జై గూగుల్ తల్లి: అత్యధికంగా గూగుల్ చేసిన కార్లు

10. టెస్లా

ప్రపంచంలో కెల్లా అత్యధికంగా శోధించబడిన కార్ బ్రాండ్స్ జాబితాలో పదవ స్థానంలో ఉన్నది టెస్లా. టెస్లా ప్రవేశపెట్టిన రోడ్‌స్టర్ ఆల్-ఎలక్ట్రిక్ స్పోర్ట్స్ కార్ మోడల్‌తో ఈ కంపెనీ ప్రపంచం దృష్టిని ఆకట్టుకుంది.

9. బిఎమ్‌డబ్ల్యూ

ఈ జాబితాలో తొమ్మిదో స్థానంలో ఉన్నది, జర్మన్ లగ్జరీ కార్ కంపెనీ బిఎమ్‌డబ్ల్యూ. ఈ సంస్థను 1916లో ఫ్రాంజ్ జోసెఫ్ పాప్, కార్ల్ రాప్ మరియు కామిల్లో కాస్టిగ్లియోనీలు కలిసి స్థాపించారు. బిఎమ్‌డబ్ల్యూ కార్లకు ప్రపంచ వ్యాప్తంగా మంచి క్రేజ్ ఉంది.

8. నిస్సాన్

ఈ జాబితాలో ఎనిమిదవ స్థానంలో ఉన్నది జపనీస్ కార్ కంపెనీ నిస్సాన్. నిస్సాన్ సంస్థను 1933లో ఆరుగురు వ్యక్తులు కలిసి ప్రారంభించారు. ఈ సంస్థ హెడ్‌క్వార్టర్స్ జపాన్‌లోని యోకోహామాలో ఉంది. ఈ కంపెనీ 1999లో ఫ్రెంచ్ కార్ కంపెనీ రెనోతో భాగస్వామ్యం కుదుర్చుకుని, ఇప్పుడు ప్రపంచంలో కెల్లా అతి పెద్ద కార్ కంపెనీలలో ఒకటిగా ఉంది.

7. హోండా

ఈ జాబితాలో ఏడవ స్థానంలో ఉన్నది జపనీస్ కార్ బ్రాండ్ హోండా. ఈ కంపెనీ 1946లో సోయిచిరో హోండా, టాకియో ఫుజిసావాలు స్థాపించారు. ఈ కంపెనీ హెడ్‌క్వార్టర్స్ జపాన్‌లోని టోక్యోలో ఉంది. ప్రస్తుతం ఈ బ్రాండ్ కేవలం కార్ల వ్యాపారంలోనే కాకుండా అనేక రంగాలలో వ్యాపారం సాగిస్తోంది.

6. సుబారు

జపనీస్ కార్ కంపెనీ సుబారు పెర్ఫార్మెన్స్ కార్లు తయారు చేయటంలో మంచి పేరు కలిగి ఉంది. ఈ కంపెనీ 1953లో కెంజీ కిటా స్థాపించారు. జపాన్‌లోని టోక్యోలో ఉన్న ఎబిసులో సుబారు హెడ్‌క్వార్టర్స్ ఉంది. సిస్టమ్యాట్రికల్ ఆల్-వీల్ డ్రైవ్ సిస్టమ్‌ను ఉపయోగించిన తొలి కంపెనీ సుబారునే.

5. జనరల్ మోటార్స్

ఈ జాబితాలో ఐదవ స్థానంలో ఉన్న కార్ కంపెనీ, అమెరికాకు చెందిన జనరల్ మోటార్స్. ఈ కంపెనీ ఆధ్వర్యంలో 13 ఆటోమొబైల్ బ్రాండ్స్ ఉన్నాయి, 37కి పైగా దేశాల్లో ఈ వాహనాలు అమ్మడుపోతున్నాయి. జనరల్ మోటార్స్ కంపెనీని 1908లో విలియమ్ సి డ్యురాంట్, ఛార్లెస్ స్టెవార్ట్ మోట్, ఫ్రెడ్రిక్ ఎల్ స్మిత్‌లు ప్రారంభించారు.

4. టొయోటా

ఈ జాబితాలో నాల్గవ స్థానంలో ఉన్నది జపనీస్ కార్ కంపెనీ టొయోటా. ఈ సంస్థను 1937లో కీచిరో టొయోడా స్థాపించారు. జులై 2014లో ఈ కంపెనీ, మార్కెట్ క్యాపిటలైజేషన్ పరంగా జపాన్‌లో కెల్లా అతిపెద్ద కంపెనీగా అవతరించింది. అంతేకాదు.. ఇది ప్రపంచంలో కెల్లా అత్యధికంగా హైబ్రిడ్ కార్లను తయారీ చేసే కంపెనీ కూడా.

3. డాడ్జ్

ఈ జాబితాలో మూడవ స్థానంలో ఉన్నది అమెరికాకు చెందిన కార్ బ్రాండ్ డాడ్జ్. ఈ కంపెనీ ప్రధాన కార్యాలయం మిచిగాన్‌లో ఉంది. ఈ సంస్థను 1900లో డాడ్జ్ బ్రదర్స్, హోరాస్ ఎల్గిన్, జాన్ ఫ్రాన్సిస్‌లు స్థాపించారు. ప్రస్తుతం ఈ కంపెనీ ఫియట్-క్రైస్లర్ గ్రూప్ ఆధ్వర్యంలో ఉంది. డాడ్జ్ తయారు చేసిన కొన్ని మజిక్యులర్ కార్స్ అంటే, అమెరికన్లకు ఇప్పటికీ క్రేజే.

2. జీప్

ఈ జాబితాలో రెండవ స్థానంలో ఉన్నది అమెరికన్ బ్రాండ్ జీప్. జీప్ బ్రాండ్ నుంచి తొలిసారిగా 1941లో విల్లీస్ జీప్‌స్టర్ మోడల్ మార్కెట్లోకి వచ్చింది. అప్పట్లో ఈ మోడల్‌ను అమెరికా సైన్యం ఎక్కువగా ఉపయోగించేంది. ఆ తర్వాత ఈ మోడల్ కస్టమర్లకు కూడా అందుబాటులోకి వచ్చింది. ప్రస్తుతం ఈ బ్రాండ్ కూడా ఫియట్-క్రైస్లర్ కైవసంలో ఉంది.

1. ఫోర్డ్

గడచిన సంవత్సరంలో ప్రజలు గూగుల్‌లో అత్యధికంగా శోధించిన కార్ బ్రాండ్, అమెరికాకు చెందిన ఫోర్డ్. ఫోర్డ్ సంస్థను 1903లో హెన్రీ ఫోర్డ్ స్థాపించారు. అమెరికాలో జనరల్ మోటార్స్ తర్వాత అత్యధికంగా అమ్మడుపోయేవి ఫోర్డ్ వాహనాలే.