560 కి.మీ రేంజ్.. 16 స్పీకర్ల సౌండ్.. ఇది కారు కాదు రోడ్ల మీద తిరిగే ప్రైవేట్ థియేటర్

భారతదేశపు రోడ్లపై ఇప్పుడు ఎలక్ట్రిక్ వాహనాల సందడి కొత్త పుంతలు తొక్కుతోంది. ముఖ్యంగా స్వదేశీ దిగ్గజం మహీంద్రా అండ్ మహీంద్రా తన ఎలక్ట్రిక్ ఎస్‌యూవీ పోర్ట్‌ఫోలియోను మరింత పటిష్టం చేస్తూ, విలాసానికి సరికొత్త నిర్వచనం ఇచ్చేలా XEV 9e సినీలక్స్ ఎడిషన్ (CineLux Edition)ను మార్కెట్లోకి ప్రవేశపెట్టింది. టెస్లా సైబర్‌ట్రక్‌ను తలపించేలా అత్యంత ఆధునికమైన ఫ్యూచరిస్టిక్ డిజైన్, సాధారణంగా లగ్జరీ కార్లలో మాత్రమే కనిపించే హై-ఎండ్ ఫీచర్లతో రూపొందిన ఈ కారు ఇప్పుడు ఆటోమొబైల్ ప్రపంచంలో చర్చనీయాంశంగా మారింది. ఈ ప్రత్యేక ఎడిషన్ విశేషాలను పరిశీలిస్తే, ఇది కేవలం రవాణా సాధనంగానే కాకుండా ఒక కదిలే విలాసవంతమైన గృహంలా అనిపిస్తుంది.

మహీంద్రా XEV 9e లైనప్‌లో ఇది అత్యంత ప్రీమియం, ఖరీదైన మోడల్‌గా నిలుస్తోంది. దీని ఎక్స్-షోరూమ్ ధరను కంపెనీ రూ.29.35 లక్షలుగా ఖరారు చేసింది. వినియోగదారులు ఎప్పుడెప్పుడా అని ఎదురుచూస్తున్న ఈ కారు బుకింగ్స్ మార్చి 2, 2026 (రేపు) నుంచి ప్రారంభం కానున్నాయి. ఇక డెలివరీల విషయానికి వస్తే, బుక్ చేసుకున్న కస్టమర్లకు మార్చి 10 నుంచి ఈ వాహనాలను అందజేయనున్నట్లు మహీంద్రా స్పష్టం చేసింది.

డిజైన్ పరంగా చూస్తే ఇది రోడ్లపై మెరిసే ఒక బ్లాక్ డైమండ్లా కనిపిస్తుంది. దీని బాడీ లైన్లు అత్యంత షార్ప్‌గా ఉండటమే కాకుండా, ఎక్స్‌క్లూజివ్‌గా ఈ ఎడిషన్ కోసం సాటిన్ బ్లాక్, సాటిన్ వైట్ అనే రెండు విభిన్నమైన, ఆకర్షణీయమైన కలర్ షేడ్స్‌ను అందించారు. ఈ రంగులు కారుకు మరింత రాజసాన్ని అద్దడమే కాకుండా, రోడ్డుపై వెళ్తుంటే అందరి కళ్లు తిప్పుకోలేని విధంగా చేస్తున్నాయి.

ఇక ఈ కారు ఇంటీరియర్ గురించి ఎంత చెప్పుకున్నా తక్కువే. సినీలక్స్ అనే పేరుకు సార్థకత చేకూర్చేలా, లోపలి భాగం ఒక ప్రైవేట్ థియేటర్‌ను లేదా ఒక ఫైవ్ స్టార్ హోటల్ లాంజ్‌ను తలపిస్తుంది. డాష్‌బోర్డ్ అంతటా విస్తరించి ఉన్న ట్రిపుల్ HD డిస్‌ప్లే డ్రైవర్, ప్రయాణికులకు సరికొత్త డిజిటల్ అనుభవాన్ని పంచుతుంది. ముఖ్యంగా మ్యూజిక్ లవర్స్ కోసం ఇందులో ఏర్పాటు చేసిన 16-స్పీకర్ల హర్మాన్ కార్డాన్ ఆడియో సిస్టమ్, డాల్బీ అట్మోస్ సపోర్ట్‌తో వస్తుంది.

దీనివల్ల ప్రయాణంలో సినిమా చూస్తున్నప్పుడు మల్టీప్లెక్స్ థియేటర్ స్థాయి సౌండ్ క్వాలిటీ లభిస్తుంది. అలాగే, 16 మిలియన్ కలర్ ఆప్షన్లతో కూడిన యాంబియంట్ లైటింగ్ సిస్టమ్ మన మూడ్‌కు అనుగుణంగా లోపలి వాతావరణాన్ని మార్చుకునే వీలు కల్పిస్తుంది. సీట్లు, లోపలి అలంకరణలో వాడిన చెస్టనట్ బ్రౌన్, నోక్టెర్న్ బ్లాక్ లెదరెట్ ఫినిషింగ్ కారుకు అత్యంత ఖరీదైన రూపాన్ని ఇచ్చాయి.

పర్ఫామెన్స్ విషయానికి వస్తే.. మహీంద్రా XEV 9e సనీలక్స్ ఎడిషన్ ఎక్కడా తగ్గడం లేదు. ఇందులో వాడిన 79 kWh భారీ బ్యాటరీ ప్యాక్ ఒక్కసారి ఫుల్ ఛార్జ్ చేస్తే ఏకంగా 656 కిలోమీటర్ల ప్రయాణ దూరాన్ని ఇస్తుందని కంపెనీ ధృవీకరించింది. వాస్తవ పరిస్థితుల్లో మన రోడ్లపై సాధారణ ట్రాఫిక్ ఉన్నప్పటికీ, ఇది సులభంగా 500 కిలోమీటర్లకు పైగా రేంజ్ ఇస్తుంది, ఇది లాంగ్ ట్రిప్పులకు వెళ్లేవారికి పెద్ద ఊరట.

సేఫ్టీ, టెక్నాలజీలో కూడా మహీంద్రా ప్యాక్ త్రీ ఫీచర్లతో రాజీ పడలేదు. AR హెడ్స్-అప్ డిస్‌ప్లే, హ్యాండ్స్‌ఫ్రీ పార్క్ అసిస్ట్ వంటి ఫీచర్లు డ్రైవింగ్‌ను సులభతరం చేస్తే, సెక్యూర్ 360 ప్రో, ఐడెంటిటీ డ్రైవర్ మానిటరింగ్ సిస్టమ్స్ ప్రయాణికులకు రక్షణ కవచంలా నిలుస్తాయి. పెంపుడు జంతువుల కోసం ప్రత్యేకంగా రూపొందించిన PawPal HVAC మోడ్, ఫోన్‌నే కీగా మార్చే డిజిటల్ కీ వంటి ఫీచర్లు ఈ కారును టెక్నాలజీ అద్భుతంగా మార్చాయి.

ప్రస్తుతం భారత మార్కెట్లో టాటా హారియర్ ఈవీ, సఫారీ ఈవీ, హ్యుందాయ్ అయానిక్ 5 వంటి మోడళ్లకు ఈ మహీంద్రా సనీలక్స్ ఎడిషన్ సవాలు విసురుతోంది. రూ.30 లక్షల బడ్జెట్‌లో ఇంతటి లగ్జరీ, రేంజ్ ఇచ్చే ఎస్‌యూవీ మరొకటి లేదని విశ్లేషకులు భావిస్తున్నారు.

ముఖ్యంగా అంతర్జాతీయ బ్రాండ్ టెస్లా లాంటి డిజైన్‌ను కోరుకునే వారికి మహీంద్రా ఒక అద్భుతమైన దేశీ ప్రత్యామ్నాయంగా నిలిచింది. పర్యావరణ హితమైన ప్రయాణాన్ని అత్యంత విలాసవంతంగా సాగించాలనుకునే వారికి ఈ కారు ఒక సరైన ఎంపిక. ఆసక్తి ఉన్నవారు రేపటి నుంచే మహీంద్రా వెబ్‌సైట్ లేదా సమీప డీలర్ల ద్వారా తమ కలల కారును బుక్ చేసుకోవచ్చు.