రాయల్ ఎన్‌ఫీల్డ్ 650సీసీ క్రూయిజర్ బైక్ టెస్టింగ్; త్వరలోనే విడుదల!

రాయల్ ఎన్‌ఫీల్డ్ నుండి రానున్న ఈ శక్తివంతమైన 650సీసీ క్రూయిజర్ మోటార్‌సైకిల్ చూడటానికి ఇది అప్‌గ్రేడెడ్ థండర్‌బర్డ్‌లా అనిపిస్తుంది. తాజాగా ఈ కొత్త మోటార్‌సైకిల్‌కు సంబంధించిన స్పై వీడియో ఒకటి ఇంటర్నెట్‌లో లీక్ అయింది. మాస్క్డ్‌మోటో అనే యూట్యూబర్ ఈ వీడియోని అప్‌లోడ్ చేశారు.

ఈ వీడియోలో వేగంగా వెళ్తున్న 650సీసీ రాయల్ ఎన్‌ఫీల్డ్ మోటార్‌సైకిల్‌ను చూడొచ్చు మరియు దాని ఎగ్జాస్ట్ నోట్ (సైలెన్సర్ సౌండ్)ను కూడా వినొచ్చు. ఈ వీడియోని కారు లోపల నుండి రికార్డ్ చేయడం వలన ఎగ్జాట్ నోట్‌లో స్పష్టత లేదు, అయితే ఇది ఇంటర్‌సెప్టర్ 650 మరియు కాంటినెంటల్ జిటి 650 యొక్క 270-డిగ్రీల ఫైరింగ్ ఆర్డర్ ట్విన్-సిలిండర్ ఇంజన్‌తో సమానంగా ఉంటుంది.

కానీ, ఈ కొత్త 650సీసీ బైక్ ఎగ్జాస్ట్ నోట్ పైన పేర్కొన్న రెండు మోడళ్ల కంటే బిగ్గరగా వినిపించే అవకాశం ఉంది. రాయల్ ఎన్‌ఫీల్డ్ అభివృద్ధి చేస్తున్న ఈ కొత్త క్రూయిజర్ మోటార్‌సైకిల్‌ను కంపెనీ పూర్తి క్యామోఫ్లేజ్ లేకుండా టెస్ట్ చేస్తోంది. ఫలితంగా దీనికి సంబంధించిన అనేక డిజైన్ వివరాలు వెల్లడి అయ్యాయి.

ఈ క్రూయిజర్ మోటార్‌సైకిల్‌కు రెట్రోల్ లుక్‌నిచ్చేందుకు గుండ్రటి హెడ్‌లైట్లు, టెయిల్ లైట్లు మరియు టర్న్ ఇండికేటర్లను ఉపయోగించారు. ఇంకా ఇందులో ట్విన్ క్రోమ్ ఎగ్జాస్ట్ పైప్స్, కర్వ్‌డ్ ఫెండర్స్, సుదూర ప్రయాణాల కోసం ఇందులో సర్దుబాటు చేయగల విండ్‌స్క్రీన్ వంటి ఇతర ఫీచర్లు కూడా ఉన్నాయి.

ఈ మోటార్‌సైకిల్‌లోని స్ప్లిట్ సీట్ డిజైన్ మరియు పిలియన్ రైడర్ కోసం బ్యాక్‌రెస్ట్ మరో అదనపు ఆకర్షణగా ఉంటుంది. ఇందులో ముందు వైపు అమర్చిన అప్ సైడ్ డౌన్ ఫ్రంట్ (యూఎస్‌డి) ఫోర్కులు, వెనుక వైపు ట్విన్ షాక్ సస్పెన్షన్ సెటప్, సింగిల్ పాడ్ ఇన్‌స్ట్రుమెంట్ క్లస్టర్, క్రాష్ ప్రొటెక్టర్, అల్లాయ్ వీల్స్ మరియు పెద్ద ప్రొఫైల్‌తో కూడిన టైర్లు వంటి ఫీచర్లను కూడా మనం గమనించవ్చచు.

ఈ టెస్టింగ్ వాహనంలో కనిపిస్తున్న అప్ సైడ్ డౌన్ ఫోర్కులను ప్రొడక్షన్ మోడల్‌లో కూడా కంపెనీ ఉపయోగించినట్లయితే, ఇదే బ్రాండ్ యొక్క మొట్టమొదటి యూఎస్‌డి ఫోర్క్ సెటప్ అవుతుంది. రాయల్ ఎన్‌ఫీల్డ్ మోడళ్లలో ఇప్పటి వరకూ ఈ తరహా ఫోర్కులను ఉపయోగించలేదు.

రాయల్ ఎన్‌ఫీల్డ్ 650 ట్విన్ మోటార్‌సైకిళ్లలో కనిపించినట్లుగా, ఈ కొత్త క్రూయిజర్ మోటార్‌సైకిల్‌లో కూడా ఇరువైపులా సింగిల్ డిస్క్ బ్రేక్ ఉంటుంది. ఇది డ్యూయల్-ఛానల్ ఏబిఎస్‌ను స్టాండర్డ్‌గా సపోర్ట్ చేసే అవకాశం ఉంది. ఈ మోటారుసైకిల్‌లో స్టైలిష్ అల్లాయ్ వీల్స్ మరియు వాటిపై పెద్ద టైర్లు కూడా ఉన్నాయి.

ఈ క్రూయిజర్ మోటార్‌సైకిల్‌లో పొడవైన వీల్‌బేస్, టియర్-డ్రాప్ ఆకారంలో ఉండే ఫ్యూయెల్ ట్యాంక్, ఎత్తుగా మరియు వెడల్పుగా ఉండే హ్యాండిల్ బార్, ఫార్వర్డ్-సెట్ ఫుట్‌పెగ్స్ మొదలైన ఫీచర్లుు ఉన్నాయి. ఇవన్నీ రైడర్‌కు మరింత సౌకర్యవంతమైన రైడింగ్ పొజిషన్‌ను ఆఫర్ చేస్తాయి.

ఇక ఇన్‌స్ట్రుమెంట్ క్లస్టర్ విషయానికి వస్తే, మీటియోర్ 350 మోడల్‌లో కనిపించినట్లుగా ఇందులో కూడా బ్లూటూత్ కనెక్టివిటీతో కూడిన ట్రిప్పర్ నావిగేషన్ సిస్టమ్‌ను కలిగి ఉండొచ్చని తెలుస్తోంది. అలాగే, ఇంజన్ విషయానికి వస్తే ఇతర 650సీసీ మోడళ్లలో ఉపయోగిస్తున్న అదే ఇంజన్‌ను ఇందులోనూ కొనసాగించే అవకాశం ఉంది.

ప్రస్తుతం రాయల్ ఎన్‌ఫీల్డ్ విక్రయిస్తున్న 650 ట్విన్స్ (ఇంటర్‌సెప్టర్, కాంటినెంటల్ జిటి) మోటార్‌సైకిళ్లలో 649సీసీ ఎయిర్ అండ్ ఆయిల్-కూల్డ్ ప్యారలల్ ట్విన్ సిలిండర్ ఇంజన్ గరిష్టంగా 47 బిహెచ్‌పి పవర్‌ను మరియు 52 ఎన్ఎమ్ టార్క్‌ను ఉత్పత్తి చేస్తుంది. ఇది సిక్స్-స్పీడ్ గేర్‌బాక్స్‌తో జతచేయబడి ఉంటుంది మరియు స్లిప్పర్-క్లచ్ అసిస్ట్‌ను కలిగి ఉంటుంది.