గ్రామీణ మార్కెట్లపై కన్నేసిన మారుతి సుజుకి ఇండియా

భారతదేశపు అగ్రగామి ప్యాసింజర్ కార్ల తయారీ కంపెనీ మారుతి సుజుకి, దేశీయ విపణిలో తన అగ్రస్థానాన్ని ఇలాగే పదికాలాల పాటు పదిలంగా ఉంచుకునేందుకు సరికొత్త సన్నాహాలు చేస్తుంది. ఇందులో భాగంగానే, మారుతి సుజుకి ఇండియా ఇప్పుడు గ్రామీణ మార్కెట్లపై ప్రత్యేక దృష్టి సారించింది. వచ్చే ఏడాది మార్చి నాటికి దాదాపు లక్షకు పైగా గ్రామాల్లోకి అడుగుపెట్టాలని నిర్ణయించామని కమపెనీ చైర్మన్ ఆర్‌.సి భార్గవ తెలిపారు.

ప్రస్తుత ఆర్థిక సంవత్సరం ఏప్రిల్-నవంబర్ కాలానికి అన్ని కంపెనీల వాహనాల అమ్మకాలు దాదాపు 4-5 శాతం క్షీణించాయని, అయితే మొత్తం అమ్మకాల్లో 30 శాతంగా ఉండే గ్రామీణ ప్రాంత విక్రయాలు మాత్రం 18 శాతం వృద్ధి చెందాయని ఆయన వివరించారు. కానీ ఇదే సమయంలో పట్టణ ప్రాంతాల్లో డిమాండ్ 5-6 శాతం తగ్గిందని, ఈ అంశాలన్నింటినీ పరిగణనలోకి తీసుకొన్న గ్రామీణ ప్రాంతాల్లో అవకాశాలు ఎక్కవగా ఉన్న నేపథ్యంలో, అమ్మకాలు పెంచుకునేందుకు ఈ మార్కెట్లపై దృష్టి సారిస్తున్నామని భార్గవ చెప్పారు.