ఎక్స్‌ట్రీమ్ అంబులెన్స్‌ను విడుదల చేసిన ఐసిఎమ్ఎల్

ప్రముఖ ట్రాక్టర్లు, వ్యవసాయ పరికరాల తయారీ సంస్థ సోనాలికా గ్రూపుకు చెందిన ప్యాసింజర్ వాహనాల విభాగం ఇంటర్నేషనల్ కార్స్ అండ్ మోటార్స్ లిమిటెడ్ (ఎసిఎమ్ఎల్), హాస్పిటల్స్ ఉపయోగార్థం ఓ అధునాతన అంబులెన్స్ వాహనాన్ని విడుదల చేసింది. 'ఎక్స్‌ట్రీమ్ అంబులెన్స్' పేరుతో లభ్యం కానున్న ఈ అంబులెన్స్ ఏసి, నాన్ ఏసి వేరియంట్లలో లభిస్తుంది.

ఇది భారతదేశపు అత్యంత శక్తివంతమైన అంబులెన్స్ అని కంపెనీ పేర్కొంది. దేశీయ విపణిలో ఎక్స్‌ట్రీమ్ అంబులెన్స్ ధరలు రూ.6.15 లక్షల నుంచి రూ.6.58 లక్షల రేంజ్‌లో ఉన్నాయి (అన్ని ధరలు ఎక్స్-షోరూమ్). ఈ అంబులెన్స్‌లో 120 బిహెచ్‌పిల శక్తిని ఉత్పత్తి చేసే పవర్‌ఫుల్ 4-సిలిండర్, టర్బోఛార్జ్‌‌డ్ ఇంజన్‌ను ఉపయోగించారు. దీని గరిష్ట వేగం గంటకు 165 కిలోమీటర్లు.

ఇందులో పవర్‌ఫుల్ ఇంజన్‌తో పాటుగా, సాధారణ అంబులెన్స్‌లో ఉండే అన్ని సదుపాయాలు లభ్యం కానున్నాయి. 4.1 సీటింగ్ కెపాసిటీ, ఓ స్ట్రెచర్, రివాల్వింగ్ లైట్, గ్లూకోజ్ బాటిల్ హుక్, ఆక్సిజెన్ సిలిండర్ హోల్డర్, వాటర్ డిస్పెన్సర్ హోల్డర్, మెడికల్ మొదలైన వాటిని ఇందులో ఏర్పాటు చేశారు. అక్టోబర్ 2013 నుంచి ఎక్స్‌ట్రీమ్ అంబులెన్స్ అమ్మకాలు ప్రారంభం కానున్నాయి.