మారుతి సుజుకి స్విఫ్ట్ కార్ల ఉత్పత్తి బంద్; స్టాక్ ఖాళీ

మారుతి సుజుకి ఇండియా నుంచి అత్యధికంగా అమ్ముడవుతున్న స్విఫ్ట్ హ్యాచ్‌బ్యాక్ కార్లు స్టాక్ త్వరలోనే ఖాళీ అయిపోనుంది. మానేసర్ ప్లాంటులో లాకౌట్‌లో ఉండటంతో ఈ మోడల్ ఉత్పత్తి పూర్తిగా నిలిచిపోయింది. ప్రస్తుతం ఈ ప్లాంటులో ఉత్పత్తి అయి, స్టాక్ యార్డ్‌లో ఉన్న స్విఫ్ట్ కార్లను కంపెనీ మార్కెట్‌కు తరలిస్తోంది. అయితే, డిశ్పాచ్ అవుతున్న ఈ కార్లన్నీ కూడా ఇప్పటికే బుకింగ్ చేసుకున్న కస్టమర్లకు డెలివరీ చేయనున్నారు.

కొత్తగా బుకింగ్ చేసుకోవాలనుకునే కస్టమర్లు ఈ మోడల్ కోసం మరింత ఎక్కువ సమయం వేచి ఉండాల్సిన పరిస్థితి కనబడుతోంది. గడచిన సంవత్సరం మానేసర్ ప్లాంటులో సమ్మె జరిగినప్పుడు సిఫ్ట్ మోడల్ వెయింటింగ్ పీరియడ్ 6-9 నెలలకు పెరిగింది. అయితే, ఆ తర్వాత కంపెనీ ఫియట్ నుంచి డీజిల్ ఇంజన్లను కొనుగోలు చేసి, మానేసర్‌లోని రెండవ యూనిట్‌లో ఉత్పత్తిని ప్రారంభించి దీని వెయిటింగ్ పీరియడ్‌ను 2-3 నెలలకు తగ్గించడం జరిగింది.

మారుతి సుజుకి సిఫ్ట్‌లో రిఫ్రెష్డ్ వెర్షన్‌ను ప్రవేశపెట్టిన తర్వాత మార్కెట్లో ఈ మోడల్‌కు గిరాకీ ఒక్కసారిగా ఊపందుకుంది. పాత స్విఫ్ట్‌తో పోల్చుకుంటే అనేక మార్పులు, చేర్పులతో వచ్చిన కొత్త స్విఫ్ట్ హ్యాచ్‌బ్యాక్ భారీ బుకింగ్‌లతో మార్కెట్లో రికార్డులను సృష్టించింది. ఉత్పత్తి సామర్థ్యానికి మించి ఈ మోడల్‌కు డిమాండ్ రావటం జరిగింది. మారుతి సుజుకి కంపెనీకు అత్యధిక మార్జిన్లను తెచ్చిన మోడళ్లు కూడా స్విఫ్ట్, డిజైర్ కార్లే.

మారుతి స్విఫ్ట్‌కు ప్రత్యామ్నాయ మోడళ్లు:
మారుతి సుజుకి మానేసర్ ప్లాంట్ లాకౌట్ కారణంగా, కంపెనీ ఫ్లాగ్‌షిప్ మోడళ్లు స్విఫ్ట్, డిజైర్‌ల అమ్మకాలు నిలిచిపోవడంతో, ఈ సెగ్మెంట్లోని ఇతర కంపెనీల నుంచి లభిస్తున్న మోడళ్లకు గిరాకీ ఊపందుకోనుంది. రానున్న రోజుల్లో టొయోటా ఎతియోస్ లివా హ్యాచ్‌బ్యాక్, టొయోటా ఎతియోస్ సెడాన్, ఫోర్డ్ ఫిగో, ఫోర్డ్ క్లాసిక్, హ్యుందాయ్ ఐ20, టాటా ఇండికా-ఇండిగో రేంజ్ కార్లకు గిరాకీ జోరందుకోనుంది.