రాయల్ ఎన్‌ఫీల్డ్ నుంచి ఓ కొత్త 400సీసీ ఇంజన్!

రాయల్ ఎన్‌ఫీల్డ్ ప్రస్తుతం మార్కెట్లో అందిస్తున్న మోటార్‌సైకిళ్లలో సింగిల్ సిలిండర్, ఎయిర్ కూల్డ్ 346సీసీ ఇంజన్‌ను మరియు 499సీసీ ఇంజన్‌లను ఉపయోగిస్తుంది. ఈ రెండు ఇంజన్లకు మధ్యలో ఈ కొత్త 400సీసీ ఇంజన్‌ను ప్రవేశపెట్టనున్నారు.

ప్రస్తుతం కంపెనీ అందిస్తున్న 346సీసీ ఇంజన్ గరిష్టంగా 20 హెచ్‌పిల శక్తిని, 28 ఎన్ఎమ్‌ల టార్క్‌ను ఉత్పత్తి చేస్తుండగా, 499సీసీ ఇంజన్ గరిష్టంగా 28 హెచ్‌పిల శక్తిని, 41 ఎన్ఎమ్‌ల టార్క్‌ను ఉత్పత్తి చేస్తుంది. కాగా.. ఈ కొత్త 400సీసీ ఇంజన్ గరిష్టంగా 22 హెచ్‌పిల శక్తిని, 25 ఎన్ఎమ్‌ల టార్క్‌ను ఉత్పత్తి చేయవచ్చని అంచనా.

రాయల్ ఎన్‌ఫీల్డ్ అందిస్తున్న 346సీసీ ఇంజన్ కలిగిన బైక్ ధర రూ.1 లక్షకు ఎగువన మరియు 499సీసీ ఇంజన్ కలిగిన బైక్ ధర రూ.1.5 లక్షలకు పైగా ఉన్న నేపథ్యంలో.. ఈ కొత్త 400సీసీ ఇంజన్ కలిగిన బైక ధర ఈ రెండింటికి మధ్యలో ఉండొచ్చని (సుమారు 1.2 లక్షలు) అంచనా.

వాస్తవానికి ఈ కొత్త 400సీసీ ఇంజన్ ప్రస్తుతం కంపెనీ అందిస్తున్న 346సీసీ ఇంజన్ లార్జర్ వెర్షన్ అనే చెప్పాలి. ఈ ఇంజన్‌ను మోడిఫై చేసి, ట్యూనింగ్‌ను పెంచి కొత్త 400సీసీ ఇంజన్‌ను తయారు చేయనున్నట్లు సమాచారం. ఇలా చేయటం వలన కొత్త ఇంజన్ ఉత్పాదక వ్యయం చాలా వరకు తగ్గుతుంది, ఫలితంగా సరమైన ధరకే ఈ బైక్‌ను ఆఫర్ చేసే అవకాశం ఉంటుంది.

రాయల్ ఎన్‌ఫీల్డ్ ఇదివరకే ఈ తరహా ప్రయోగం చేసింది. కంపెనీ అందిస్తున్న 499సీసీ ఇంజన్‌ను మోడిఫై చేసి సింగిల్ సిలిండర్ 535సీసీ ఇంజన్‌ను సృష్టించింది. ప్రస్తుతం కంపెనీ విక్రయిస్తున్న కాంటినెంటల్ జిటి కెఫే రేసర్ స్టయిల్ మోటార్‌సైకిల్‌లో ఉపయోగిస్తున్నది ఈ 535సీసీ ఇంజన్‌నే. ఇది గరిష్టంగా 29 హెచ్‌పిల శక్తిని ఉత్పత్తి చేస్తుంది.

రాయల్ ఎన్‌ఫీల్డ్ ఇంజన్ ఫ్యామిలీలో ఈ కొత్త 400సీసీ ఇంజన్ వచ్చి చేరితే, భారత్‌లో కంపెనీ ఆఫర్ చేయనున్న ఇంజన్ల సంఖ్య నాలుగుకి చేరుకోనుంది.