నిమిషానికి 15 బండ్లు అమ్మి రికార్డ్ క్రియేట్ చేసిన హోండా.. నంబర్ వన్ స్థానం కోల్పోయిన హీరో

భారతీయ టూ వీలర్ మార్కెట్లో అతిపెద్ద సంస్థలలో ఒకటైన హోండా టూ వీలర్ కంపెనీ అక్టోబర్ 2025 నెల విక్రయాలలో అద్భుతమైన వృద్ధిని సాధించింది. కేవలం 31 రోజుల్లోనే ఈ కంపెనీ ఏకంగా 6,50,596 వాహనాలను విక్రయించింది. అంతర్జాతీయ మార్కెట్ ఎగుమతుల్లో స్వల్ప తగ్గుదల కనిపించినప్పటికీ, దేశీయంగా అమ్మకాలు భారీగా పెరగడం ద్వారా కంపెనీ మొత్తం వృద్ధిని బలంగా నిలబెట్టింది. ఈ విజయానికి కీలకమైన యాక్టివా (Activa) స్కూటర్ 3.5 కోట్ల యూనిట్ల ఎగుమతి మైలురాయిని చేరుకుంది. హోండా సాధించిన ఈ రికార్డు విజయం, అమ్మకాల వివరాలు ఇప్పుడు చూద్దాం.

భారత మార్కెట్‌లో హోండా ద్విచక్ర వాహన కంపెనీ (Honda Two-Wheeler Company) అక్టోబర్ నెల అమ్మకాల గణాంకాలను విడుదల చేసింది. ఈ నివేదిక ప్రకారం, అక్టోబర్‌లో కంపెనీ అమ్మకాల్లో మంచి వృద్ధిని సాధించింది. ఎగుమతులలో కొంత తగ్గుదల ఉన్నప్పటికీ, దేశీయ అమ్మకాలు పెరిగి ఆ లోటును భర్తీ చేశాయి. నిమిషానికి దాదాపు 15 బండ్లను అమ్ముతుందంటే హోండా కంపెనీపై కస్టమర్లు ఎంత నమ్మకం పెట్టారో అర్థం అవుతుంది.

హోండా భారతదేశంలోనే కాకుండా ప్రపంచవ్యాప్తంగా ఒక ప్రముఖ ద్విచక్ర వాహన సంస్థ. ఇండియాలో తయారైన యాక్టివా రేంజ్ స్కూటర్లు (యాక్టివా 110, యాక్టివా 125, యాక్టివా ఐ) సహా మొత్తం 3.5 కోట్ల వాహనాలను ఎగుమతి చేయడం హోండాకు ఒక భారీ మైలురాయి. ఈ అక్టోబర్‌లో కూడా హోండా అద్భుతమైన అమ్మకాలను నమోదు చేసింది. గత అక్టోబర్ అమ్మకాలు, ప్రస్తుత ఆర్థిక సంవత్సరం అమ్మకాల వివరాలను ఇప్పుడు పరిశీలిద్దాం.

గత అక్టోబర్‌లో హోండా మొత్తం 6,50,596 వాహనాలను విక్రయించింది. ఇందులో దేశీయంగా 5,98,952 వాహనాలు అమ్ముడుపోగా, 51,644 వాహనాలు విదేశాలకు ఎగుమతి అయ్యాయి. గత ఏడాది అక్టోబర్‌లో మొత్తం 5,97,711 వాహనాలు అమ్ముడవగా, ఈ ఏడాది 52,885 వాహనాలను అదనంగా విక్రయించి 8.85 శాతం వృద్ధిని సాధించింది.

గతేడాది అక్టోబర్‌లో దేశీయంగా 5,53,120 వాహనాలు, ఎగుమతులలో 44,591 వాహనాలు అమ్ముడయ్యాయి. ఈ ఏడాది దేశీయ అమ్మకాల్లో 45,832 అదనపు వాహనాలు, ఎగుమతులలో 7053 అదనపు వాహనాలతో హోండా దూసుకెళ్లింది. దేశీయ అమ్మకాల్లో 8.29 శాతం వృద్ధి, ఎగుమతులలో 15.82 శాతం వృద్ధిని కంపెనీ నమోదు చేసింది.

గత సెప్టెంబర్‌లో మొత్తం 5,68,164 వాహనాలు అమ్ముడవగా, అక్టోబర్‌లో అదనంగా 82,432 వెహికల్స్ విక్రయించి 14.51 శాతం వృద్ధిని సాధించింది. దేశీయ అమ్మకాల్లో సెప్టెంబర్‌లో 5,05,693 వాహనాలు అమ్ముడవగా, అక్టోబర్‌లో 93,259 అదనపు వాహనాలతో 18.44 శాతం వృద్ధి నమోదైంది. అయితే, ఎగుమతులలో సెప్టెంబర్‌లో 62,471 వాహనాలు ఎగుమతి కాగా, అక్టోబర్‌లో 10,827 వాహనాలు తక్కువగా ఎగుమతి అయ్యి, 17.33 శాతం తగ్గుదల కనిపించింది.

ప్రస్తుత ఆర్థిక సంవత్సరంలో కంపెనీ మొత్తం 36,41,612 వాహనాలను విక్రయించింది. ఇందులో దేశీయంగా 32,78,451 వాహనాలు, ఎగుమతులు 3,63,161 వాహనాలు ఉన్నాయి. గత ఆర్థిక సంవత్సరం ఇదే కాలంలో 37,56,088 వాహనాలు అమ్ముడవగా, ఈ ఏడాది 1,14,476 వాహనాలు తక్కువగా అమ్ముడై 3 శాతం తగ్గుదల నమోదైంది.