కొత్త 2021 రాయల్ ఎన్‌ఫీల్డ్ హిమాలయన్ మోటార్‌సైకిల్ వస్తోందోచ్..

కొత్త 2021 రాయల్ ఎన్‌ఫీల్డ్ హిమాలయన్ మోటార్‌సైకిల్‌లో కంపెనీ కొన్ని కీలకమైన అప్‌గ్రేడ్స్ చేసింది. రైడర్ అనుభవాన్ని మెరుగుపరచడంపై దృష్టి సారించిన రాయల్ ఎన్‌ఫీల్డ్, తన కొత్త హిమాలయన్ మోడల్‌లో ఇప్పుడు రైడర్‌పై వాయు పీడనాన్ని తగ్గించడానికి మరింత పొడవైన విండ్‌షీల్డ్‌ను జోడించనుంది.

అలాగే, రైడర్ కంఫర్ట్ కోసం ఇందులోని సీట్‌ను కూడా ఇప్పుడు మరింత దృఢమైన ఫోమ్‌తో ఎంతో సౌకర్యంగా ఉండేలా మార్చింది. ఎత్తైన రైడర్లను దృష్టిలో ఉంచుకొని, ముందు వైపు ఫుట్ ర్యాక్‌ని కూడా కంపెనీ రీడిజైన్ చేసింది (ఎత్తైన రైడర్స్ తరచుగా దీని గురించి ఫిర్యాదు చేయటంతో కంపెనీ నిర్ణయం తీసుకుంది).

అదనపు లగేజ్‌ను క్యారీ చేయటం కోసం దీని వెనుక వైపు ఇప్పుడు ఫ్లాట్‌గా ఉండే మెటల్ ప్లేట్ ర్యాక్‌ను కంపెనీ ఆఫర్ చేయనుంది. వీటన్నింటి కన్నా ఇందులో మరో ప్రత్యేకమైన ఫీచర్ ఏంటంటే, కంపెనీ ఇటీవలే విడుదల చేసిన తమ మీటియోర్ 350లో ఆఫర్ చేసిన గూగుల్ మ్యాప్స్ ఆధారిత ట్రిప్పర్ నావిగేషన్‌ను కూడా ఇందులో ఆఫర్ చేయనుంది.

పైన పేర్కొన్న మార్పులతో పాటుగా కొత్త 2021 రాయల్ ఎన్‌ఫీల్డ్ హిమాలయన్ కొత్తగా గ్రానైట్ బ్లాక్, మిరాజ్ సిల్వర్ మరియు పైన్ గ్రీన్ అనే మూడు ఆకర్షణీమయైన రంగులలో లభ్యం కానుంది. ఇవి కాకుండా, హిమాలయన్ స్నో వైట్, గ్రానైట్ బ్లాక్, రాక్ రెడ్, లేక్ బ్లూ, గ్రావెల్ గ్రే మరియు స్లేట్ గ్రే ఆరు ఇతర రంగులలో కూడా లభిస్తోంది.

కొత్త హిమాలయన్ మోటార్‌సైకిల్‌లో గూగుల్ మ్యాప్స్ ఆధారిత టిప్పర్ నావిగేషన్ చాలా ముఖ్యమైన అప్‌గ్రేడ్‌గా చెప్పుకోవచ్చు. ఈ ఫీచర్ కారణంగా, ఇది పూర్తి ఆఫ్-రోడ్ అడ్వెంచర్ మోటార్‌సైకిల్‌గా మారుతుంది. ఈ బైక్‌పై సుదూర ప్రయాణాలు, కొత్త ప్రాంతాలకు వెళ్లే వారికి ఈ ట్రిప్పర్ నావిగేషన్ ఫీచర్ ఎంతగానో ఉపయోగపడుతుంది.

ఈ మార్పుల మినహా, కొత్త 2021 రాయల్ ఎన్‌ఫీల్డ్ హిమాలయన్ మోటార్‌సైకిల్‌లో ఇంజన్ పరంగా ఎలాంటి మార్పు ఉండబోదని తెలుస్తోంది. ఇందులోని 411సిసి సింగిల్ సిలిండర్ ఇంజన్ గరిష్టంగా 24.3 బిహెచ్‌పి పవర్‌ను మరియు 32 ఎన్ఎమ్ టార్క్‌ను ఉత్పత్తి చేస్తుంది. గేర్‌బాక్స్‌లో కూడా ఎలాంటి మార్పు ఉండబోదు.

ఈ కొత్త మోటార్‌సైకిల్‌లో చేసిన అప్‌గ్రేడ్స్ మరియు జోడించిన అదనపు ఫీచర్ల కారణంగా, దీని ధర కూడా ప్రస్తుత రాయల్ ఎన్‌ఫీల్డ్ హిమాలయన్ మోడల్ కన్నా అధికంగా ఉండొచ్చని అంచనా. త్వరలోనే దీనికి సంబంధించిన మరిన్ని వివరాలు తెలిసే అవకాశం ఉంది.

ఇదిలా ఉంటే, రాయల్ ఎన్‌ఫీల్డ్ అందిస్తున్న రెండు 650 మోటార్‌సైకిల్స్ మరియు క్లాసిక్ 350 మోడల్‌లో కూడా కంపెనీ అప్‌గ్రేడెడ్ వెర్షన్లను ప్రవేసపెట్టేందుకు సన్నాహాలు చేస్తోంది. బహుశా ఈ మోడళ్లలో కూడా కంపెనీ తమ లేటెస్ట్ కనెక్టింగ్ టెక్నాలజీ ఫీచర్‌ను ఆఫర్ చేయవచ్చని తెలుస్తోంది.

రాయల్ ఎన్‌ఫీల్డ్ ఇటీవలే భారత మార్కెట్లోని తమ అన్ని మోటార్‌సైకిళ్ల ధరలను పెంచింది. కస్టమర్ ఎంచుకునే మోడల్ మరియు వేరియంట్‌ను బట్టి ధరలు రూ.3,000 వరకూ పెరిగాయి. - రాయల్ ఎన్‌ఫీల్డ్ మోటార్‌సైకిళ్ల కొత్త ప్రైస్ లిస్ట్ కోసం ఈ లింకుపై క్లిక్ చేయండి.

మూలం: MotorBeam