ప్రభుత్వానికి పంగనామం: బిఎమ్‌డబ్ల్యూ కారుకి బైక్ నెంబర్

కొందరికి కోట్ల రూపాయల ఆస్తులున్నా కక్కుర్తి మాత్రం పోదు. పన్నులు ఎగ్గొట్టి, ప్రభుత్వానికి పంగనామాలు పెట్టేందుకు పలువురు డబ్బున్న ప్రబుద్ధులు ప్రయత్నిస్తుంటారు. అలాంటి ఓ సంఘటనలో దేశ ఐటి రాజధాని బెంగుళూరులో చోటు చేసుకుంది. బెంగుళూరులో రియల్ ఎస్టేట్ వ్యాపారం చేసే ఓ లియాల్టర్ తన హై-ఎండ్ బిఎమ్‌డబ్ల్యూ కారుకు టూవీలర్ నెంబర్ ప్లేట్ ఉపయోగించి, నగర రోడ్లపై సంచరిస్తుండగా ట్రాఫిక్ పోలీసులకు చిక్కింది. గడచిన రెండేళ్లుగా ఆమె ఈ కారును టూవీల్ రిజిస్ట్రేషన్ నెంబర్‌తోనే ఉపయోగిస్తుంది. తన తప్పును పోలీసులు గుర్తు పట్టకుండా ఉండేందుకు ఆమె ఈ నెంబర్ ప్లేట్‌ను చాలా చిన్న అక్షరాలతో చేయించుకుంది.

ఎలక్ట్రానిక్ సిటీకి చెందిన రీజనల్ ట్రాన్స్‌పోర్ట్ అధికారులు ఆమె కారును సీజ్ చేసి ఆర్టీవోకు తరలించారు. కోరమంగళకు చెందిన మంజుల అనే రియాల్టర్ రెండేళ్ల క్రితం ఓ బిఎమ్‌డబ్ల్యూ కారును కొనుగోలు చేసింది. అప్పటి నుండి ఆమె సదరు కారును రిజిస్ట్రేషన్ చేయించకుండా, దానికి ఓ పాత టూవీలర్ రిజిస్ట్రేషన్ నెంబర్‌ను అటు ప్రభుత్వం, ఇటు ట్రాఫిక్ పోలీసుల కన్ను కప్పి తిరుగుతోంది. పన్ను ఎగవేత వేసే వారిపై ఆర్టీవో నిర్వహించిన ఓ స్పెషల్ డ్రైవ్‌లో మంజుల చేసిన మోసం బయపడిపోయింది. దీంతో సదరు కారు యజమానికి కోర్టు రూ.6.2 లక్షల జరిమానాను విధించింది.