హార్లే డేవిడ్సన్ ఇండియా చైర్మన్‌గా రవి అవలూర్‌ని నియమించిన హీరో మోటోకార్ప్

హై-ఎండ్ క్రూయిజర్ మోటార్‌సైకిళ్ల తయారీలో ప్రపంచ లీడర్‌గా ఉన్న హార్లే డేవిడ్సన్, భారతదేశంలో మాత్రం వ్యక్తిగతంగా వ్యాపారం కొనసాగించలేకపోయింది. ఈ బ్రాండ్ పట్ల మార్కెట్లో ఆదరణ తగ్గిపోవటం, అమ్మకాలు సన్నగిల్లడంతో హార్లే డేవిడ్సన్ భారతదేశం నుండి వ్యక్తిగత సంస్థగా బయటకు వెళ్లిపోతున్నట్లు గతేడాది ప్రకటించింది.

హార్లే డేవిడ్సన్ భారత మార్కెట్ నుండి స్వతంత్ర బ్రాండ్‌గా నిష్క్రమించినప్పటికీ, కొత్త కస్టమర్లకు మనదేశంలో హ్యార్లీ బైక్‌లు మరియు వాటికి సంబంధించిన సేవలు లభిస్తాయి. ఈ బైక్‌లను పూర్తిగా విదేశాల నుండి దిగుమతి చేసుకొని, భారత్‌లోని హీరో మోటోకార్ప్ నెట్‌వర్క్ ద్వారా వాటిని విక్రయిస్తున్నారు.

హార్లే డేవిడ్సన్ హర్యానాలో ఉన్న తమ ఉత్పత్తి కేంద్రాన్ని కూడా మూసివేసింది. దీంతో ప్లాంట్‌లో పనిచేసే కార్మికులు మరియు డీలర్లు రోడ్డున పడ్డారు. ఈ ప్లాంట్‌లో హార్లే డేవిడ్సన్ తమ బడ్జెట్ మోటార్‌సైకిళ్లయిన స్ట్రీట్ 750 మరియు స్ట్రీట్ రాడ్ మోడళ్లను ఉత్పత్తి చేసేది. కంపెనీ ఇటీవలే ఈ రెండు మోడళ్లను కూడా భారత మార్కెట్ నుండి తొలగించివేసింది.

కాగా, భారతదేశంలో ఉమ్మడి కార్యకలాపాలను ప్రారంభించేందుకు హార్లే డేవిడ్సన్ డీలర్లను హీరో మోటోకార్ప్ తమలో విలీనం చేసుకోనుంది. ఇందుకోసం ఇదివరకు హార్లే డేవిడ్సన్ సంస్థతో పనిచేసిన 11 మంది డీలర్లు ఇప్పుడు హీరో మోటోకార్ప్ క్రింద పనిచేయడానికి సిద్ధంగా ఉన్నారు.

చెన్నై, బెంగళూరు, పూణే, అహ్మదాబాద్, కొచ్చి, భువనేశ్వర్, ఢిల్లీ, డెహ్రాడూన్, హైదరాబాద్, ముంబై మరియు కోల్‌కతాలోని హార్లే డేవిడ్సన్ డీలర్లు హీరో మోటోకార్ప్‌తో పనిచేయటానికి సానుకూలంగా స్పందించారు.

అదే సమయంలో, హీరో మోటోకార్ప్ క్రింద పనిచేస్తున్న కొన్ని అధీకృత డీలర్‌షిప్ కేంద్రాలు కూడా హార్లే డేవిడ్సన్ మోటార్‌సైకిళ్లను విక్రయించనున్నాయి. అంతేకాకుండా, అమ్మకాలు అయిన తర్వాత హార్లే డేవిడ్సన్ మోటార్‌సైకిళ్లకు సేవలను అందించడం (సర్వీస్, మెయింటినెన్స్, స్పేర్ పార్ట్స్ మొదలైనవి) కూడా కొనసాగిస్తాయి.

ఈ నిర్ణయం దేశంలోని కొత్త మరియు పాత హార్లే డేవిడ్సన్ మోటారుసైకిల్ వినియోగదారులకు కొంతమేర ఉపశమనాన్ని కలిగించనుంది. ఈ మొత్తం ప్రక్రియను సజావుగా నిర్వహించేందుకు హీరో మోటోకార్ప్ రవి అవలూర్‌ను హార్లే డేవిడ్సన్ ఇండియా డివిజన్ బిజినెస్ హెడ్‌గా నియమించింది.

హీరో మోటోకార్ప్ చైర్మన్ పవన్ ముంజాల్ ఆధ్వర్యంలో ఆయన నేరుగా పని చేయనున్నారు. ఇంతకు ముందు, రవి అవలూర్ కూపర్ మరియు డుకాటీ ఇండియా ఛైర్మన్‌గా కూడా పనిచేశారు.