టీ లీగల్‌ లయబిలిటీ:
ఈ పాలసీ ప్రమాదం కారణంగా ఇతరులకు జరిగిన నష్టాన్ని మాత్రమే ఇది భర్తీ చేస్తుంది. అంటే, ఏదైనా శాశ్వతగాయం తగిలినా లేదా ప్రమాదంలో వ్యక్తి మరణించినా, వాహనానికి నష్టం జరిగినా పరిహారం అందుతుంది. ఈ పాలసీ వాహన యజమానికి పర్సనల్ యాక్సిడెంట్ పాలసీ తప్పనిసరి చేయబడినది.