డీజిల్ గొడవ వద్దు.. రేంజ్ రోవర్‌కే పోటీ ఇచ్చేలా టాటా సఫారీ పెట్రోల్ వెర్షన్ రివ్యూ

భారతీయ ఎస్‌యూవీ మార్కెట్‌లో టాటా సఫారి(Tata Safari)కి ఎప్పుడూ ఒక ప్రత్యేక స్థానం ఉంటుంది. తాజాగా సఫారి తన చరిత్రలో ఒక ముఖ్యమైన అప్‌డేట్‌తో ముందుకు వచ్చింది. అదే కొత్త టర్బో పెట్రోల్ ఇంజిన్ (Turbo Petrol Engine). ఈ కొత్త ఇంజిన్‌తో వచ్చిన మోడల్‌లో ముఖ్యంగా డార్క్ ఎడిషన్ (Dark Edition) దాని ప్రత్యేకమైన ఆల్-బ్లాక్ డిజైన్‌తో అద్భుతంగా ఆకట్టుకుంటుంది. అద్భుతమైన పెర్ఫార్మెన్స్, స్పెషల్ లుక్‌తో వచ్చిన టాటా సఫారీ రివ్యూ చూద్దాం.

ఎక్స్‌టీరియర్ హైలైట్స్
సఫారి డార్క్ ఎడిషన్ చూడగానే ఆకట్టుకునే నల్లటి రూపాన్ని (All-Black Aesthetic) కలిగి ఉంది. సఫారి బ్యాడ్జింగ్‌తో సహా కొన్ని చోట్ల రెడ్ యాక్సెంట్‌లు దీనిని మరింత హైలైట్ చేశాయి. ఈ ఎస్‌యూవీ 19-అంగుళాల పెద్ద అల్లాయ్ వీల్స్‌పై నిలబడి ఉంటుంది. దీనికి రెడ్ బ్రేక్ కాలిపర్‌లు స్పోర్టీ లుక్‌ను ఇస్తాయి.

ముందు భాగంలో LED డేటైమ్ రన్నింగ్ లైట్లు, మెయిన్ హెడ్‌లైట్లు, ఫాగ్ లైట్లు, సఫారి అనే ప్రత్యేక అక్షరాలతో కూడిన ఇంట్రడక్షన్ డిజైన్‎ను ఇది కలిగి ఉంది. వెనుకవైపు, ర్యాప్-అరౌండ్ LED టెయిల్ లైట్స్ దీని మోడ్రన్ లుక్ పూర్తి చేసి, రోడ్డుపై పటిష్టమైన ఉనికిని చాటుతాయి.

ఇంటీరియర్ ఫీచర్లు
సఫారి డార్క్ ఎడిషన్ ఇంటీరియర్ కూడా ఎక్స్‌టీరియర్ థీమ్‌కు అనుగుణంగా రెడ్, బ్లాక్ కలర్ కాంబినేషన్లో వస్తుంది. సీట్లు చాలా సౌకర్యవంతంగా ఉండటమే కాక, ముందు సీట్లలో వెంటిలేషన్, ఎలక్ట్రానిక్ అడ్జస్ట్‌మెంట్ ఫీచర్‌లు ఉన్నాయి. డ్రైవర్ సీటుకు మెమరీ ఫంక్షన్ కూడా ఉంది. రెండవ వరుస ప్రయాణీకులకు లాంగ్ జర్నీలలో సౌకర్యం కోసం వింగ్‌లెట్ సపోర్టుతో అడ్జస్ట్ చేయగల హెడ్‌రెస్ట్‌లు, సన్‌షేడ్‌లు ఉన్నాయి.

వెనుక సీట్లలోని ప్రయాణీకులు ముందు ప్యాసింజర్ సీటును అడ్జస్ట్ చేసి అదనపు లెగ్‌రూమ్ సృష్టించుకునే ఫీచర్ ఉంది. వెనుక సీట్లు కూడా మరింత సౌకర్యం కోసం కొద్దిగా వెనక్కి వాలుతాయి. మూడవ వరుస ప్రయాణీకులకు ప్రత్యేక ఎయిర్ కండిషనింగ్ నియంత్రణలు ఉన్నాయి.

టెక్నాలజీ విషయానికి వస్తే.. 14-అంగుళాల శామ్‌సంగ్-పవర్డ్ ఇన్ఫోటైన్‌మెంట్ స్క్రీన్, ముందు, వెనుక కెమెరాలతో కూడిన డాష్‌క్యామ్ సిస్టమ్ దీనిలో హైలైట్. అదనంగా, పది స్పీకర్లు, సబ్‌వూఫర్‌తో కూడిన ప్రీమియం జేబీఎల్ సౌండ్ సిస్టమ్, డిజిటల్ ఇన్‌స్ట్రుమెంట్ క్లస్టర్, ఆంబియెంట్ లైటింగ్ వంటివి క్యాబిన్‌కు అధునాతన అనుభూతిని ఇస్తాయి.

డ్రైవింగ్ ఎక్సపీరియన్స్
ఈ సఫారికి ప్రధాన అప్‌డేట్ దాని కొత్త 1.5-లీటర్ TGDi టర్బో పెట్రోల్ ఇంజిన్. ఇది 170 PS (168 bhp) పవర్, 280 Nm టార్క్‌ను అందిస్తుంది. ఇది 6-స్పీడ్ మాన్యువల్ లేదా 6-స్పీడ్ ఆటోమేటిక్ ట్రాన్స్‌మిషన్‌తో లభిస్తుంది. డీజిల్ వెర్షన్‌తో పోలిస్తే, ఈ ఇంజిన్ చాలా మెరుగ్గా, శక్తివంతంగా ఉంది.

తక్కువ RPM వద్ద కూడా ఇది ప్రతిస్పందనను అందిస్తుంది. ముఖ్యంగా టర్బోచార్జర్ ఆన్ అయిన తర్వాత, ఎస్‌యూవీ మరింత వేగంగా దూసుకుపోతుంది. మైలేజ్ వివరాలు అధికారికంగా తెలియకపోయినా, ఆటోమేటిక్ వేరియంట్ లీటరుకు 14.8 నుంచి 16.3 కిమీ మధ్య మైలేజీని అందిస్తుందని అంచనా.

కొలతల విషయానికి వస్తే, ఈ ఎస్‌యూవీ పొడవు 4668 mm, వెడల్పు 1922 mm, ఎత్తు 1795 mmగా ఉంది. దీని వీల్‌బేస్ 2741 mm కాగా, గ్రౌండ్ క్లియరెన్స్ 205 mmగా ఉంది. బూట్ స్పేస్ (అన్ని సీట్లు వేసినప్పుడు) 420 లీటర్లు ఉంటుంది. ఈ మోడల్ 6-స్పీడ్ మాన్యువల్, 6-స్పీడ్ ఆటోమేటిక్ (టార్క్ కన్వర్టర్) ట్రాన్స్‌మిషన్ ఆప్షన్‌లలో లభిస్తుంది.

సఫారి మూడు రకాల టెర్రైన్ రెస్పాన్స్ మోడ్‌లను కలిగి ఉంది: నార్మల్, వెట్, ఆఫ్-రోడ్. ఈ మోడ్‌లు విభిన్న రహదారి పరిస్థితులకు అనుగుణంగా కారు పారామితులను సర్దుబాటు చేస్తాయి. సేఫ్టీ విషయంలో కొత్త సఫారి డార్క్ ఎడిషన్ లెవెల్ 2 ADAS (Advanced Driver Assistance Systems)తో సహా అడ్వాన్సుడ్ సేఫ్టీ ఫీచర్లతో వచ్చింది.