భారత్‌లో 24,500 రూపాయలకే కొత్త ఈ-సైకిల్ విడుదల; పూర్తి వివరాలు

మార్కెట్లో ఎలక్ట్రిక్ బైకులు, స్కూటర్లు మరియు కార్లకు మాత్రమే కాదు, ఎలక్ట్రిక్ సైకిళ్లకు కూడా డిమాండ్ ఉంది. ఈ తరుణంలో ఫెలిడే ఎలక్ట్రిక్ కొత్త ఈ-సైకిల్‌ను మార్కెట్లోకి విడుదల చేసింది. దీని గురించి మరింత సమాచారం ఈ ఆర్టికల్ లో చూద్దాం..

కంపెనీ తన కొత్త ఫెలిడే-అసిస్ట్ ఈ-బైక్‌ను కేవలం రూ. 24,500 ధరకు విడుదల చేసింది. ఈ ఈ-సైకిల్‌కు కంపెనీ 'మావెన్' అని నామకరణం చేసింది. ఈ ఈ-సైకిల్‌లో, కంపెనీ 250 డబ్ల్యు / 32 ఎన్ఎమ్ BLDC హబ్ మోటారును ఉపయోగించింది. ఈ సైకిల్ యొక్క టాప్ స్పీడ్ గంటకు 25 కిలోమీటర్లు.

ఈ కొత్త ఎలక్ట్రిక్ సైకిల్‌లో 5 లెవెల్స్ ఎలక్ట్రిక్ లెవెల్స్ ఇవ్వబడుతుంది. ఈ కొత్త సైకిల్ 36 వి, 7.8 ఎహెచ్ ఎల్ఐ బ్యాటరీ ప్యాక్‌తో వస్తుంది. ఈ బ్యాటరీ ప్యాక్ 35 నుంచి 50 కిలోమీటర్ల పరిధిని అందిస్తుంది. ఈ సైకిల్ ఒకసారి పూర్తి ఛార్జింగ్ చేసుకోవడానికి దాదాపు మూడున్నర గంటల సమయం పడుతుంది.

కొత్త ఫీలడే ఈ-బైక్‌లో 19 ఇంచెస్ క్రోమోలీ స్టీల్ ఫ్రేమ్ మరియు 27.5 ఇంచెస్ అల్యూమినియం వీల్ ఉన్నాయి. ఈ సైకిల్ బరువు కేవలం 21 కేజీలు మాత్రమే. కావున ఇది వినియోగదానికి చాలా అనుకూలంగా ఉంటుంది. అంతే కాకుండా ఇది ఎలాంటి రహదారిలో అయినా ప్రయాణించడానికి అనుకూలంగా ఉంటుంది.

ఈ కొత్త ఈ-సైకిల్ యొక్క సస్పెన్షన్ సెటప్ విషయానికి వస్తే, దీని ముందు భాగంలో టెలిస్కోపిక్ ఫోర్క్ కలిగి ఉంది. దీనితో పాటు అదనపు భద్రత కోసం ముందు మరియు వెనుక భాగంలో డిస్క్ బ్రేక్‌లు అందించబడ్డాయి. అయితే ఈ సైకిల్ యొక్క వెనుక భాగంలో సస్పెన్షన్ సెటప్ ఇవ్వలేదు.

బ్యాటరీ యొక్క లైఫ్ టైమ్ మరియు అసిస్ట్ లెవెల్స్ గురించి తెలియజేయడానికి ఫెలిడే ఒక ఎల్ఇడి ఇండికేటర్ అందించింది. ఈ ఎలక్ట్రిక్ సైకిల్ లో ఉన్న మోటరుకి 2 సంవత్సరాల వారంటీ ఇవ్వబడింది. అయితే ప్రస్తుతం మార్కెట్లో ఉన్న ఎలక్ట్రిక్ సైకిల్స్ కి 1 సంవత్సరం వారంటీ ఉంటుంది.

మారుతున్న ప్రజల జీవనశైలికి అనుకూలంగా ఎక్కువమంది ఆరోగ్యం మీద దృష్టి సారిస్తున్నారు. కావున చాలా మంది ఫిట్‌నెస్ కోసం ఇ-బైక్‌ను కొనుగోలు చేస్తున్నారు. ఇంతే కాకుండా ఇప్పుడు నగరంలో వాహనం మీద వెళ్లాలంటే లైసెన్స్, ఆర్సీ వంటివి అవసరం కానీ ఈ బైకులకు ఇలాంటివి అవసరం లేదు. కావున ఎవరైనా ఈ సైకిల్స్ ఉపయోగించుకోవచ్చు.

ప్రస్తుతం మార్కెట్లో ఈ సైకిల్స్ అతి తక్కువ ధరల వద్ద కూడా లభ్యమవుతాయి. వీటికి ఇంధనం ఏ మాత్రం అవసరం లేదు. ఇంధనం ఉపయోగించకపోవడం ప్రస్తుతం చాలా అవసరం, కేవలం పెరుగుతున్న ధరల కారణంగా మాత్రమే కాదు, పర్యావరణ అనుకూలంగా ఉండటానికి ఈ ఎలక్ట్రిక్ వాహనాలు చాలా అవసరం.

ప్రస్తుతం కేంద్ర ,మరియు రాష్ట్ర ప్రభుత్వాలు ఎలక్ట్రిక్ వాహనాలు కొనుగోలు చేయమని సిఫార్సు చేస్తున్నారు. అంతే కాదు ఎలక్ట్రిక్ వాహనాలు కొనుగోలుచేసి కస్టమర్లకు భారీ డిస్కౌంట్స్ కూడా అందిస్తున్నారు. ఈ కారణంగా ఎక్కువమంది ఎలక్ట్రిక్ వాహనాలు ఉపయోగించడానికి ఆసక్తి చూపుతున్నారు.