కన్వర్టిబల్ మోడల్‌ను తీసుకురానున్న రోల్స్ రాయిస్

బ్రిటీష్ లగ్జరీ కార్ కంపెనీ రోల్స్ రాయిస్, తొలిసారిగా ఓ కన్వర్టిబల్ మోడల్‌ను మార్కెట్‌కు పరిచయం చేయనుంది. త్వరలోనే రోల్స్ రాయిస్ కన్వర్టిబల్ కారును తీసుకువస్తామని చెన్నైలో ఘోస్ట్ సిరీస్ 2 కారును విడుదల చేసిన సందర్భంగా.. కంపెనీ ఏషియా పసిఫిక్ రీజియన్ జనరల్ మేనేజర్ స్వెన్ జే రిట్టర్ తెలిపారు.

తాము కన్వర్టిబల్ కారును విడుదల చేసినట్లయితే, అది ప్రపంచ వ్యాప్తంగా అందుబాటులోకి వస్తుందని ఆయన వివరించారు. ఆ కారుకు సంబంధించి అంతకు మించిన వివరాలను వెల్లడించేందుకు ఆయన నిరాకరించారు.

కాగా.. చెన్నై మార్కెట్లో విడుదల చేసిన రెండవ తరం (సెకండ్ జనరేషన్) ఘోస్ట్ సిరీస్ కారును ఇంగ్లాండ్‌లోని గుడ్‌వుడ్ ప్లాంట్‌లో ఉత్పత్తి చేసి, పలు అంతర్జాతీయ మార్కెట్లకు ఎగుమతి చేస్తున్నారు. చెన్నై మార్కెట్లో రోల్స్ రాయిస్ ఘోస్ట్ సిరీస్ 2 లగ్జరీ కారు ధర రూ.4.50 కోట్లు (ఎక్స్-షోరూమ్)గా ఉంది.

ఈ కారు కేవలం 5 సెకండ్ల వ్యవధిలోనే 0-100 కిలోమీటర్ల వేగాన్ని అందుకుంటుంది. దీని గరిష్ట వేగాన్ని గంటకు 250 కిలోమీటర్లకు పరిమితం చేశారు. కంపెనీ సర్టిఫై చేసిన దాని ప్రకారం, రోల్స్ రాయిస్ ఘోస్ట్ సిరీస్ 2 సిటీ రోడ్లపై ప్రతి 100 కిలోమీటర్లకు 21.4 లీటర్లు మరియు హైవేపై ప్రతి 100 కిలోమీటర్లకు 9.8 లీటర్ల ఇంధనాన్ని స్వాహా చేస్తుంది.