ఆన్-రోడ్ లేదా ఆఫ్-రోడ్ ఛాయిస్ మీదే: హీరో ఇంపల్స్

ఇటు నగర రోడ్లపై, అటు గ్రామీణ ప్రాంత రోడ్లపై సమర్థవంతంగా పరుగులు తీసేలా హీరో ఇంపల్స్ బైక్‌ను రూపొంగించారు. ఇది రోజూవారీ ప్రయాణం కోసం మాత్రమే కాకుండా.. కొండలు, లోయలు, మట్టి రోడ్లపై ఆఫ్-రోడ్ బైకింగ్ కోసం కూడా ఉపయోగపడుతుంది. ప్రస్తుత పండుగ సీజన్‌ను క్యాష్ చేసుకోవాలనే ఉద్దేశ్యంతో హీరో మోటోకార్ప్ తమ ఇంపల్స్ బైక్‌ను అధికారికంగా మార్కెట్‌కు పరిచయం చేసింది.

హీరో ఇంపల్స్ 150సీసీ బైక్ సెగ్మెంట్లో తక్కువ ధరను కలిగి ఉండటమే కాకుండా దీని విశిష్టమైన లుక్ బైక్ ప్రియులను ఇట్టే ఆకట్టుకుంది. ఇందులో నైట్రాక్స్‌ను నింపిన మోనో షాక్‌ రియర్ (వెనుక) సస్పెన్షన్‌, సాధారణ బైక్ కన్నా అధనపు గ్రౌండ్‌ క్లియరెన్స్‌, ముందు వైపు డిస్క్‌ బ్రేక్స్‌ వంటి ఫీచర్లు హీరో ఇంపల్స్ బైక్ సొంతి. ఇది బ్లాక్‌, వైబ్రాంట్ బ్లూ మెటాలిక్‌, స్పోర్ట్స్‌ రెడ్‌, లీఫ్‌ గ్రీన్‌ మెటాలిక్, వైబ్రాంట్‌ ఆరంజ్‌ రంగుల్లో లభ్యం అవుతుంది.

ఈ ఏడాది ఆగస్టు నెలలో హీరో మోటోకార్ప్ తమ లోగో ఆవిష్కరణ సందర్భంగా తొలిసారిగా ఈ బైక్‌ను ప్రదర్శించింది. దీనితో పాటు ఓ 110సీసీ స్కూటర్ హీరో మాస్ట్రోను కూడా అదే రోజున ఆవిష్కరించింది. అయితే ఈ మాస్ట్రో స్కూటర్‌ను ఎప్పుడు దేశీయ మార్కెట్లో విడుదల చేస్తామనే విషయాన్ని మాత్రం కంపెనీ వెల్లడించలేదు. భారత మార్కెట్లో హీరో ఇంపల్స్ ఎక్స్ షోరూమ్, ఢిల్లీ ధర రూ.66,800 గా ఉంది.

త్వరలోనే ఈ బైక్ కోసం వివిధ నగరాల్లో టెస్ట్ రైడ్స్‌ని నిర్వహిస్తామని కంపెనీ వెల్లడించింది. ప్రస్తుతం హీరో మోటోకార్ప్ 150 సీసీ విభాగంలో ఎచీవర్, సిబిజెడ్ ఎక్స్‌ట్రీమ్, హంక్ మోటార్‌సైకిళ్లను అందిస్తోంది. కాగా.. తమ కొత్త హీరో ఇంపల్స్‌ బైక్‌ను ప్రమోట్ చేయడానికి ప్రస్తుతం జరుగుతున్న భారత్-ఇంగ్లాండ్ క్రికెట్ సీరిస్‌ను వేదికగా మలచుకోవాలని హీరో మోటోకార్ప్ యోచిస్తోంది.