రూ.4 లక్షల కన్నా తక్కువ ధరకే కాంపాక్ట్ అంబాసిడర్

భారతదేశపు అత్యంత పురాతన కార్ల తయారీ సంస్థ హిందూస్థాన్ మోటార్స్ వచ్చే ఏడాదిలో ఓ చిన్న అంబాసిడర్ కారును విడుదల చేయనున్నట్లు తెలుగు డ్రైవ్ స్పార్క్ ఇదివరకటి కథనాల్లో ప్రచురించిన సంగతి తెలిసినదే. తాజా అప్‌డేట్ ప్రకారం, ఈ కాంపాక్ట్ అంబాసిడర్‌ను రూ.4 లక్షల కంటే తక్కవ ధరకే అందించాలని కంపెనీ యోచిస్తున్నట్లు తెలుస్తోంది.

ప్రస్తుతం హిందూస్థాన్ మోటార్స్ దేశీయ విపణిలో అందిస్తున్న రెగ్యులర్ వెర్షన్ అంబాసిడర్ ప్లాట్‌ఫామ్‌ను ఆధారంగా చేసుకొని మార్కెట్లో రానున్న ఈ కాంపాక్ట్ అంబాసిడర్ పొడవును 4 మీటర్ల కన్నా తక్కువగా ఉండేలా డిజైన్ చేయటం ద్వారా ఎక్సైజ్ సుంకపు రాయితీలను పొంది సరసమైన ధరకే ఈ కారును అందించాలని కంపెనీ యోచిస్తోంది. 2014 ద్వితీయ త్రైమాసికం నాటికి ఇది దేశీయ విపణిలో అందుబాటులోకి రావచ్చని అంచనా.

గతంలో ఒకానొక సందర్భంలో హిందుస్థాన్ మోటార్స్ ఎమ్‌డి, సీఈఓ ఉత్తమ్ బోస్ ఓ ఆంగ్ల పత్రికకు ఇచ్చిన ఇంటర్వ్యూలో ఈ కాంపాక్ట్ అంబాసిడర్ కారు గురించి ప్రస్తావిస్తూ, ప్రస్తుతం ఆర్ అండ్ డి (రీసెర్చ్ అండ్ డెవలప్‌మెంట్) పనులు జరుగుతున్నాయని, తమ అంబాసిడర్ హ్యాచ్‌బ్యాక్ డిజైన్ దశలో ఉందని, ఇది అన్ని రకాల ఫీచర్లతో నవతరం వినియోగదారులు కోరుకునేలా ఉంటుందని అన్నారు.