అప్పట్లో ఈ స్కూటర్ ఇంటి ముందు ఉందంటే ఆ దర్జానే వేరు..మన జీవితాల్లో భాగమైన 5 ఐకానిక్ స్కూటర్లు ఇవే

భారతదేశంలో మధ్యతరగతి కుటుంబాలకు స్కూటర్ అంటే కేవలం ఒక వాహనం మాత్రమే కాదు, అదొక భావోద్వేగం. ఒకప్పుడు పెళ్లి కానుకగా ఇచ్చే బజాజ్ చేతక్ నుంచి, నేటి తరం యువత మనసు దోచుకుంటున్న హోండా యాక్టివా వరకు స్కూటర్ల ప్రయాణం ఎంతో ఆసక్తికరంగా సాగింది. రోడ్లపై తిరుగుతూ, చరిత్ర సృష్టించి, కొన్ని తరాల జీవితాలను ప్రభావితం చేసిన టాప్ 5 ఐకానిక్ స్కూటర్ల గురించి ఇప్పుడు వివరంగా తెలుసుకుందాం.

1. హోండా యాక్టివా (Honda Activa)
2001వ సంవత్సరంలో హోండా యాక్టివా అడుగుపెట్టినప్పుడు, భారతదేశంలో స్కూటర్ల యుగం ముగిసిపోయిందని అందరూ అనుకున్నారు. కానీ యాక్టివా ఆ అంచనాలను తలకిందులు చేసింది. గేర్లు లేని (Gearless) టెక్నాలజీతో, మహిళలు, పురుషులు ఇద్దరూ నడిపేలా ఉన్న యూనిసెక్స్ డిజైన్‌తో ఇది విప్లవం సృష్టించింది. 110సీసీ ఇంజిన్, మెటల్ బాడీ, తిరుగులేని విశ్వసనీయత దీనిని ఇంటింటి వాహనంగా మార్చాయి. నేటికీ హోండా యాక్టివా అమ్మకాల్లో అగ్రస్థానంలో కొనసాగుతూ, స్కూటర్ల మార్కెట్‌లో రారాజుగా వెలుగొందుతోంది. ఎన్ని కొత్త మోడల్స్ వచ్చినా యాక్టివా క్రేజ్ మాత్రం తగ్గడం లేదు.

2. బజాజ్ చేతక్ (Bajaj Chetak)
మహారాణా ప్రతాప్ గుర్రం పేరు మీదుగా వచ్చిన బజాజ్ చేతక్, భారతీయ రోడ్లపై దశాబ్దాల పాటు రాజ్యం చేసింది. 1970 నుంచి 2000 వరకు ప్రతి ఇంట్లోనూ ఈ స్కూటర్ ఉండేది. దీని డిమాండ్ ఎంతలా ఉండేదంటే, ఒకప్పుడు ఈ స్కూటర్ కోసం ఏకంగా పదేళ్లు వెయిటింగ్ పీరియడ్ ఉండేది. ఆ రోజుల్లో పెళ్లి సంబంధాల్లో బజాజ్ చేతక్ ఒక హోదాకు చిహ్నం. మన్నికైన మెటల్ బాడీ, స్పేర్ వీల్ సౌకర్యం దీని ప్రత్యేకతలు. ఇప్పుడు ఇది ఎలక్ట్రిక్ అవతారంలో మళ్లీ వచ్చి పాత జ్ఞాపకాలను నెమరువేసుకునేలా చేస్తోంది.

3. లంబ్రెట్టా - విజయ్ సూపర్ (Lambretta / Vijay Super)
1970, 80వ దశకాల్లో లంబ్రెట్టా ఒక స్టైల్ స్టేట్‌మెంట్. లక్నోలోని స్కూటర్స్ ఇండియా లిమిటెడ్ (SIL) ద్వారా విజయ్ సూపర్ పేరుతో ఇది భారతీయులకు పరిచయమైంది. 150సీసీ 2-స్ట్రోక్ ఇంజిన్, 4-స్పీడ్ గేర్ బాక్స్‌తో ఇది రోడ్లపై గంభీరంగా దూసుకెళ్లేది. 1983లో వరల్డ్ కప్ గెలిచిన భారత క్రికెట్ జట్టు సభ్యులకు ఈ స్కూటర్లను బహుమతిగా ఇవ్వడం దీని గొప్పతనాన్ని చాటుతుంది. నేటికీ వింటేజ్ వాహనాలను ఇష్టపడే వారు విజయ్ సూపర్ ను ఒక అపురూపమైన వస్తువుగా భద్రపరుచుకుంటారు.

4. కైనెటిక్ హోండా (Kinetic Honda)
90వ దశకంలో కైనెటిక్ హోండా ఒక పెనుమార్పు తెచ్చింది. గేర్లు మార్చే ఇబ్బంది లేకుండా, కేవలం బటన్ నొక్కితే స్టార్ట్ అయ్యే (Electric Start) సౌకర్యాన్ని ఇది మొదటిసారిగా సామాన్యులకు పరిచయం చేసింది. దీని ఫ్లాట్ ఫ్లోర్ బోర్డ్ డిజైన్ లగేజీని తీసుకెళ్లడానికి చాలా అనువుగా ఉండేది. ముఖ్యంగా మహిళా రైడర్లకు ఇది ఎంతో సౌకర్యంగా ఉండటంతో అప్పట్లో భారీగా అమ్ముడైంది. హోండా, కైనెటిక్ విడిపోయిన తర్వాత ఈ మోడల్ కనుమరుగైనప్పటికీ, ఇప్పుడు ఈ బ్రాండ్ మళ్లీ ఎలక్ట్రిక్ స్కూటర్ గా పునరాగమనం చేస్తోంది.

5. టీవీఎస్ స్కూటీ (TVS Scooty)
మహిళల కోసం ప్రత్యేకంగా రూపొందించిన మొదటి స్కూటర్ ఏదైనా ఉందంటే అది టీవీఎస్ స్కూటీ మాత్రమే. తేలికపాటి బరువు, హ్యాండ్లింగ్ చేయడం సులభం కావడంతో ఇది కాలేజీ అమ్మాయిల నుంచి గృహిణుల వరకు అందరి ఫేవరెట్ గా మారింది. టీవీఎస్ స్కూటీ పెప్+, జెస్ట్ వంటి మోడళ్లతో ఈ సెగ్మెంట్‌లో టీవీఎస్ తిరుగులేని ముద్ర వేసింది. 2023లో పెప్+ మోడల్ నిలిపివేసినప్పటికీ, స్కూటీ అనే పదం ఇప్పటికీ ఏ కంపెనీ స్కూటర్ నైనా పిలవడానికి పర్యాయపదంగా మారిపోయిందంటే దీని ప్రభావం ఎంతటో అర్థం చేసుకోవచ్చు.