మధ్య తరగతి బెస్ట్ ఫ్రెండ్.. రికార్డుల రారాజు.. పాతికేళ్లలో 50 లక్షల కుటుంబాలకు చేరువైన యాక్టివా

భారతదేశ ఆటోమొబైల్ రంగంలో స్కూటర్ అంటే గుర్తొచ్చే మొదటి పేరు హోండా యాక్టివా (Honda Activa). రెండు దశాబ్దాలకు పైగా భారతీయుల ప్రయాణాల్లో అంతర్భాగంగా మారిన ఈ స్కూటర్, ఇప్పుడు మరో అరుదైన మైలురాయిని అందుకుంది. దేశంలోనే అతిపెద్ద ద్విచక్ర వాహన మార్కెట్లలో ఒకటిగా ఉన్న మహారాష్ట్రలో యాక్టివా ఏకంగా 50 లక్షల (5 మిలియన్లు) విక్రయాల మార్కును దాటి సరికొత్త చరిత్ర సృష్టించింది. హోండా మోటార్‌సైకిల్ అండ్ స్కూటర్ ఇండియా (HMSI) ఈ విషయాన్ని అధికారికంగా ప్రకటించింది. కేవలం ఒక రాష్ట్రంలోనే ఒక మోడల్ ఇంత పెద్ద ఎత్తున అమ్ముడవడం యాక్టివా బ్రాండ్ పట్ల కస్టమర్లకు ఉన్న నమ్మకాన్ని చాటిచెబుతోంది.

హోండా యాక్టివా ప్రస్థానం నేటిది కాదు. గత 25 ఏళ్లుగా ఈ స్కూటర్ నిరంతరాయంగా తన ఆధిపత్యాన్ని కొనసాగిస్తోంది. 2001లో మొదటిసారిగా మార్కెట్లోకి ప్రవేశించిన యాక్టివా, అప్పటి వరకు ఉన్న గేర్ స్కూటర్ల ట్రెండ్‌ను మార్చేసి గేర్ లెస్ విప్లవాన్ని తీసుకొచ్చింది.

ముఖ్యంగా మహారాష్ట్రలోని ముంబై, పూణే, థానే, నాగపూర్, నవీ ముంబై వంటి మెట్రో నగరాల్లో యాక్టివా వినియోగం విపరీతంగా పెరిగింది. రద్దీగా ఉండే నగరాల్లో ఆఫీసులకు వెళ్లేవారికీ, కాలేజీ విద్యార్థులకూ, గృహిణులకూ ఇది ఒక నమ్మకమైన వాహనంగా మారిపోయింది. తక్కువ మెయింటెనెన్స్, ఎక్కువ కాలం మన్నే ఇంజన్ సామర్థ్యం దీనికి ప్రధాన బలాలు.

మహారాష్ట్రలో ఇంతటి క్రేజ్ ఎందుకు?
మహారాష్ట్రలో యాక్టివాకు ఇంతటి ఆదరణ లభించడానికి కంపెనీ నెట్‌వర్క్ కూడా ఒక ప్రధాన కారణం. రాష్ట్రవ్యాప్తంగా హోండాకు 700 కంటే ఎక్కువ సేల్స్ అండ్ సర్వీస్ పాయింట్లు ఉన్నాయి. దీనివల్ల కస్టమర్లకు వాహన కొనుగోలుతో పాటు, సర్వీసింగ్ సౌకర్యం కూడా చాలా సులభంగా అందుబాటులో ఉంటోంది. అలాగే, సెకండ్ హ్యాండ్ మార్కెట్లో కూడా యాక్టివాకు మంచి రీసేల్ వాల్యూ ఉంటుంది.

ఈ స్కూటర్ కొన్న కొన్ని ఏళ్ల తర్వాత అమ్మినా, మంచి ధర పలుకుతుందనే నమ్మకం వినియోగదారుల్లో ఉండటం దీని అమ్మకాలకు ప్లస్ పాయింట్‌గా మారింది. అటు పల్లెల్లోని గతుకుల రోడ్లపై, ఇటు సిటీ ట్రాఫిక్‌లోనూ సునాయాసంగా ప్రయాణించేందుకు దీని డిజైన్ ఎంతో అనువుగా ఉంటుంది.

ధర, ఫీచర్లు..
ప్రస్తుతం మార్కెట్లో హోండా యాక్టివా ప్రారంభ ధర సుమారు రూ.75,433 (ఎక్స్-షోరూమ్) గా ఉంది. బడ్జెట్ ధరలోనే అదిరిపోయే మైలేజ్, మన్నికైన బాడీని కంపెనీ అందిస్తోంది. ఇందులో ప్రధానంగా 110cc, 125cc ఇంజన్ ఆప్షన్లు ఉన్నాయి. మెరుగైన బ్రేకింగ్ సిస్టమ్, విశాలమైన సీటు, సామాగ్రి పెట్టుకోవడానికి అనువైన అండర్ సీట్ స్టోరేజ్ వంటి ఫీచర్లు ప్రతి కుటుంబానికి దీన్ని దగ్గర చేశాయి. కాలానికి అనుగుణంగా యాక్టివా తనను తాను అప్‌డేట్ చేసుకుంటూ వస్తోంది. స్మార్ట్ కీ (H-Smart) వంటి అధునాతన ఫీచర్లను కూడా ఈ మధ్యే ప్రవేశపెట్టింది.

ఎలక్ట్రిక్ రంగంలోకి కూడా అడుగు..
ట్రెండ్‌కు అనుగుణంగా హోండా ఇప్పుడు ఎలక్ట్రిక్ వాహనాల (EV) విభాగంలోకి కూడా ప్రవేశించింది. ఇటీవల హోండా యాక్టివా ఈ (Honda Activa e) మోడల్‌ను పరిచయం చేసింది. పెట్రోల్ ధరల సెగ నుంచి తప్పించుకోవాలనుకునే వారికి ఇది మంచి ప్రత్యామ్నాయంగా మారింది.

HMSI తన పోర్ట్‌ఫోలియోలో కేవలం యాక్టివా మాత్రమే కాకుండా డియో, షైన్, ఎస్పీ 125, యూనికార్న్ వంటి పాపులర్ మోడళ్లను కలిగి ఉన్నప్పటికీ, యాక్టివా సాధించిన ఈ 50 లక్షల మార్కు మాత్రం ఆల్ టైమ్ రికార్డుగా నిలిచిపోతుంది. కస్టమర్ల సంతృప్తే తమ విజయ రహస్యమని హోండా మేనేజ్మెంట్ ఈ సందర్భంగా పేర్కొంది.