e-Ashwa నుండి 12 ఎలక్ట్రిక్ ద్విచక్ర వాహనాలు, 8 ఇ-ఆటోల విడుదల

ఉత్తరప్రదేశ్‌లోని ఘజియాబాద్‌ కు చెందిన ఇ-అశ్వ ఆటోమోటివ్ భారతదేశంలో విస్తృత శ్రేణి ఎలక్ట్రిక్ వాహనాల విక్రయాన్ని ప్రారంభించినట్లు ప్రకటించింది. ఈ కంపెనీ రెండు సెగ్మెంట్లలో ఎలక్ట్రిక్ ద్విచక్ర వాహనాలను విడుదల చేయనున్నట్లు తెలిపింది. వీటిలో వ్యాపార సంస్థల కోసం ప్రత్యేకంగా తయారు చేసిన బిజినెస్-టు-బిజినెస్ వాహనాలు మరియు వ్యక్తిగత వినియోగదారుల కోసం తయారు చేసిన బిజినెస్-టు-కన్జ్యూమర్ వాహనాలు ఉంటాయి.

ఈ వాహనాలు భారతీయ మార్కెట్‌లోని కస్టమర్‌లందరికీ అందుబాటులో ఉంటాయని ఇ-అశ్వా ఆటోమోటివ్ తెలిపింది. ఈ సంస్థ గతంలో తమ ఉత్పత్తులను ఇతర బ్రాండ్‌ల క్రింద విక్రయానికి అందించింది. సంస్థ గత కొన్ని సంవత్సరాలుగా కన్సార్టియం ప్రాతిపదికన ఈ చర్యలో పాల్గొంటోంది. ఈ నేప‌థ్యంలో కంపెనీ త‌న సొంత బ్రాండ్ పేరుతో ఎలక్ట్రిక్ వాహనాల విక్రయాలను ప్రారంభించాలని యోచిస్తోంది.

ఇ-అశ్వ బ్రాండ్ పేరుతో కంపెనీ మొత్తం 12 ఎలక్ట్రిక్ ద్విచక్ర వాహనాల మోడళ్లను మార్కెట్లోకి విడుదల చేయనుంది. ఇవే కాకుండా, ఎనిమిది మూడు చక్రాల ఎలక్ట్రిక్ వాహనాలను కూడా విడుదల చేయాలని కంపెనీ యోచిస్తోంది. ఈ సమాచారాన్ని ఇ-అశ్వ ఆటోమోటివ్ నవంబర్ 14న విడుదల చేసిన ప్రకటనలో ధృవీకరించింది. ఈ కంపెనీ దేశవ్యాప్తంగా 630 ప్రత్యేక అవుట్‌లెట్‌లు మరియు రిటైల్ నెట్‌వర్క్‌లను కలిగి ఉంది.

ఈ ప్రత్యేకమైన అవుట్‌లెట్‌లు మరియు రిటైల్ నెట్‌వర్క్‌ల ద్వారా కంపెనీ తమ ఆల్-ఎలక్ట్రిక్ టూ వీలర్లను విక్రయించనుంది. ప్రస్తుతం, కంపెనీ ఈ ప్రణాళికలపై చురుకుగా పనిచేస్తోందని, దాని ఆధారంగానే ఇంత పెద్ద రేంజ్ లో వాహనాలను ప్రకటించామని కంపెనీ చెబుతోంది. ఇటీవలి కాలంలో భారతదేశంలో ఎలక్ట్రిక్ వాహనాలకు డిమాండ్ నిరంతరం పెరుగుతోంది. దేశంలో ఎలక్ట్రిక్ వాహనాలను ప్రోత్సహించేందుకు కేంద్ర ప్రభుత్వంతో పాటు, అనేక రాష్ట్ర ప్రభుత్వాలు కూడా పలు చర్యలు తీసుకుంటున్నాయి మరియు వాటి కొనుగోలుపై సబ్సిడీని అందజేస్తున్నాయి.

ఎలక్ట్రిక్ వాహనాలకు పెరుగుతున్న డిమాండ్ ను తీర్చడానికి కేంద్ర మరియు రాష్ట్ర ప్రభుత్వాల విధివిధానాలకు అనుగుణంగా ఇ-అశ్వ ఆటోమోటివ్ తన ఎలక్ట్రిక్ వాహనాలను ప్రారంభించాలని యోచిస్తోంది. ఇ-అశ్వ తక్కువ వేగంతో నడిచే ఎలక్ట్రిక్ వాహనాలను ప్రారంభించేందుకు సిద్ధంగా ఉంది. భవిష్యత్తులో వాటి రేంజ్ అధిక పనితీరుకు వెళ్లవచ్చు. ఇది కాకుండా, బహుళ ఫీచర్లతో కూడిన మూడు చక్రాల వాహనాలను అమ్మకానికి తీసుకురావాలని కంపెనీ యోచిస్తోంది.

చెత్త పారవేయడం, కూరగాయల విక్రయాలు మరియు కార్గో హ్యాండ్లింగ్‌తో కూడిన మూడు చక్రాల వాహనాలను అనేక రకాల ఎంపికలతో అందుబాటులో ఉంచనున్నారు. ఇవే కాకుండా, ప్రయాణికుల రవాణా కోసం కూడా ఎలక్ట్రిక్ ఆటో రిక్షాను ప్రారంభించాలని కంపెనీ యోచిస్తోంది. ముఖ్యంగా, ఇది ఇ-స్కూటర్‌లు, ఇ-మోటార్‌బైక్‌లు, ఇ-రిక్షాలు, ఇ-ఆటోలు, ఇ-లోడర్లు, ఇ-ఫుడ్ కార్ట్‌లు మరియు ఇ-జంక్ వాహనాలు వంటి బహుళ ఎంపికలలో అందుబాటులో ఉండబోతోంది.

ఈ కేటగిరీల కింద కంపెనీ ఇప్పటికే 6,000 ఎలక్ట్రిక్ వాహనాలను విక్రయించడానికి సిద్ధంగా ఉంది. ఇటీవలి కాలంలో భారత్‌లో పెట్రోల్, డీజిల్ ధరలు భారీగా పెరిగాయి. ప్రస్తుతం దేశంలోని అనేక రాష్ట్రాల్లో లీటర్ పెట్రోలు రూ. 100 లకు పైగానే ఉంటోంది. ఫలితంగా, కొందరు మోటార్‌సైకిల్ ప్రియులు ఇప్పుడు ప్రజా రవాణా వైపు మొగ్గు చూపుతుండగా, మరికొందరు ఎలక్ట్రిక్ వాహనాల వినియోగానికి మారడం ప్రారంభించారు. దీంతో దేశంలో ఎలక్ట్రిక్ వాహనాల విక్రయాలు గతంలో ఎన్నడూ లేని విధంగా పెరిగాయి.