ఈకోస్పోర్ట్ ఎఫెక్ట్: ఫోర్డ్ ఇండియా రికార్డ్ బ్రేకింగ్ సేల్స్

ఫోర్డ్ ఈకోస్పోర్ట్.. ఈ కాంపాక్ట్ ఎస్‌యూవీ గురించి ఎంత చెప్పుకున్నా, ఎన్నిసార్లు చెప్పుకున్నా తక్కువే. డిజైన్ దశ నుంచే ఈకోస్పోర్ట్ లక్షలాది మంది అభిమానులను సొంతం చేసుకుంది. ఈ మోడల్ భారత మార్కెట్లో ఫోర్డ్ ఇండియా కంపెనీ తలరాతనే మార్చేసింది. విడుదల కొద్దిరోజుల్లోనే హాట్ కేకుల్లా అమ్ముడుపోతోంది. ఇప్పటికీ ఫోర్డ్ ఈకోస్పోర్ట్‌ను సొంతం చేసుకోవటానికి కొనుగోలుదారులు 7-9 నెలల వరకూ వేచిస్తున్నారంటే ఈకోస్పోర్ట్‌కు ఉన్న క్రేజ్ ఎంటో ఇట్టే అర్థమైపోతుంది.

ఈకోస్పోర్ట్ రాకతో ఫోర్డ్ ఇండియా అమ్మకాలు ఒక్కసారి జోరందుకున్నాయి. ఓవైపు దాదాపు అన్ని ఆటోమొబైల్ కంపెనీలు రుణాత్మక వృద్ధిని నమోదు చేస్తుంటే, ఈకోస్పోర్ట్ వలన ఫోర్డ్ ఇండియా మాత్రం ధనాత్మక వృద్ధిని కనబరుస్తోంది. ఫోర్డ్ ఈకోస్పోర్ట్ విడుదలైన మొదటి 17 రోజుల్లోనే 30,000 బుకింగ్‌లను సొంతం చేసుకున్నట్లు కంపెనీ అధికారికంగా ప్రకటించిన సంగతి తెలిసినదే.