టాటా పవర్ అంటే అదే మరి.. కారుతో సహా లిఫ్ట్ పడినా టాటా నెక్సాన్‌కు ఏమీ కాలేదు!

సేఫ్టీ, బిల్డ్ క్వాలిటీ అనే పదాలు వినిపిస్తే వెంటనే మనకు గుర్తుకు వచ్చే పేరు టాటా మోటార్స్. వినియోగదారులు లేదా వారి ఎక్స్‎పీరియన్స్‎లే దేశీయ వాహన తయారీదారుల అతిపెద్ద ప్రకటనలు. ఇంటర్నెట్ మీమ్స్‌లో చూసినట్లుగా ఒక ఫ్యామిలీగా మారిన తర్వాత చాలా మంది మారుతి కార్లను కాదని టాటా వాహనాలను కొనుగోలు చేస్తున్నారు.

టాటా కార్ల బిల్డ్ క్వాలిటీని నిరూపించే అనేక సంఘటనలను ఇప్పటికే చాలా చూశాం. ఇప్పుడు టాటా ప్రముఖ ఉత్పత్తుల్లో ఒకటైన నెక్సాన్ SUV పాల్గొన్న ప్రమాదానికి సంబంధించిన సంఘటనలను కారు యజమాని స్వయంగా సోషల్ మీడియాలో షేర్ చేశారు.

ఇక్కడ ప్రత్యేకంగా చెప్పవలసిన విషయం ఏమిటంటే.. నెక్సాన్ ఏదో ఒక కారునో లేదా ఇతర వాహనాన్నో ఢీకొట్టలేదు. ఒక మల్టీ-లెవెల్ కార్ పార్కింగ్‌లోని లిఫ్ట్ విరిగి కారుపై పడింది. ఆసక్తికరమైన విషయం ఏమిటంటే.. లిఫ్ట్ నెక్సాన్‌పై పడుతున్నప్పుడు దానిపై మరొక కారు కూడా ఉంది.

ఈ ఒక్క సంఘటనతో నెక్సాన్ ఎంత సురక్షితమైంది.. విశ్వసనీయమైన కారు మోడల్ అనేది మరో సారి రుజువైంది. ఇందుకు సంబందించిన వీడియోను ఆ కారు యజమాని సోషల్ మీడియాలో షేర్ చేశారు. టాటా నెక్సాన్ కారు యజమాని అయిన శైల్యా జగ్గి తన నెక్సాన్ కారు బిల్డ్ క్వాలిటీని చూసి ఆశ్చర్యపోయి దానిని ప్రపంచానికి తెలియజేశారు.

మల్టీ-కార్ పార్కింగ్ సెంటర్‌లో తన నెక్సాన్‌పై లిఫ్ట్ పడిన విషయాన్ని శైల్యా జగ్గి సోషల్ మీడియా ప్లాట్‌ఫామ్ అయిన లింక్డ్‌ఇన్‌లో పంచుకుంది. ఇది హర్యానా రిజిస్ట్రేషన్‌లోని కారు కాబట్టి, ఈ సంఘటన ఢిల్లీ NCRలో ఎక్కడో జరిగి ఉండవచ్చని మనం అనుకోవచ్చు.

కారు పార్క్ చేసి వెళ్ళిన తర్వాత శైల్యకు పార్కింగ్ లాట్‌లోని సెక్యూరిటీ నుంచి కాల్ వచ్చింది. వారి నెక్సాన్‌పై లిఫ్ట్ విరిగి పడిందని, దానిపై ఒక సెడాన్ పార్క్ చేసి ఉందని వారు సమాచారం అందించారు. ఇలాంటి వార్త వింటే ఎవరైనా భయపడతారు. ఇక్కడ శైల్య కూడా టెన్షన్ పడి పార్కింగ్ లాట్‌కు చేరుకుంది. కానీ అక్కడ కనిపించిన దృశ్యం ఆశ్చర్యపరిచింది.

ఇంత పెద్ద ప్రమాదం జరిగినప్పటికీ తన నెక్సాన్‌కు పెద్దగా నష్టం జరగలేదని చూడగానే శైల్య ఊపిరి పీల్చుకుంది. ఆమె ఈ కారును ముద్దుగా 'సూసీ' అని పిలుచుకుంటుంది. యజమాని పంచుకున్న చిత్రంలో పార్క్ చేసిన లిఫ్ట్, సెడాన్ నెక్సాన్ రూఫ్‌పై రిలీజ్ తీసుకున్నట్లు మనం చూడొచ్చు.

లిఫ్ట్, కారు బరువు నెక్సాన్‌పై ఉందని స్పష్టంగా తెలుస్తోంది. టైర్లు, సస్పెన్షన్ భారీ బరువుతో కుంచించుకుపోయినట్లు వీడియోలో చూడవచ్చు. ఇంత బరువు వచ్చి పడినా సూసీ అక్కడే నిలబడిందని యజమాని పోస్ట్‌లో పేర్కొంది. కారుకు చిన్నపాటి గాయాలు ఉన్నప్పటికీ, పెద్ద నష్టం ఏమీ జరగలేదు.

కారు బిల్డ్ క్వాలిటీ యజమానిని ఎంతగానో ఆకట్టుకుంది. తన యూజర్ జనరేటెడ్ క్రాష్ టెస్ట్ కంటెంట్‌కు బదులుగా టాటా కావాలంటే లైఫ్ టైం ఫ్రీ సర్వీస్ ఇవ్వవచ్చని నెక్సాన్ యజమాని ఫన్నీగా కామెంట్స్ చేసింది.

ఫ్రీ సర్వీస్ ఆఫర్ ఏమీ రాకపోయినా టాటా నుండి సర్వీస్ టీమ్ తనతో సంప్రదించిందని, SUVని సర్వీస్ సెంటర్‌కు తీసుకెళ్లి పూర్తిగా పరిశీలిస్తారని శైల్యా సోషల్ మీడియా పోస్ట్‌ను అప్‌డేట్ చేసింది. కారు వెలుపల నష్టం లేకపోయినా, లోపల ఏదైనా లోపాలు ఉన్నాయో లేదో తెలుసుకోవడానికి చెకింగ్ తప్పనిసరి.

టాటా నెక్సాన్ యజమానుల నుంచి ప్రశంసలు అందుకోవడం ఇది మొదటిసారి కాదు. ఇంతకు ముందు అనేక పెద్ద ప్రమాదాల నుండి ప్రయాణికులను స్వల్ప గాయాలతో రక్షించిన చరిత్ర నెక్సాన్‌కు ఉంది. గ్లోబల్ NCAP క్రాష్ టెస్ట్‌లో 5 స్టార్ సేఫ్టీ రేటింగ్ పొందిన సబ్ 4 మీటర్ SUV ఇది. పెట్రోల్, డీజిల్, CNG, ఎలక్ట్రిక్ పవర్‌ట్రెయిన్ ఆప్షన్‌లలో ఈ కారు అందుబాటులో ఉంది.

భారతదేశంలో ఈ కారును రూ.8.89 లక్షల నుండి కొనుగోలు చేయవచ్చు. ఇది పెట్రోల్ ఆప్షన్ ప్రారంభ ధర. డీజిల్ వేరియంట్‌ల ధర రూ.9,99,990. నెక్సాన్ EV ధర రూ.12.49 లక్షల నుండి ప్రారంభమవుతుంది. ఇవన్నీ ఎక్స్-షోరూమ్ ధరలు మాత్రమే. ఇటీవలి కాలంలో నెక్సాన్ అమ్మకాల్లో కొద్దిగా తగ్గుదల కనిపించింది. ఇలాంటి 'యూజర్ రివ్యూస్' SUV అమ్మకాలను పెంచడానికి సహాయపడతాయి.