హైపెర్ఫామెన్స్ కార్ల కోసం ఏఎమ్‌జితో దోస్తీ కట్టిన ఆస్టన్ మార్టిన్

ఆస్టన్ మార్టిన్ అంటేనే పవర్‌ఫుల్ కార్లకు పెట్టింది పేరు. అలాంటిది ఆస్టన్ మార్టిన్ మరింత శక్తివంతమైన పెర్ఫామెన్స్ ఇంజన్లను అభివృద్ధి చేసే కంపెనీతో చేతులు కలిపితే ఇక ఆ పవర్‌కు తిరుగే ఉండదు కదా..!

బ్రిటీష్ లగ్జరీ కార్ కంపెనీ ఆస్టన్ మార్టిన్, జర్మన్ కార్ మేకర్ మెర్సిడెస్ బెంజ్‌కు చెందిన పెర్ఫామెన్స్ డివిజన్ ఏఎమ్‌జిలు కలిసి పనిచేయనున్నట్లు గతంలో పుకార్లు వచ్చాయి. ఇప్పుడు వాటిని నిజం చేస్తూ, ఇరు కంపెనీలు అధికారికంగా తమ డీల్‌ను ప్రకటించాయి. ఈ ఒప్పందంలో భాగంగా, ఆస్టన్ మార్టిన్ కంపెనీ ఏఎమ్‌జి వద్ద ఉన్న వనరులను ఉపయోగించుకొని హైపెర్ఫామెన్స్ కార్లను ఉత్పత్తి చేయనుంది.

కొత్త తరం ఆస్టన్ మార్టిన్ కార్లను తయారు చేసేందుకు ఈ ఒప్పందాన్ని కుదుర్చుకున్నారు. వి8, వి12 వంటి శక్తివంతమైన ఇంజన్లను ఆస్టన్ మార్టిన్ కార్లలో ఉపయోగిస్తారు. ఈ ఒప్పందం వలన ఆస్టన్ మార్టిన్ రెగ్యులర్ ప్రొడక్షన్, సేల్స్‌కు ఎలాంటి అంతరాయం ఉండబోదు.

భవిష్యత్తులోని ఆస్టన్ మార్టిన్ కార్లను సిసి100 స్పీడ్‌స్టర్ కాన్సెప్ట్‌ను ఆధారంగా చేసుకొని అభివృద్ధి చేసే ఆస్కారం ఉంది. తమ సంస్థను ప్రాంభించి 100 ఏళ్లు పూర్తి చేసుకున్న సందర్భంగా 'ఆస్టన్ మార్టిన్ సిసి100 స్పీడ్‌స్టర్ కాన్సెప్ట్' అనే కారును ఈ బ్రిటీష్ ఆటో దిగ్గజం ఆవిష్కరించింది. ఇందులో శక్తివంతమైన 6.0 లీటర్ వి12 ఇంజన్‌ను అమర్చారు. ఈ ఇంజన్ 6-స్పీడ్ ఆటోమేటిక్ ట్రాన్సిమిషన్ సిస్టమ్‌తో జతచేయబడి ఉంటుంది. ఆస్టన్ మార్టిన్ 100సిసి స్పీడ్‌స్టర్ కాన్సెప్ట్ కేవలం నాలుగు సెకండ్ల కన్నా తక్కువ సమయంలో 0-100 కిలోమీటర్ల వేగాన్ని అందుకుంటుంది. ఇది గరిష్టంగా గంటకు 290 కిలోమీటర్ల వేగంతో పరుగులు తీస్తుంది.