రూ.10.49 లక్షల డస్టర్‌ను లైట్ తీసుకోకండి.. ఇంజిన్, మైలేజ్, పనితీరు పూర్తి రివ్యూ!

రెనాల్ట్ తన కొత్త తరం డస్టర్ ఎస్‌యూవీని భారత మార్కెట్లో మరింత ఆకర్షణీయంగా తీసుకురావడానికి 1.0-లీటర్ టర్బో-పెట్రోల్ ఇంజిన్‌తో కూడిన ఎంట్రీ-లెవల్ వేరియంట్‌ను అందుబాటులోకి తీసుకొచ్చింది. రూ.10.49 లక్షల (ఎక్స్-షోరూమ్) ప్రారంభ ధరతో వచ్చిన ఈ మోడల్, తక్కువ బడ్జెట్‌లో ఒక పూర్తి స్థాయి మిడ్‌సైజ్ ఎస్‌యూవీని కోరుకునే కొనుగోలుదారులను లక్ష్యంగా చేసుకుంది. డస్టర్ సిరీస్‌లో ఇది అత్యంత అందుబాటు ధర కలిగిన వేరియంట్ అయినప్పటికీ, వినియోగదారులకు అవసరమైన ప్రాక్టికాలిటీ, సౌకర్యం, డ్రైవింగ్ అనుభవంలో ఎలాంటి రాజీ పడలేదని రెనాల్ట్ చెబుతోంది. ఈ మోడల్‌లో కంపెనీ ఇప్పటికే తన ఇతర వాహనాల్లో ఉపయోగించి మంచి పేరును సంపాదించిన మూడు సిలిండర్ల టర్బో-పెట్రోల్ ఇంజిన్‌ను అందించింది.

ఈ 1.0-లీటర్ టర్బో ఇంజిన్‌కు కేవలం 6-స్పీడ్ మాన్యువల్ గేర్‌బాక్స్ మాత్రమే జత చేశారు. ఇది డస్టర్ లైనప్‌లో ఉన్న మరింత శక్తివంతమైన 1.3-లీటర్ టర్బో వేరియంట్ కంటే దిగువన స్థానాన్ని పొందింది. అయితే రోజువారీ వినియోగం, నగర రోడ్లపై డ్రైవింగ్, హైవే ప్రయాణాలకు ఈ ఇంజిన్ ఎంతవరకు సరిపోతుందో తెలుసుకోవడానికి మేము ఢిల్లీ-ఎన్‌సీఆర్ ప్రాంతంలో ఈ కొత్త రెనాల్ట్ డస్టర్‌ను టెస్ట్ డ్రైవ్ చేశాము.

మొదటి చూపులోనే డస్టర్ తన బలమైన ఎస్‌యూవీ డిజైన్‌తో ఆకట్టుకుంటుంది. రోడ్డుపై మంచి ప్రెజెన్స్‌తో పాటు, ఈ వేరియంట్ కూడా డస్టర్‌కు ఉన్న ప్రత్యేక గుర్తింపును కొనసాగిస్తుంది. ముఖ్యంగా తక్కువ ధరలో ఒక విశాలమైన, ప్రాక్టికల్, కుటుంబ అవసరాలకు సరిపోయే ఎస్‌యూవీ కోసం చూస్తున్న వారికి ఈ 1.0-లీటర్ మాన్యువల్ వేరియంట్ మంచి ఎంపికగా కనిపిస్తోంది. మా డ్రైవింగ్‌లో కలిగిన అనుభూతి గురించి ఈ కింది కథణంలో.

ఇందులో కొత్తగా ఏముంది?

రెనాల్ట్ డస్టర్ 1.0-లీటర్ మాన్యువల్ వేరియంట్ మూడు ట్రిమ్‌లలో అందుబాటులో ఉంది. అవి అథెంటిక్, ఎవల్యూషన్, టెక్నో. మరోవైపు, టాప్-ఎండ్ టెక్నో+, ఐకానిక్ వేరియంట్‌లు ప్రస్తుతం 1.3-లీటర్ టర్బో-పెట్రోల్ మోడల్‌కే పరిమితమయ్యాయి. అయితే ఇది ఎంట్రీ-లెవల్ లేదా మిడ్-స్పెక్ వేరియంట్ అయినప్పటికీ, బయటకు చూస్తే టాప్ వేరియంట్‌ల కంటే తక్కువగా కనిపించదు.

డస్టర్‌కు ప్రత్యేక గుర్తింపుగా నిలిచే బలమైన SUV డిజైన్ ఈ వేరియంట్‌లో కూడా అలాగే కొనసాగింది. ఆకర్షణీయమైన బోనెట్ డిజైన్, ముందుభాగంలో పెద్దగా కనిపించే 'Duster' లెటరింగ్, భారీ స్కిడ్ ప్లేట్లు, బాడీ క్లాడింగ్, రూఫ్ రైల్స్ వంటి అంశాలు దీని రగ్గడ్ లుక్‌ను మరింత పెంచుతున్నాయి. అంతేకాకుండా, ఈ వేరియంట్ కొనుగోలుదారులు ఎక్స్‌టీరియర్ ఫీచర్ల విషయంలో కూడా పెద్దగా రాజీ పడాల్సిన అవసరం లేదు.

డస్టర్ 1.0-లీటర్ MTలో పూర్తి LED లైటింగ్ ఉంది. ఆటోమేటిక్ LED హెడ్‌ల్యాంప్స్, LED ఫాగ్ ల్యాంప్స్, LED టెయిల్ ల్యాంప్స్, వెనుక భాగంలో సిగ్నేచర్ లైట్ బార్ ఉన్నాయి. టాప్ వేరియంట్‌లతో పోలిస్తే తేడా అల్లాయ్ వీల్స్‌లో కనిపిస్తుంది. 1.3-లీటర్ వేరియంట్‌లలో 18-అంగుళాల అల్లాయ్ వీల్స్ ఉంటే, దీనిలో 17-అంగుళాల వీల్స్‌ను అందించారు. డిజైన్‌లో మార్పులు ఉన్నాయి. అయితే స్టైలింగ్, రోడ్ ప్రెజెన్స్ విషయంలో పెద్దగా తేడా కనిపించదు.

క్యాబిన్‌లోకి అడుగుపెడితే, టాప్ వేరియంట్‌ల మాదిరిగానే డ్యాష్‌బోర్డ్ లేఅవుట్ కనిపిస్తుంది. అయితే మెటీరియల్స్, ఫినిషింగ్ విషయంలో మార్పులు ఉన్నాయి. ఐకానిక్ వేరియంట్‌లో లభించే లెదరెట్ అప్హోల్స్టరీ స్థానంలో ఇందులో బ్రౌన్-బ్లాక్ టూ-టోన్ ఫ్యాబ్రిక్ సీట్లు అందించారు. అయినప్పటికీ అవి ప్రీమియం ఫీల్‌ను అందిస్తాయి. డ్యాష్‌బోర్డ్, డోర్ ప్యాడ్స్‌పై కూడా బ్రౌన్ ఫ్యాబ్రిక్ ట్రీట్‌మెంట్ ఇవ్వగా, టాప్ వేరియంట్‌లలో కనిపించే ఫాక్స్ కార్బన్-ఫైబర్ ఫినిష్ స్థానంలో వైట్ కాంట్రాస్ట్ ఇన్‌సర్ట్‌ను ఉపయోగించారు.

అయితే టాప్-ఎండ్ ఐకానిక్ వేరియంట్‌తో పోలిస్తే కొన్ని ప్రీమియం ఫీచర్లు ఇందులో ఉండవు. పవర్డ్ మరియు వెంటిలేటెడ్ ఫ్రంట్ సీట్లు, 360-డిగ్రీ కెమెరా, ADAS సేఫ్టీ టెక్నాలజీ, అంబియంట్ లైటింగ్, ఎయిర్ ప్యూరిఫైయర్, ఫ్రంట్ పార్కింగ్ సెన్సర్లు, సెలెక్టబుల్ స్టీరింగ్ మోడ్‌లు మరియు 10.25-అంగుళాల డిజిటల్ ఇన్‌స్ట్రుమెంట్ క్లస్టర్ వంటి ఫీచర్లను ఇందులో అందించలేదు. వాటి స్థానంలో 7-అంగుళాల డిజిటల్ డిస్ప్లేను ఇచ్చారు.

అయినప్పటికీ ఫీచర్ల జాబితా మాత్రం ఆకట్టుకునే విధంగానే ఉంది. 10.1-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, కనెక్టెడ్ కార్ టెక్నాలజీ, వైర్‌లెస్ ఫోన్ ఛార్జర్, ఆరు స్పీకర్ల అర్కామిస్ ఆడియో సిస్టమ్, డ్యూయల్-జోన్ ఆటోమేటిక్ క్లైమేట్ కంట్రోల్, క్రూయిజ్ కంట్రోల్, పానోరమిక్ సన్‌రూఫ్, పవర్డ్ టెయిల్‌గేట్, పుష్-బటన్ స్టార్ట్, ఎలక్ట్రిక్‌గా మడిచే ORVMలు ఇందులో లభిస్తాయి.

భద్రత పరంగా కూడా డస్టర్ 1.0-లీటర్ MT టెక్నో వేరియంట్ మంచి ప్యాకేజీగా నిలుస్తుంది. ఇందులో ఆరు ఎయిర్‌బ్యాగ్‌లు, ఎలక్ట్రానిక్ స్టెబిలిటీ కంట్రోల్, ట్రాక్షన్ కంట్రోల్, కార్నర్ స్టెబిలిటీ కంట్రోల్, హిల్-స్టార్ట్ అసిస్ట్, రియర్ పార్కింగ్ కెమెరా, టైర్ ప్రెజర్ మానిటరింగ్ సిస్టమ్ మరియు ISOFIX చైల్డ్ సీట్ మౌంట్స్ వంటి సేఫ్టీ ఫీచర్లు ఉన్నాయి.

సీటింగ్ కంఫర్ట్ విషయానికి వస్తే, ముందరి సీట్లు మంచి సపోర్ట్‌ను అందిస్తాయి. వెనుక సీట్లలో కూడా డస్టర్ తన బలాన్ని కొనసాగిస్తుంది. పొడవైన ప్రయాణికులకు కూడా తగినంత మోకాళ్ల స్థలం, హెడ్‌రూమ్ లభించడం వల్ల కుటుంబ వినియోగానికి ఇది అనువైన SUVగా నిలుస్తుంది. వెనుక ప్రయాణికుల కోసం ప్రత్యేక AC వెంట్స్, USB టైప్-C ఛార్జింగ్ పోర్టులు, కప్ హోల్డర్లతో కూడిన ఫోల్డ్-డౌన్ సెంటర్ ఆర్మ్‌రెస్ట్‌ను కూడా అందించారు.

క్యాబిన్ అంతటా అనేక స్టోరేజ్ స్పేస్‌లు, చిన్న చిన్న క్యూబీ హోల్స్ ఉండటం రోజువారీ వినియోగాన్ని మరింత సౌకర్యవంతంగా మారుస్తుంది. అలాగే 518 లీటర్ల భారీ బూట్ స్పేస్ ఈ విభాగంలోనే అతిపెద్ద వాటిలో ఒకటిగా నిలుస్తుంది. అయితే ఒక చిన్న లోపం ఏమిటంటే, ఇందులో స్పేర్ వీల్‌ను అందించకపోవడం.

ఇంజిన్ & పనితీరు

రెనాల్ట్ డస్టర్ 1.0-లీటర్ MTలో 1.0-లీటర్ మూడు సిలిండర్ల టర్బో-పెట్రోల్ ఇంజిన్‌ను అందించారు. కిగర్‌లో ఉపయోగించిన ఇదే ఇంజిన్‌ను డస్టర్ కోసం ట్యూన్ చేయగా, ఇది 100 హెచ్‌పీ పవర్, 166 ఎన్ఎం టార్క్‌ను ఉత్పత్తి చేస్తుంది. దీనికి 6-స్పీడ్ మాన్యువల్ గేర్‌బాక్స్‌ను జత చేశారు. అయితే ఆటోమేటిక్ ట్రాన్స్‌మిషన్ ఆప్షన్ లేకపోవడం కొందరికి నిరాశ కలిగించవచ్చు.

తక్కువ ఆర్‌పీఎమ్‌ల వద్ద స్వల్ప టర్బో ల్యాగ్ ఉన్నప్పటికీ, 2,000 ఆర్‌పీఎమ్ దాటిన తర్వాత ఇంజిన్ మంచి స్పందనను ఇస్తుంది. నగర ట్రాఫిక్‌లో సాఫీగా డ్రైవ్ చేయవచ్చు. హైవేలు లేదా ఎత్తైన రోడ్లపై మాత్రం మెరుగైన పనితీరు కోసం గేర్ డౌన్ చేయాల్సి ఉంటుంది. కుటుంబ అవసరాలకు సరిపడే పనితీరును ఈ ఇంజిన్ అందిస్తుంది.

రైడ్ క్వాలిటీ విషయానికి వస్తే, డస్టర్ తన ప్రత్యేకతను మరోసారి నిరూపించుకుంది. గుంతలు, పాడైన రోడ్లను సస్పెన్షన్ సమర్థవంతంగా ఎదుర్కొంటుంది. హైవేల్లో అధిక వేగంతో ప్రయాణించినప్పటికీ SUV స్థిరంగా ఉంటుంది. అలాగే మలుపుల్లో కూడా మంచి నియంత్రణను చూపిస్తూ నమ్మకమైన డ్రైవింగ్ అనుభవాన్ని అందిస్తుంది.

మైలేజ్
రెనాల్ట్ ప్రకారం డస్టర్ 1.0-లీటర్ MT ARAI సర్టిఫైడ్ మైలేజ్ లీటర్‌కు 19.41 కిలోమీటర్లు. మైలేజ్ పెంచేందుకు ఈకో డ్రైవింగ్ మోడ్‌తో పాటు ఆటోమేటిక్ ఇంజిన్ స్టార్ట్-స్టాప్ టెక్నాలజీని అందించారు. 70 కిలోమీటర్ల నగర, హైవే రోడ్డు మార్గంలో చేసిన పరీక్షలో SUV లీటర్‌కు 18.1 కిలోమీటర్ల వాస్తవ మైలేజ్‌ను అందించింది. సైజు, పనితీరును పరిగణనలోకి తీసుకుంటే ఇది కంపెనీ ప్రకటించిన గణాంకాలకు చాలా దగ్గరగా ఉండటం విశేషం.

చివరగా

కొత్త రెనాల్ట్ డస్టర్ 1.0-లీటర్ MT, డస్టర్‌ను ఒకప్పుడు ప్రజాదరణ పొందేలా చేసిన ప్రధాన లక్షణాలపైనే దృష్టి పెట్టింది. అద్భుతమైన రైడ్ క్వాలిటీ, ఉపయోగకరమైన పనితీరు, బలమైన SUV డిజైన్ మరియు మంచి మైలేజ్‌ను అందుబాటు ధరలో అందించడం దీని ప్రత్యేకత.

1.3-లీటర్ టర్బో వేరియంట్‌తో పోలిస్తే ఈ ఇంజిన్ అంత శక్తివంతంగా కాకపోయినా, రోజువారీ అవసరాలకు సరిపడే పనితీరును అందిస్తుంది. అంతేకాకుండా కొనుగోలు ఖర్చుతో పాటు నిర్వహణ వ్యయాలను కూడా తగ్గిస్తుంది. మిడ్‌సైజ్ SUV సెగ్మెంట్‌లో విలువకు ప్రాధాన్యం ఇచ్చే కొనుగోలుదారులకు రెనాల్ట్ డస్టర్ 1.0-లీటర్ MT ఒక బలమైన ఎంపికగా నిలుస్తుంది.