అలెర్ట్: హోండా హైనెస్ సిబి350 మోటార్‌సైకిల్ గేర్‌బాక్స్‌లో సమస్యలు, రీకాల్!

భారతదేశంలో నవంబర్ 25, 2020వ తేదీ నుండి డిసెంబర్ 12, 2020వ తేదీ మధ్య కాలంలో తయారు చేసిన హోండా హైనెస్ సిబి350 మోటార్‌సైకిళ్లు ఈ రీకాల్‌కు వర్తిస్తాయని కంపెనీ పేర్కొంది. ఈ మధ్య కాలంలో తయారైన హోండా సిబి350 మోటార్‌సైకిళ్ల గేర్‌బాక్స్‌లో వేరొక ప్రమాణంతో కూడిన విడిభాగాన్ని ఉపయోగించినట్లు కంపెనీ గుర్తించి స్వచ్ఛంద రీకాల్ ప్రకటించింది.

ఈ మోటార్‌సైకిల్‌లోని గేర్‌బాక్స్ యొక్క కౌంటర్ షాఫ్ట్ 4వ గేర్‌లో హోండా వేరే మెటీరియల్ గ్రేడ్ వాడకాన్ని గుర్తించింది, ఇది భవిష్యత్తులో మోటారుసైకిల్ యొక్క పనితీరుపై ప్రతికూల ప్రభావం చూపే అవకాశం ఉందని కంపెనీ పేర్కొంది. అయితే, ఇప్పటి వరకూ ఈ సమస్య గురించి ఎలాంటి ఫిర్యాదులు రాలేదని, తామే రెగ్యులర్ చెక్స్‌లో భాగంగా ఈ విషయాన్ని గుర్తించామని కంపెనీ తెలిపింది.

నవంబర్ 25, 2020వ తేదీ నుండి డిసెంబర్ 12, 2020వ తేదీ మధ్య కాలంలో తయారైన హోండా సిబి350 మోటార్‌సైకిళ్ల యొక్క ప్రస్తుత వారంటీ స్థితితో సంబంధం లేకుండా, ముందుజాగ్రత్త చర్యగా ప్రభావిత భాగాన్ని (గేర్‌బాక్స్‌లో కౌంటర్ షాఫ్ట్ 4వ గేర్‌ను) ఉచితంగా భర్తీ చేస్తామని కంపెనీ ప్రకటించింది. మార్చి 23, 2021వ తేదీ నుండి ఈ రీకాల్ క్యాంపైన్ ప్రారంభమవుతుందని కంపెనీ తెలిపింది.

ఇప్పటికే హోండా హైనెస్ సిబి350 మోటార్‌సైకిళ్లను కొనుగోలు చేసిన కస్టమర్లు, తమ మోటార్‌సైకిల్ ఈ రీకాల్‌కు వర్తిస్తుందో తెలుసుకోవటానికి కంపెనీ తమ వెబ్‌సైట్‌ను అప్‌డేట్ చేసింది.

ఇందుకు కస్టమర్లు చేయాల్సిందల్లా, హోండా బిగ్‌వింగ్ (https://www.hondabigwing.in/) వెబ్‌సైట్‌ను సందర్శించి అందులోని ప్రోడక్ట్ పేజ్‌లో హైనెస్ సిబి350 మోడల్‌ను ఎంచుకోవాలి. ఆ తర్వాత కస్టమర్లు మోటార్‌సైకిల్ యొక్క విన్ నెంబర్‌ను అక్కడ ఇచ్చిన బాక్స్‌లో ఎంటర్ చేయటం ద్వారా తమ మోడల్ ఈ రీకాల్‌కు వర్తిస్తుందో లేదో తెలుసుకోవచ్చు.

ఒకవేళ కస్టమర్ యొక్క మోటార్‌సైకిల్ ఈ రీకాల్‌కు వర్తించినట్లయితే, సదరు కస్టమర్ ఉచిత మరమ్మతు కోసం డీలర్‌షిప్‌ను సందర్శించడానికి ముందుగా ముందస్తు అపాయింట్‌మెంట్ తీసుకోవాల్సి ఉంటుందని కంపెనీ పేర్కొంది. కంపెనీ కూడా, రీకాల్‌కు వర్తించే వాహనాలను గుర్తించి సదరు కస్టమర్లకు తెలియజేయటం జరుగుతుంది.

హోండా టూవీలర్ అందిస్తున్న ఈ 'హైనెస్ సిబి350' మోటార్‌సైకిల్ మార్కెట్లోకి ప్రవేశించిన అతికొద్ది సమయంలోనే 10 వేల మందికి పైగా కస్టమర్లకు చేరువైనట్లు కంపెనీ తెలిపింది. అక్టోబర్ 21, 2020వ తేదీన ఈ మోడల్ డెలివరీలు అధికారికంగా ప్రారంభమయ్యాయి. అప్పటి నుండి ఇప్పటి వరకూ కేవలం 3 నెలలో వ్యవధిలోనే 10,000 యూనిట్ల హైనెస్ సిబి350 మోడళ్లను విక్రయించినట్లు హెచ్ఎమ్ఎస్ఐ పేర్కొంది.

హోండా హైనెస్ సిబి350 డీలక్స్ మరియు డీలక్స్ ప్రో అనే రెండు వేరియంట్లలో లభిస్తుంది. ప్రతి వేరియంట్ కూడా మూడు కలర్ ఆప్షన్లలో అందుబాటులో ఉంటుంది. మార్కెట్లో దీని దరలు రూ.1.86 (ఎక్స్-షోరూమ్) లక్షల నుండి ప్రారంభం అవుతాయి. ఇది ఈ విభాగంలో ప్రధానంగా రాయల్ ఎన్‌ఫీల్డ్ మీటియోర్ 350 మోడల్‌కి పోటీగా నిలుస్తుంది.

ఈ మోటార్‌సైకిల్‌లో 348.36 సిసి సింగిల్ సిలిండర్, ఎయిర్ కూల్డ్ ఇంజన్‌ను ఉపయోగించారు. ఈ ఇంజన్ గరిష్టంగా 20.8 బిహెచ్‌పి పవర్ మరియు 30 ఎన్ఎమ్ టార్క్‌ను ఉత్పత్తి చేస్తుంది. ఇది 5-స్పీడ్ గేర్‌బాక్స్ జతచేయబడి ఉంటుంది. ఇందులో డిస్క్ బ్రేకులు ఉంటాయి, ఇవి డ్యూయల్ ఛానల్ ఏబిఎస్‌ను సపోర్ట్ చేస్తాయి.