జెనీవాలో కొత్త హైపర్‌కారును విడుదల చేయనున్న ఫెరారీ

ఇటలీకు చెందిన ప్రముఖ సూపర్ కార్ల తయారీ కంపెనీ ఫెరారీ ఓ సరికొత్త హైపర్‌కారును త్వరోలనే ఆవిష్కరించనున్నట్లు పేర్కొంది. ఈనెల 5వ తేదీ నుంచి జరగనున్న 83వ అంతర్జాతీయ జెనీవా మోటార్ షోలో ఫెరారీ తమ కొత్త ఎన్జో కారును ప్రదర్శించనుంది. ఈ నేపథ్యంలో, కొత్త ఫెరారీ ఎన్జో హైపర్‌కారుకు సంబంధించిన టీజర్ ఫోటోను కంపెనీ ఆన్‌లైన్‌లో విడుదల చేసింది.

ఫెరారీ మార్కెట్లోకి తీసుకురానున్న ఈ కొత్త ఫెరారీ ఎన్జో హైపర్‌కారు, మెక్‌లారెన్ కంపెనీ విడుదల చేయనున్న మెక్‌లారెన్ పి1 కారుతో పోటీ పడనుంది. ఈ కొత్త కారులో 800 బిహెచ్‌పిల శక్తిని విడుదల చేసే ఇంజన్ ఉండనుంది. ఇది సుమారు 1100 కేజీల బరువును కలిగి ఉండొచ్చని అంచనా. ఎఫ్150 కోడ్ నేమ్‌తో అభివృద్ధి చేసిన ఈ హైపర్‌కారు నిర్మాణంలో ఎక్కువ భాగం కార్బన్ ఫైబర్ మెటీరియల్‌ను ఉపయోగించారు.

ఎన్జో ఆధారంగా రూపొందించిన 2005 ఎఫ్ఎక్స్ఎక్స్ ట్రాక్ కారు నుండి స్ఫూర్తి పొంది ఈ కొత్త ఎన్జోను అభివృద్ధి చేసినట్లు తెలుస్తోంది. ఫెరారీ ఎన్జో ధర 10 లక్షల బ్రిటీష్ పౌండ్లు ఉండొచ్చని అంచనా. అంటే మన దేశ కరెన్సీలో సుమారు రూ.8.3 కోట్లు. ఈ కొత్త కారుకు సంబంధించిన లేటెస్ట్ సమాచారం కోసం తెలుగు డ్రైవ్‌స్పార్క్‌ను గమనిస్తూనే ఉండండి.