నకిలీ ఫెరారీ కార్లను విక్రయిస్తున్న ముఠా అరెస్ట్

ప్రతి వస్తువుకు నకిలీ వస్తువులు తయారవుతున్న రోజులివి. స్పెయిన్‌లో తాజాగా ఫెరారీ, ఆస్టన్ మార్టిన్ వంటి కోట్ల రూపాయల ఖరీదు చేసే కార్లకు నకిళ్లను తయారు చేసి విక్రయిస్తున్న ముఠాను పట్టుకున్నారు, ఆ దేశ పోలీసులు. ఆన్‌లైన్ ద్వారా నకిలీ ఫెరారీ, ఆస్టన్ మార్టిన్ కార్లను విక్రయిస్తున్న మోసగాళ్ల బృందాన్ని అరెస్టు చేశామని స్పానిష్ పోలీసులు తెలిపారు.

నోరూరించే ధరకే ఇలాంటి లగ్జరీ కార్లను విక్రయిస్తుండటంతో బుర్రలేని కొందరు ప్రబుద్ధులు ముందు వెనుకా ఆలోచించకుండా ఇలాంటి కార్లను కొని మోసపోతున్నారు. ఈ కేసులో వాలెన్సియాకు చెందిన 8 మందిని పోలీసులు అరెస్టు చేశారు. సాధరాణ కార్ల ఎక్స్టీరియర్లను మార్పు చేసి, వాటిని నకిలీ ఫెరారీలు, ఆస్టన్ మార్టిన్లుగా మార్చేసి వాటి ఒరిజినల్ ధరలో ఐదవ వంతు ధరకే సదరు మోడిఫైడ్ నకిలీ లగ్జరీ కార్లను విక్రయిస్తున్నారు ఈ మోసగాళ్లు.

ఈ సూపర్ కార్లను కేవలం 40,000 యూరోలకే (మన దేశ కరెన్సీలో సుమారు రూ.32 లక్షలకు పైగా) విక్రయిస్తుండటంతో వీరిపై అనుమానం వచ్చిన అధికారులు రెడ్‌హ్యాండెడ్‌గా పట్టుకున్నారు. గ్యారేజ్‌లో ఉన్న 17 నకిలీ ఫెరారీ కార్లను, 2 ఆస్టన్ మార్టిన్ కార్లను సీజ్ చేశారు.