సరికొత్త 2012 రిట్జ్‌ డీజిల్‌ను విడుదల చేసిన మారుతి సుజుకి

భారతదేశపు నెంబర్ వన్ కార్ మేకర్ మారుతి సుజుకి ఇండియా నుంచి కార్ ప్రియులంతా ఎంతో ఆసక్తిగా ఎదురుచూస్తున్న అప్‌గ్రేడెడ్ రిట్జ్ హ్యాచ్‌బ్యాక్ చడి చప్పుడు లేకుండా నేడు మార్కెట్లో విడుదలైంది. ఫేస్‌లిఫ్టెడ్ మారుతి సుజుకి రిట్జ్ కారును కంపెనీ సోమవారం నాడు దేశీయ విపణిలో ప్రవేశపెట్టింది. అయితే, ప్రస్తుతానికి కేవలం డీజిల్ వెర్షన్ రిట్జ్ హ్యాచ్‌బ్యాక్‌ను మాత్రమే మారుతి సుజుకి విడుదల చేసింది.

భారత మార్కెట్లో 2012 వెర్షన్ మారుతి సుజుకి రిట్జ్ హ్యాచ్‌బ్యాక్ ప్రారంభ ధర రూ.5.31 లక్షలు (ఎక్స్-షోరూమ్, ఢిల్లీ)గా ఉంది. ఆకర్షనీయమై డిజైన్, సాటిలేని పెర్ఫామెన్స్, మెరుగైన మైలేజ్‌లను కోరుకునే నేటి తరం కొనుగోలుదారులను దృష్టిలో ఉంచుకొని మారుతి సుజుకి ఈ కారును అప్‌గ్రేడ్ చేసింది. పాత రిట్జ్‌తో పోల్చుకుంటే కొత్త రిట్జ్‌లో 52 మార్పులు ఉన్నాయి.

పాత వెర్షన్ మారుతి సుజుకి రిట్జ్ డీజిల్ వేరియంట్ లీటరు డీజిల్‌కు 21.1 కి.మీ. మైలేజీని మాత్రమే ఇస్తుండగా, కొత్త రిఫ్రెష్డ్ వెర్షన్ మారుతి సుజుకి రిట్జ్ లీటరు డీజిల్‌కు 23.2 కి.మీ. మైలేజీనిస్తుందని కంపెనీ పేర్కొంది. రిట్జ్‌లో తొలిసారిగా కంపెనీ టాప్ ఎండ్ వేరియంట్ (జెడ్‌డిఐ)ను రూ.6.23 లక్షల ధరతో (ఎక్స్-షోరూమ్, ఢిల్లీ)తో పరిచయం చేయటం జరిగింది. ఈ వేరియంట్‌లో అల్లాయ్ వీల్స్, డ్యూయెల్ ఫ్రంట్ ఎయిర్‌బ్యాగ్స్, స్టీరింగ్‌పై ఆడియో కంట్రోల్స్ వంటి ఫీచర్లు లభిస్తాయి.

ఫేస్‌లిఫ్ట్ మారుతి సుజుకి రిట్జ్‌ హ్యాచ్‌బ్యాక్ డీజిల్ వెర్షన్‌లో లభించే వేరియంట్లు వాటి ధరలు ఈ క్రింది విధంగా ఉన్నాయి:
* మారుతి సుజుకి రిట్జ్‌ ఎల్‌డిఐ - రూ. 5.31 లక్షలు
* మారుతి సుజుకి రిట్జ్‌ విడిఐ - రూ. 5.64 లక్షలు
* మారుతి సుజుకి రిట్జ్‌ విడిఐ (ఏబిఎస్) - రూ. 5.82 లక్షలు
* మారుతి సుజుకి రిట్జ్‌ జెడ్‌డిఐ - రూ. 6.23 లక్షలు