అమెరికా, బ్రిటన్‌ల కోసం 750సీసీ రాయల్ ఎన్‌ఫీల్డ్ బైక్స్

ఇటీవలే కెఫే రేసర్ స్టైల్ బైక్ 'కాంటినెంటల్ జిటి'ని విడుదల చేసి ప్రపంచం దృష్టిని ఆకట్టుకున్న మన భారతీయ పురాతన మోటార్‌సైకిల్ కంపెనీ రాయల్ ఎన్‌ఫీల్డ్, ఇప్పుడు అమెరికా, బ్రిటన్ మార్కెట్ల కోసం 750సీసీ మోటార్‌సైకిళ్లను తయారు చేసేందుకు సిద్ధమైంది.

రాయల్ ఎన్‌ఫీల్డ్ బ్రాండ్‌కు ప్రపంచ వ్యాప్తంగా డిమాండ్ అధికమవుతున్న నేపథ్యంలో, ప్రస్తుతం కంపెనీ అందిస్తున్న 500సీసీ మోటార్‌సైకిళ్లకు ఎగువన పెద్ద ఇంజన్‌తో కూడిన హైపెర్ఫామెన్స్ ప్రీమియం మోటార్‌సైకిళ్ల తయారీపై కంపెనీ దృష్టి సారించింది.

అయితే, భారతీయ రాయల్ ఎన్‌ఫీల్డ్ బైక్ ప్రియులకు నిరుత్సాహం కలిగించే విషయం ఏంటంటే, కంపెనీ తయారు చేయనున్న పెద్ద ఇంజన్‌తో కూడిన ఈ హై పెర్ఫార్మెన్స్ మోటార్‌సైకిళ్లు కేవలం యూకె, యూఎస్ మార్కెట్ల కోసం మాత్రమే కావటం. ప్రస్తుతానికి ఇవి దేశీయ విపణిలో విడుదలయ్యే అవకాశాలు ఏ కోశానా కనిపించడం లేదు. ఈ రెండు ప్రాంతాల్లో ఉండే బైక్ ప్రియులు సరసమైన ధరకే లభ్యమయ్యే ఆర్ఈ బైక్‌లను ఎక్కువగా ఆదరిస్తారని కంపెనీ ఆశిస్తోంది.