సన్‌రూఫ్ మర్చిపోండి..రూ.50 లక్షల రేంజ్‌లో థ్రిల్ కలిగించే డ్రైవింగ్.. మినీ కూపర్ కన్వర్టిబుల్ రివ్యూ

2025 మినీ కూపర్ కన్వర్టిబుల్ (Mini Cooper Convertible) తాజాగా భారత మార్కెట్లోకి అడుగుపెట్టింది. బోల్డ్ డిజైన్‌ను సరికొత్త టెక్నాలజీని మిళితం చేస్తూ.. ఇది థ్రిల్లింగ్ ఓపెన్-టాప్ డ్రైవింగ్ అనుభవాన్ని అందిస్తుంది. ఈ కొత్త వెర్షన్ మినీ క్లాసిక్ స్లైట్ కొనసాగిస్తూనే, మోడ్రన్ ఫీచర్లను జోడించడం విశేషం. ముఖ్యంగా, సరదాగా, చురుకుగా డ్రైవ్ చేయగలిగే వాహనాన్ని కోరుకునే కొనుగోలుదారులను ఇది లక్ష్యంగా చేసుకుంది. 2025 మినీ కూపర్ కన్వర్టిబుల్‌ కారు రివ్యూ తెలుసుకుందాం.

ఎక్స్‌టీరియర్, డిజైన్ హైలైట్స్
2025 మినీ కూపర్ కన్వర్టిబుల్ ఎక్స్‌టీరియర్ డిజైన్ దాని హార్డ్‌టాప్ వెర్షన్‌ను పోలి ఉంటుంది. ఐకానిక్ మినీ డిజైన్‌ను స్పష్టంగా ప్రదర్శిస్తుంది. స్పెషల్ హెడ్‌ల్యాంప్స్ ఇంటిగ్రేటెడ్ డేటైమ్ రన్నింగ్ లైట్లు (DRLs), అధిక, తక్కువ బీమ్‌ల కోసం ఒకే ప్రొజెక్టర్‌ను కలిగి ఉంటాయి. ఈ కారు కూపర్ ఎస్ బ్యాడ్జింగ్‌ను ఎరుపు రంగులో కలిగి ఉండటం, పియానో బ్లాక్, కాపర్ ఫినిషింగ్‌లు దాని రూపాన్ని మరింత మెరుగుపరుస్తాయి.

ఇది ఓషన్ వేవ్ గ్రీన్, చిల్లీ రెడ్, సన్నీ సైడ్ యెల్లో, బ్రిటిష్ రేసింగ్ గ్రీన్ వంటి ఆకర్షణీయమైన రంగులలో లభిస్తుంది. అడ్వాన్స్‌డ్ డ్రైవర్-అసిస్టెన్స్ సిస్టమ్స్ (ADAS) కోసం రాడార్ సెన్సార్ ఫార్వర్డ్-ఫేసింగ్ కెమెరాతో కలిసి పనిచేస్తుంది. సైడ్ డిజైన్‌లో R18 అల్లాయ్ వీల్స్, కాంట్రాస్ట్‌గా ఉండే తెలుపు ORVM కవర్లు ఉన్నాయి.

దిగువ గ్రిల్ పియానో ​​బ్లాక్ కలర్లో, మ్యాట్ బ్లాక్ స్కిడ్ ప్లేట్లు దృఢత్వాన్ని పెంచుతాయి. సైడ్ డిజైన్ హార్డ్‌టాప్‌ను పోలి ఉంటుంది.వెనుక భాగంలో మ్యాట్రిక్స్ LED టెయిల్ లైట్లు మల్టీ డిజైన్లలో వెలగడం చాలా ప్రత్యేకంగా ఉంది.

ఇంటీరియర్, టెక్నాలజీ
2025 మినీ కూపర్ కన్వర్టిబుల్ లోపలి భాగం బేజ్, ముదురు నీలిరంగు అనే రెండు కలర్ థీమ్‌లతో లభిస్తుంది. రెండింటిలోనూ కాంట్రాస్ట్ కుట్టు, మినీ లోగోలు కనిపిస్తాయి. సీట్లు సౌకర్యవంతంగా ఉంటాయి. అయినప్పటికీ వెనుక సీట్లు చిన్నవిగా ఉండి, లిమిటెడ్ లెగ్‌రూమ్‌తో పిల్లలకు లేదా సామానుకు మాత్రమే అనుకూలంగా ఉంటాయి.

వెనుక ప్రయాణీకులకు కప్ హోల్డర్, అడ్జస్ట్ చేయగల హెడ్‌రెస్ట్‌లు ఉన్నాయి. స్టీరింగ్ వీల్ దాని ప్రత్యేకమైన రెండు-స్పోక్ డిజైన్‌ను నిర్వహిస్తుంది. కారు మధ్యలో ఉన్న సెంట్రల్ సర్క్యులర్ OLED డిస్‌ప్లే ఇన్ఫోటైన్‌మెంట్, ఇన్స్ట్రుమెంట్ క్లస్టర్ రెండింటికీ పనిచేస్తుంది. ఈ స్క్రీన్‌ చుట్టూ యాంబియంట్ లైటింగ్ రాత్రిపూట డైనమిక్ వాతావరణాన్ని సృష్టిస్తుంది.

డ్రైవర్లు గో-కార్ట్, కోర్, గ్రీన్ అనే మూడు డ్రైవింగ్ మోడ్‌లను ఎంచుకోవచ్చు. ఇతర ఫీచర్లలో హెడ్స్-అప్ డిస్‌ప్లే, చిన్న స్టోరేజ్ కంపార్ట్‌మెంట్, ఆర్మ్‌రెస్ట్‌పై విండో కంట్రోల్స్ ఉన్నాయి. ఈ కారు స్పెషల్ ఎట్రాక్షన్ దాని ఎలక్ట్రిక్ రూఫ్, ఇది కేవలం 18 సెకన్లలో పూర్తిగా తెరవడం లేదా క్లోజ్ చేయగలదు, గంటకు 30 కిలోమీటర్ల వేగంతో ప్రయాణిస్తున్నప్పుడు కూడా ఇది పనిచేస్తుంది.

ఇంజిన్, పవర్, కొలతలు
ఈ 2025 మినీ కూపర్ కన్వర్టిబుల్ బానెట్ కింద 2.0-లీటర్ టర్బోచార్జ్డ్ పెట్రోల్ ఇంజిన్‌ను అమర్చారు. ఈ ఇంజిన్ 201 bhp పవర్, 300 Nm టార్క్‌ను ఉత్పత్తి చేస్తుంది. 7-స్పీడ్ డ్యూయల్-క్లచ్ ట్రాన్స్‌మిషన్ ముందు చక్రాలకు పవర్ అందిస్తుంది. కన్వర్టిబుల్ రూఫ్ కారణంగా అదనంగా 100 కిలోల బరువు పెరిగినప్పటికీ, ఈ కారు కేవలం 6.9 సెకన్లలో 0-100 km/h వేగాన్ని అందుకోగలదు. గంటకు 240 కి.మీ గరిష్ట వేగంతో ప్రయాణించగలదు.

కొలతల విషయానికి వస్తే, ఇది 3,821 ఎంఎం పొడవు, 1,727ఎంఎం వెడల్పు, 1,415ఎంఎం ఎత్తును కలిగి ఉంది, దీని వీల్‌బేస్ 2,495ఎంఎం ఉంది. సిటీ డ్రైవింగ్‌కు గ్రౌండ్ క్లియరెన్స్ సరిపోతుంది. పెట్రోల్ వేరియంట్‌పై ARAI-సర్టిఫైడ్ లీటరుకు 17కిమీ మైలేజ్ లభించే అవకాశం ఉంది.

డ్రైవింగ్ అనుభవం, ఫైనల్ గా
2025 మినీ కూపర్ కన్వర్టిబుల్ దాని ప్రత్యేకమైన డిజైన్, క్వాలిటీ ఇంటీరియర్, ఓపెన్-టాప్ డ్రైవింగ్ అనుభూతితో కచ్చితంగా ఆకట్టుకుంటుంది. ఇది క్లాసిక్ మినీ శైలిని మోడ్రన్ టెక్నాలజీ, డైనమిక్ పర్ఫామెన్స్ మిళితం చేస్తుంది. ఇది డిసెంబర్ 2025 లో భారతదేశంలో ప్రారంభమయ్యే అవకాశం ఉంది. దీని ధర రూ.45.00 లక్షల నుంచి రూ.50.00 లక్షల (ఎక్స్-షోరూమ్) మధ్య ఉంటుందని అంచనా.

ప్రత్యక్షంగా కన్వర్టిబుల్ ప్రత్యర్థులు లేనప్పటికీ, ఇది ఆడి A4, BMW 2 సిరీస్ గ్రాన్ కూపే వంటి ఎంట్రీ-లెవెల్ లగ్జరీ సెడాన్‌లతో పోటీ పడుతుంది. సరదాగా ఉండే రెండవ కారుగా లేదా వీకెండ్ డ్రైవ్‌ల కోసం ఈ కారు చాలా ఆకర్షణీయమైన ఆప్షన్‎గా నిలుస్తుంది.