కొత్త సంవత్సరంలో 458% పెరిగిన Ola Electric స్కూటర్ సేల్స్: పూర్తి వివరాలు

ఓలా ఎలక్ట్రిక్ 2022 జనవరి గణాంకాలను విడుదల చేయనప్పటికీ, అధికారిక రిజిస్ట్రేషన్ వెబ్‌సైట్ ప్రకారం 1100 యూనిట్లు డెలివరీ చేసినట్లు తెలిసింది. అదే సమయంలో డిసెంబర్ 2021 లో కంపెనీ 240 యూనిట్లను విక్రయించింది. దీన్ని బట్టి చూస్తే కంపెనీ యొక్క అమ్మకాలు డిసెంబర్ 2021 కంటే 2022 జనవరిలో దాదాపు 458 శాతం పెరిగినట్లు తెలిసింది.

ఓలా కంపెనీ మొదటి నెలలో చాలా తక్కువ స్కూటర్లను డెలివరీ చేయగలిగింది. ఈ కారణంగా కంపెనీ చాలా వరకు విమర్శలను ఎదుర్కోవాల్సి వచ్చింది. దీనిపై కంపెనీ సీఈవో మాట్లాడుతూ.. త్వరలో మరిన్ని రిజిస్ట్రేషన్లు జరిగేలా ఆర్టీఓతో కలిసి పనిచేస్తున్నట్లు తెలిపారు.

స్కూటర్ రిజిస్ట్రేషన్లలో పెరుగుదల ఉన్నప్పటికీ, చాలా తక్కువ స్కూటర్లు ఇప్పటికీ డెలివరీ చేయబడుతున్నాయి. తన ఫ్యూచర్‌ ఫ్యాక్టరీలో రోజూ 1000 ఎలక్ట్రిక్ స్కూటర్లు ఉత్పత్తి అవుతున్నాయని, కావున డెలివరీలు కూడా చాలా వేగవంతం అవుతాయని సీఈవో భవిష్ అగర్వాల్ చెప్పారు.

2022 జనవరి నెలలో కంపెనీ మహారాష్ట్రలో 440 యూనిట్లు, కర్ణాటకలో 282 యూనిట్లు, ఢిల్లీలో 108 యూనిట్లు, గుజరాత్‌లో 69 యూనిట్లు, ఒడిశాలో 52 యూనిట్లు, రాజస్థాన్‌లో 38 యూనిట్లు, ఉత్తరప్రదేశ్‌లో 32 యూనిట్లు, తమిళనాడులో 23 యూనిట్లు మరియు హర్యానాలో 19 యూనిట్లు విక్రయించినట్లు తెలిసింది.

అంతే కాకుండా కంపెనీ కేరళలో 7 యూనిట్లు, జార్ఖండ్‌లో 5 యూనిట్లు, పశ్చిమ బెంగాల్‌లో 4 యూనిట్లు మరియు పంజాబ్‌లో 1 యూనిట్ డెలివరీ చేయబడ్డాయి. కంపెనీ ఎలక్ట్రిక్ స్కూటర్ల డెలివరీని ప్రారంభించినప్పటికీ, దేశంలోని చాలా రాష్ట్రాల్లో వాటి డెలివరీలను ఇంకా పూర్తిగా ప్రారంభించలేదు.

ఓలా ఎలక్ట్రిక్ దేశంలోని 1,000 కంటే ఎక్కువ నగరాల నుండి కంపెనీ బుకింగ్‌లను పొందింది. అయితే ఈ అన్ని నగరాల్లోనూ ఇంకా డెలివరీలు ప్రారంభించలేదు. ఇప్పటికి 1100 కోట్లు అంటే దాదాపు 4000 స్కూటర్లను కొనుగోలు చేశామని, అయితే ఇప్పటివరకు 1340 యూనిట్లు మాత్రమే డెలివరీ అయ్యాయని తెలిపింది.

ఓలా కంపెనీ మళ్లీ బుకింగ్ విండోను ప్రారంభించింది, ఓలా ఎలక్ట్రిక్ చివరి చెల్లింపు విండో జనవరి 21 నుండి ప్రారంభించబడింది. మీరు రూ. 20,000 చెల్లించి బుకింగ్ చేసినట్లయితే, మిగిలిన మొత్తం చెల్లించడం ద్వారా మీరు మీ కొనుగోలును నిర్ధారించవచ్చు, ఆ తర్వాత మాత్రమే మీకు S1 ఎలక్ట్రిక్ స్కూటర్ యొక్క డెలివరీ సమాచారం అందించబడుతుంది.

ఓలా కంపెనీ దేశీయ మార్కెట్లో ఎస్1 మరియు ఎస్1 ప్రో అనే రెండు ఎలక్ట్రిక్ స్కూటర్లను విడుదల చేసింది. వీటి ధరలు వరుసగా రూ. 99,999 మరియు రూ. 1,29,999. కంపెనీ ప్రస్తుతం S1 ప్రో వేరియంట్ ఉత్పత్తిపై దృష్టి సారించింది, దీని కారణంగా ఈ సంవత్సరం చివరి నాటికి బేస్ వెర్షన్ ఉత్పత్తిని ప్రారంభించవచ్చు.

ఇప్పుడు S1 స్కూటర్ కొనుగోలు చేసిన కస్టమర్‌లకు కంపెనీ S1 ప్రో వెర్షన్‌ను డెలివరీ చేయబోతోంది. తాజాగా, కంపెనీ సీఈవో ట్వీట్ ద్వారా ఈ సమాచారాన్ని అందించారు. అయితే అయితే దాని అన్ని ఫీచర్ల ప్రయోజనాన్ని పొందడానికి అదనంగా రూ. 30,000 చెల్లించాల్సి ఉంటుంది.

చిప్స్ లేకపోవడంతో కంపెనీ ప్రస్తుతం టాప్ వేరియంట్ ఉత్పత్తిపైనే దృష్టి సారిస్తోందని, అందుకే ముందుగా బుక్ చేసుకున్న కస్టమర్లకు ఈ అప్‌గ్రేడ్‌ను అందిస్తున్నట్లు తెలుస్తోంది. అయితే ఇప్పుడు మీరు S1 వేరియంట్‌ను బుక్ చేసుకుంటే, మీరు 10 నుంచి 12 నెలల వరకు వేచి ఉండాల్సి వస్తుంది.

ఓలా ఎలక్ట్రిక్ స్కూటర్ 3.9 kWh లిథియం-అయాన్ బ్యాటరీ ప్యాక్ ద్వారా శక్తిని పొందుతుంది. దీని ఎలక్ట్రిక్ మోటార్ 8.5 kW గరిష్ట శక్తిని ఉత్పత్తి చేస్తుంది. ఓలా ఎలక్ట్రిక్ స్కూటర్ యొక్క బ్యాటరీని 750W సామర్థ్యం గల పోర్టబుల్ ఛార్జర్‌తో దాదాపు 6:30 గంటల్లో పూర్తిగా ఛార్జ్ చేయవచ్చు. ఇది కాకుండా, ఫాస్ట్ ఛార్జర్‌తో కేవలం 18 నిమిషాల్లో 75% వరకు ఛార్జ్ చేయబడుతుంది.

ఓలా ఈ ఎలక్ట్రిక్ స్కూటర్‌లో అనేక కొత్త మరియు ఆధునిక ఫీచర్లను అందించింది. Ola S1 పూర్తి ఛార్జ్‌పై 121 కిమీల రేంజ్‌ను అందిస్తుంది, అయితే హై ఎండ్ వేరియంట్ S1 ప్రో 181 కిమీల పరిధిని కలిగి ఉంది. ఈ రెండు స్కూటర్ల టాప్ స్పీడ్ విషయానికి వస్తే, Ola S1 గరిష్టంగా 90 km/h వేగంతో, Ola S1 Pro గరిష్టంగా 115 km/h వేగంతో రైడ్ చేయడానికి అనుకూలంగా ఉంటుంది.