విడుదలకు సిద్దమైన ఏబిఎస్ వెర్షన్ రాయల్ ఎన్ఫీల్డ్ బుల్లెట్: ధర మరియు ఇతర వివరాలు

తాజాగా అందిన సమాచారం మేరకు, రాయల్ ఎన్ఫీల్డ్ తమ బుల్లెట్ బైకులో సింగల్-ఛానల్ యాంటీ-లాక్ బ్రేకింగ్ సిస్టమ్ ఫీచర్‌ను అందివ్వనున్నట్లు తెలిసింది. అంటే, కేవలం ఫ్రంట్ డిస్క్ బ్రైకుకు మాత్రమే ఏబిఎస్ ఉంటుంది.

రాయల్ ఎన్ఫీల్డ్ శ్రేణిలో బుల్లెట్ 350 మరియు బుల్లెట్ 500 బైకులు తొలిసారిగా యాంటీ-లాక్ బ్రేకింగ్ సిస్టమ్ ఫీచర్‌తో రానున్నాయి. సేఫ్టీలో అత్యంత కీలకమైన ఏబిఎస్ ఇప్పటి వరకు రాయల్ ఎన్ఫీల్డ్ ఏబిఎస్ రాలేదు. ఈ నిర్ణయంతో రాయల్ ఎన్ఫీల్డ్ బైకులకు కూడా డిమాండ్ పెరగనుంది.

డ్యూయల్-ఛానల్ యాంటీ-లాక్ బ్రేకింగ్ సిస్టమ్‌తో పోల్చుకుంటే సింగల్ ఛానల్ ఏబిఎస్ అంత మంచిది కాదు. కానీ, అస్సలు ఏబిఎస్ లేకపోవడం కంటే కనీసం సింగల్ ఛానల్ ఏబిఎస్ అయినా మంచిదే కదా. బుల్లెట్ శ్రేణి బైకుల బరువు ఎక్కువగా ఉండటం, దీనికి తోడు ఏబిఎస్ ఉండటంతో వీటి బ్రేకింగ్ పనితీరు మరింత మెరుగుపడనుంది.

రాయల్ ఎన్ఫీల్డ్ తమ బైకుల్లో డ్యూయల్-ఛానల్ ఏబిఎస్ కాకుండా సింగల్ ఛానల్ ఏబిఎస్ అందివ్వడానికి గల ప్రధాన కారణం తక్కువ ధరలో అందివ్వడం. నూతన ప్రమాణాలకు అనుగుణంగా వచ్చే సింగల్ ఛానల్ ఏబిఎస్ ధర చాలా తక్కువ.

సింగల్ ఛానల్ ఏబిఎస్ వెర్షన్ రాయల్ ఎన్ఫీల్డ్ బుల్లెట్ ధరల్లో పెద్దగా మార్పులేమీ జరగకపోవచ్చు. రెగ్యుల్ వెర్షన్ బుల్లెట్ బైకులతో పోల్చుకుంటే రూ. 10,000 ల నుండి రూ. 12,000 వరకు ఎక్కువగా ఉండే అవకాశం ఉంది.

రాయల్ ఎన్ఫీల్డ్ బుల్లెట్ ఏబిఎస్ వెర్షన్ ఏప్రిల్ 2018 ప్రారంభం నాటికి విపణిలోకి విడుదలయ్యే అవకాశం ఉంది. అంతే కాకుండా, రాయల్ ఎన్ఫీల్డ్ వారి ఎంట్రీ లెవల్ అడ్వెంచర్ మోటార్ సైకిల్‌లో కూడా ఏబిఎస్ సేఫ్టీ ఫీచర్‌ను అందించే అవకాశం ఉంది.

విదేశీ మార్కెట్లకు ఎగుమతి చేస్తున్న రాయల్ ఎన్ఫీల్డ్ హిమాలయన్ అడ్వెంచర్ ఎడిషన్ బైకులో డ్యూయల్ ఛానల్ యాంటీ-లాక్ బ్రేకింగ్ సిస్టమ్ ఫీచర్ ఉంది. కాబట్టి, ఇండియన్ మార్కెట్లో అమ్ముడయ్యే మోడల్‌లో కూడా డ్యూయల్ ఛానల్ ఏబిఎస్ రానుంది.

అంతే కాకుండా, అప్ కమింగ్ రాయల్ ఎన్ఫీల్డ్ కాంటినెంటల్ జిటి మరియు 650 మరియు ఇంటర్‌సెప్టార్ 650 బైకుల్లో డ్యూయల్ ఛానల్ ఏబిఎస్ ఫీచర్ తప్పనిసరి ఫీచర్‌గా రానుంది.

డ్రైవ్‌స్పార్క్ తెలుగు అభిప్రాయం!

నూతన భద్రతా నియమావళి ప్రకారం, రాయల్ ఎన్ఫీల్డ్ ఎట్టకేలకు తమ బుల్లెట్ శ్రేణి బైకుల్లో యాంటీ-లాక్ బ్రేకింగ్ సిస్టమ్ ఫీచర్ అందివ్వడానికి సిద్దమైంది. రాయల్ ఎన్ఫీల్డ్ లైనప్‌లో అత్యంత ప్రజాదరణ పొందిన థండర్‌బర్డ్ మరియు క్లాసిక్ శ్రేణి బైకుల్లో కూడా ఏబిఎస్ ఫీచర్ వస్తే బాగుటుంది.

ఏబిఎస్ ఉన్న బైకుల ధర సాధారణ బైకుల కంటే అధికంగా ఉంటుంది. అయితే, మితిమీరిన వేగంతో ప్రయాణించేటపుడు ప్రమాదానికి గురికాకుండా ప్రతి రైడర్ భద్రత విషయంలో ఏబిఎస్ ఎంతో చక్కగా పనిచేస్తుంది. ప్రాణాల కంటే విలువైనదేదీ లేదు కాబట్టి ఏబిఎస్ వెర్షన్ బైకులనే ఎంచుకోండి...